ەرەكەڭ ايتقان ەكەن...
نارىنقولدىق ءىبىتانوۆ ەركىن ادۋىندى اقىن عانا ەمەس, ءازىل-وسپاقتىڭ دا ايتقىشى. وقىستان شىققان, تاپقىر قالجىڭدارى ەل قۇلاعىن ەلەڭ ەتكىزىپ, كوپشىلىك اراسىنا ءسىڭىپ, اۋىزدان-اۋىزعا كوشىپ جۇرە بەرەدى. اينالاسىن كۇلكىگە كەنەلتكەن قيقار جاۋاپتاردىڭ ءار جاعىندا استارلى ويلاردىڭ جاتقانىن اڭعارۋ قيىن ەمەس. ەندەشە, ەرەكەڭ نە دەر ەكەن, القاقوتان وتىرىپ, تىڭداپ كورەلىك.
وزدەرىڭە قيىن بولدى-اۋ
اۋىزدىعىمەن الىسقان گورباچەۆتىڭ اراقتى قىمباتتاتقان كۇنى ەكى-ءۇش قايناعاسى: «ول مىنا جاڭالىقتى ءالى ەستىگەن جوق, ءبىر قاتىرايىق», — دەپ بايلام جاساپتى.
— ەرەكە-اۋ, جاڭا عانا راديودان بەردى, سىزگە وڭاي سوقپايتىن شەشىم قابىلداندى.
— ول نەعىلعان قيىندىق؟
— اراقتىڭ باعاسى قىمباتتاپ كەتىپتى.
— وي, باتشاعارلار, ماعان ەمەس, ناعىز قيىندىق وزدەرىڭە ورناپ تۇر ەكەن قوي.
— Heگe, — دەدى ولار قوسارلانا.
— ويتكەنى, اراقتى الاتىن سەندەر, ىشەتىن مەن عوي, — دەگەن ەكەن.
بۇل – اكەمنىڭ ماشيناسى
قاراسازداعى مۇحامەتجان قاريانىڭ بالاسى جەكەن «ۆولگا» ماشيناسىن العان كۇنى ەرەكەڭ سول اۋىلعا بارىپتى. جولاي ءىنىسى كەزدەسىپ قالىپ, قۋانىشىنا ورتاقتاسۋىن وتىنەدى. جۇك سالعىشتا «اس - سۋ» مول, ۇرتتاپ-تاتىپ ىزعىتادى.
اياداي اۋىلدا جاڭالىق جاتا ما, ەكى تۋىسقاننىڭ ءسان-سالتاناتى قارياعا دا جەتەدى. ول مىنا قىلىققا اشۋلانىپ, دەرەۋ كۇرەڭىنە مىنە سالىپ شابا جونەلىپتى.
ماشيناداعىلار ءماز بولىپ كەلە جاتسا, قامشىسىن ماي قىزمەتكەرلەرىنىڭ تاياقشاسىنداي كولدەنەڭ ۇستاپ اكەلەرى تۇر. ساسقالاقتاپ قالادى.
— قاپ, قۇرتاتىن بولدى, — دەپ سانىن سوقتى جەكەن.
— سەن ۇندەمە, جاۋابىن ءوزىم بەرەمىن, — دەدى ەرەكەڭ.
ماشينا جەر تىستەپ توقتادى. قاريا ۇرسا جونەلدى.
— مىناۋ سۇمدىق قوي. تەحنيكا ات ەمەس, بايقاماي بىرەۋدى قاعىپ كەتسەڭدەر نە بولادى, ءا؟! — دەپ باستىرمالاتتى. سوندا ەرەكەڭ:
— اعا, بۇل اكەڭىزدىڭ ماشيناسى ما؟ — دەيدى.
— ە, جوعا.
— وندا ءبىزدى كىنالاماڭىز, تىپتەن, جۇمىسىڭىز بولماسىن, سەبەبى, مىناۋ ءبىزدىڭ اكەمىزدىڭ ماشيناسى, — دەگەن ەكەن.
ءاي, پروراب!
تاڭ اتقانشا ولەڭ جازىپ شارشاپ, جەكسەنبىدە ەسىك الدىنا شىقسا, اتى دا, زاتى دا تانىس جولداسى كوشەنى كەسىپ ءوتىپ بارادى. شاقىرايىن دەسە, تاباندا ەسىمىنىڭ اۋزىنا تۇسپەي قالعانى. ايتەۋىر ونىڭ كاسىبىن جاقسى بىلەدى. سوندا:
— ءاي, پروراب!
(ول جالت قاراپتى).
اكەلشى ءبىر اراق؟
ستاكان سۇراپ aپ,
ىشەيىك تۇرا قاپ, —دەگەن ەكەن.
پارتورگ بولعانىن قاراشى
ىسساپارعا بارعان ەرەكەڭدى شارۋاشىلىقتىڭ جاڭا سايلانعان جاس پارتورگى الىپ ءجۇرىپتى.
— قازىر سولعا! — دەيدى ول جۇرگىزۋشىگە الدىڭعى جاقتى يەگىمەن نۇسقاپ. بىراق, قاتەلەسىپتى. پارتورگ دەرەۋ:
— وي, ايتپاقشى وڭعا! — دەپ قالادى.
ءبارىن باقىلاپ وتىرعان ەرەكەڭ:
— ءاي, قۇداي-اي: وڭ مەن سولىن تانىپ ۇلگەرمەگەن بىرەۋلەردىڭ پارتورگ بولعانىن قاراشى, — دەگەن ەكەن.
ماعان ۇيات ەمەس
اۋپارتكومنىڭ ءبىرىنشى حاتشىسى ەرەكەڭە ەرتەڭگى ساعات 7-دە تەلەفون شالادى.
— ەرەكە, «جەتىسۋ» گازەتىنىڭ 50 جىلدىعىنا ارناپ اناۋ كۇنگى مەن تاپسىرعان ەكى شۋماق ولەڭدى جازدىڭ با! — دەپتى.
— ايتقانىڭىز سول ساتتە-اق ورىندالعان.
— بارەكەلدى! شوفەرىمدى جىبەرەيىن, الىپ ۇيگە كەلشى, — دەيدى.
حاتشى جازىلعان دۇنيەگە بەك رازى بولىپى. كۇن جەكسەنبى.
— ال, ەرەكە, مىناۋ جۋاتىن نارسە ەكەن. تاڭ اتپاي جۇزدەتىپ جىبەرسەك, ۇيات ەمەس پە, —دەيدى. سوندا ەرەكەڭ:
— سىزگە ۇيات بولار, ال ماعان ۇيات ەمەس, — دەگەن ەكەن.
بال بولماسا, مال…
... قاراشا ايىندا ءبىر كولحوز توراعاسىنا ەرەكەڭ:
— حافەكە, بال بەرشى, — دەپتى.
— ويباي-اۋ, وسى كۇزدە بال بولۋشى ما ەدى. الدە قاشان ادا جاسادىق. سۇرايتىن مەزگىلدى بىلمەيدى ەكەنسىڭدەر, — دەپ دىزاقتاعان كورىندى. سوندا ەرەكەڭ:
— جارايدى, وندا مال بەرشى, — دەگەن ەكەن.
قارا جۇمىسقا كەسىلگەن سياقتىمىن
— قالتاڭىزدا نەگە اقشا جۇرمەيدى؟ — دەپتى بىردە قىزمەتتەس ءىنىسى.
— بالا, وسى مەن ماڭگىلىك قارا جۇمىسقا كەسىلگەن سياقتىمىن.
— Heگe?
— ويتكەنى, ايلىقتى كوررەكتور بولىپ ىستەيتىن جەڭگەڭ الادى, مەن تەك قول قويىپ بەرەمىن, — دەگەن ەكەن.
ماحابباتتىڭ دا كوگىلدىرى بولا MA ەكەن؟
«سەنبىسىڭ كوگىلدىر ماحابباتىم...» دەپ شىرقالاتىن ءشامشىنىڭ ءانىن تىڭداپ وتىرعان ەرەكەڭ:
— وي, توبا-اي! ماحابباتتىڭ دا كوگىلدىرى بولادى ەكەن-اۋ! — دەگەن ەكەن.
باتىق ماجيت ۇلى
