قازىرگى تاڭدا مەملەكەتتىك قىزمەت ىستەرى اگەنتتىگى ءوز قۇزىرەتى شەڭبەرىندە جاستارعا بايلانىستى ءىس-شارالاردى جالعاستىرۋدا. اگەنتتىكتىڭ باتىس قازاقستان وبلىسى بويىنشا دەپارتامەنتى پرەزيدەنت جانىنداعى مەملەكەتتىك باسقارۋ اكادەمياسىنىڭ باتىس قازاقستان وبلىستىق فيليالىمەن بىرلەسىپ, دارىندى جاستاردى مەملەكەتتىك قىزمەتكە تارتۋ, كادر قورىن قالىپتاستىرۋ ماقساتىندا 2018 جىلى وبلىسىمىزدا العاش رەت جوعارى وقۋ ورىندارى تۇلەكتەرى ءۇشىن باتىس قازاقستان وبلىسىنىڭ «جاڭا تالاپ» مەملەكەتتىك قىزمەت مەكتەبى قۇرىلىپ, ءوز جۇمىسىن جالعاستىرىپ كەلەدى.
وتكەن جىلى «جاڭا تالاپ» مەملەكەتتىك قىزمەت مەكتەبىنىڭ قۇرامىنا موتيۆاتسيالىق ەسسە جازىپ, تەستىلەۋ مەن اڭگىمەلەسۋدەن كەيىن جوعارى وقۋ ورىندارىنىڭ 33 ستۋدەنتى قابىلداندى. مەكتەپتىڭ 14 تىڭداۋشىسىنا مەملەكەتتىك ورگانداردا تاعىلىمدامادان ءوتۋ مۇمكىندىگى قامتاماسىز ەتىلدى.
وسى جىلى مەكتەپ باعدارلاماسىن جاڭا فورماتتا جۇرگىزۋ ۇيىمداستىرىلدى, ءار جوعارى وقۋ ورىندارىندا توپتار قۇرىلىپ, مەكتەپ قۇرامىنا جاستار پراكتيكاسى اياسىندا مەملەكەتتىك ورگانداردا تاجىريبەدەن ءوتىپ جۇرگەن ماماندار دا ەنگىزىلدى. مەكتەپكە قۇجاتتارىن تاپسىرعان م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنىڭ, جاڭگىر حان اتىنداعى باتىس قازاقستان اگرارلىق-تەحنيكالىق ۋنيۆەرسيتەتىنىڭ, قازاقستان يننوۆاتسيالىق جانە تەلەكوممۋنيكاتسيالىق جۇيەلەر ۋنيۆەرسيتەتىنىڭ جانە باتىس قازاقستان يننوۆاتسيالىق-تەحنولوگيالىق ۋنيۆەرسيتەتىنىڭ 105 ستۋدەنتىنىڭ 80%-ى مەكتەپكە قابىلداندى.
مەملەكەتتىك قىزمەتكە ورنالاسۋعا ۇمىتكەرلەر الدىمەن مەملەكەتتىك ءتىل مەن زاڭنامالاردى بىلۋگە ارنالعان تەستىلەۋدەن ءوتىپ, كونكۋرستىق نەگىزدە مەملەكەتتىك اكىمشىلىك لاۋازىمعا ورنالاسا الادى. وسى رەتتە مەملەكەتتىك قىزمەت مەكتەبىنىڭ تىڭداۋشىلارىن تەستىلەۋ باعدارلاماسىنا ەنگىزىلگەن نورماتيۆتىك-قۇقىقتىق اكتىلەرمەن تانىستىرۋ ماقساتىندا مەملەكەتتىك قىزمەت ىستەرى اگەنتتىگى باتىس قازاقستان وبلىسى بويىنشا دەپارتامەنتىنىڭ باسشىلىعىمەن جانە قۇزىرەتتى مەملەكەتتىك ورگانداردىڭ بىلىكتى ماماندارىمەن دارىستەر, سونداي-اق مەملەكەتتىك كورسەتىلەتىن قىزمەتتەر سالاسىنداعى ۋاكىلەتتى ورگان رەتىندە «ازاماتتارعا ارنالعان ۇكىمەت» مەملەكەتتىك كورپوراتسياسى» كەاق باتىس قازاقستان وبلىسى بويىنشا فيليالىنىڭ وكىلى الەۋمەتتىك جەلىلەر ارقىلى جانە mgov, egov mobil قوسىمشالارى ارقىلى ەلەكتروندىق قىزمەتتەردى الۋ بويىنشا پراكتيكالىق ءدارىس ۇيىمداستىرىلدى.
سونىمەن قاتار مەكتەپ تىڭداۋشىلارىنا پرەزيدەنت جانىنداعى مەملەكەتتىك باسقارۋ اكادەمياسىنىڭ باتىس قازاقستان وبلىسى بويىنشا فيليالىنىڭ ديرەكتورى جانە ماماندارمەن جەكە تۇلعالىق جانە كاسىبي قۇزىرەتتەردى قالىپتاستىرۋ ماقساتىندا «جەكە تۇلعانىڭ دامۋ پاراديگماسى», كوماندادا جۇمىس ىستەۋگە ۇيرەنۋگە مۇمكىندىك بەرۋ, جولداستىق احۋالدى قالىپتاستىرۋ جانە قارىم-قاتىناس جاساۋ ءۇشىن پسيحولوگيالىق كەدەرگىلەردى جويۋعا داعدىلانۋ بويىنشا «ىنتىماقتاستىق, كوماندا قۇرۋ», «كوممۋنيكاتيۆتى داعدىلار» تاقىرىپتارىندا ترەنينگ وتكىزىلدى.
مەملەكەتتىك قىزمەتشىلەردىڭ بويىندا كاسىبي بىلىكتىلىگىمەن قاتار, قارىم-قاتىناس جاساۋ قابىلەتى, ادەپتىلىك, كوممۋنيكاتيۆتىلىك جانە سويلەۋ مادەنيەتى سياقتى جەكە قاسيەتتەرى بولۋى قاجەت. سويلەۋ مادەنيەتىن قالىپتاستىرۋ, كوپشىلىك الدىندا سويلەۋ داعدىلارىن دامىتۋ ماقساتىندا جانە تەلەارنا الەمىنىڭ ىشكى جۇمىسىمەن, باعدارلامالاردى ءتۇسىرۋ, جازۋ بارىسىمەن تانىسۋ ءۇشىن دەپارتامەنتتىڭ باستاماسىمەن مەكتەپ تىڭداۋشىلارىنا «AQJAIYQ», «تدك-42» تەلەارنالارىندا ەكسكۋرسيا ۇيىمداستىرىلدى.
مەكتەپ تىڭداۋشىلارىنا الەۋمەتتىك جەلىلەردە اقپاراتتاردى ىلگەرىلەتۋ بويىنشا «الەۋمەتتىك جەلىلەردى پايدالانۋ جانە داعدىلارىن جەتىلدىرۋ» بويىنشا دا ترەنينگ ۇيىمداستىرىلىپ, «Qalam» وقۋ ورتالىعىنىڭ ديرەكتورى ءوز تاجىريبەسىمەن ءبولىستى. الداعى ۋاقىتتا مەكتەپ تىڭداۋشىلارى وسى العان بىلىمدەرىن تاجىريبە جۇزىندە مەملەكەتتىك ورگانداردا تاعىلىمدامادا پايدالاناتىن بولادى.
مەملەكەتتىك قىزمەت مەكتەبى جاس كوشباسشىلارعا مەملەكەتتىك قىزمەتتىڭ ءىس جۇزىندەگى داعدىلارىن ۇيرەنۋگە مۇمكىندىك بەرەدى. قازىرگى تاڭدا مەكتەپتىڭ 30-عا جۋىق تىڭداۋشىسى وبلىستاعى جەرگىلىكتى اتقارۋشى ورگانداردا, سوت جۇيەسىندە, قۇقىق قورعاۋ ورگاندارىندا, سونىمەن قاتار اتىراۋ, ماڭعىستاۋ وبلىستارىنىنىڭ مەملەكەتتىك ورگاندارىندا تاعىلىمدامادان وتۋگە قىزىعۋشىلىق تانىتۋدا.
تاعىلىمدامادان وتكەن سوڭ «جاڭا تالاپ» مەملەكەتتىك قىزمەت مەكتەبىنىڭ تىڭداۋشىلارىنا وقۋ كۋرستارىن اياقتاعانى تۋرالى سەرتيفيكات بەرىلەدى.
بولاشاق كوشباسشىلارمەن پىكىرلەسۋ بارىسىندا ءبىرى مەملەكەتتىك قىزمەتتە قىزمەت اتقارىپ, ەلىنە ادال قىزمەت ەتۋدى جوسپارلاسا, ەندى ءبىرى اۋىلدى دامىتۋعا سەپتىگىمدى تيگىزسەم دەيدى. وسى رەتتە اتالعان جوبا «جاڭا تالاپ» مەكتەپ تۇلەكتەرىنە بولاشاقتا بيىك بەلەستەردى باعىندىرىپ, تەك زاڭ اياسىندا جانە ەل مۇددەسىنە ادال قىزمەت ەتۋىنە مۇمكىندىك بەرەدى دەگەن ۇمىتتەمىز.
عالىم تۇرسىنباەۆ,
مەملەكەتتىك قىزمەت ىستەرى اگەنتتىگى باتىس قازاقستان وبلىسى بويىنشا دەپارتامەنتىنىڭ باسشىسى
