سالتاناتتى جيىنعا ارنايى قاتىسقان س.ج.اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنىڭ رەكتورى تالعات نۇرعوجين مەرەيتوي يەسىنىڭ دەنساۋلىق سالاسىنا سىڭىرگەن ەڭبەگىن اتاپ ءوتىپ, قوعامدىق دەنساۋلىقتى دامىتۋعا جانە قازاقستان رەسپۋبليكاسىنىڭ دەنساۋلىق ساقتاۋ جۇيەسىن نىعايتۋعا قوسقان ۇلەسى ءۇشىن بولات حابيجان ۇلىن «ۋنيۆەرسيتەت ماقتانىشى» توسبەلگىسىمەن ماراپاتتادى. ۋنيۆەرسيتەت رەكتورى قۇتتىقتاۋ سوزىندە سونداي-اق ارداقتى ۇستازدىڭ وقۋ ورىننىڭ «التىن» كىتابىنا ەنەتىندىگىن جانە بولات حابيجان ۇلىنىڭ ەسىمى ۋنيۆەرسيتەتتىڭ «داڭق» اللەياسىنا جازىلاتىندىعىن اتاپ ءوتتى.
بولات حابيجان ۇلى سونىمەن قاتار, قازاقستان رەسپۋبليكاسىنىڭ حالقىنىڭ ءومىرى مەن دەنساۋلىعىن ساقتاۋعا سىڭىرگەن ابىرويلى ەڭبەگى ءۇشىن ۇلتتىق مەديتسينالىق قاۋىمداستىعىنىڭ جوعارى ماراپاتى – «التىن دارىگەر» مەدالىمەن ماراپاتتالدى.
شارا بارىسىندا مەرەيتوي يەسىن سونداي-اق, «قازاق مەديتسينالىق ۇزدىكسىز ءبىلىم بەرۋ ۋنيۆەرسيتەتىنىڭ» ۇجىمى, «استانا مەديتسينا ۋنيۆەرسيتەتى» ۇجىمى مەن ءار وبلىستان كەلگەن شاكىرتتەرى مەن ارىپتەستەرى قۇتتىقتادى.
جيىن بارىسىندا پەدياتريا جانە بالالار حيرۋرگياسى عىلىمي ورتالىعىنىڭ باسشىسى ريزا بورانباەۆا بولات حابيجان ۇلىنىڭ قىزمەت جولى مەن ورتالىققا سىڭىرگەن ەڭبەگىن اتاپ ءوتىپ: «قۇرمەتتى بولات حابيجان ۇلى! ءبىز ءسىزدى ماقتان تۇتامىز. ءسىزدىڭ جەمىستى ەڭبەگىڭىزگە, سيرەك كەزدەسەتىن باسقارۋشىلىق قاسيەتىڭىزگە, بەلسەندىلىگىڭىزگە, اتقارىپ جاتقان يگى ىستەرىڭىزبەن, پەدياتريا سالاسىنا بىلىكتى ماماندار دايىنداۋ ىسىنە قوسىپ جاتقان ۇلەسىڭىزگە ءتانتىمىز. ءسىزدىڭ قازاقستان پەدياترياسى سالاسىنا سىڭىرگەن ەڭبەگىڭىز وراسان زور. شىن جۇرەكتەن سىزگە زور دەنساۋلىق, وتباسىڭىزعا باقىت, بالالار ساۋلىعى جولىنداعى قىزمەتىڭىزگە مول تابىس تىلەيمىز!», دەدى.
مۇعالىم مەن دارىگەر – بۇلار ەڭ ماڭىزدى جانە ەڭ قۇرمەتتى ماماندىقتار. بۇل ەكى ماماندىق بولات حابيجان ۇلىنىڭ ومىرىندە جەمىستى قابىسا ءبىلدى. عالىمنىڭ ۇزاق ەڭبەك جولى بۇگىن دە جەمىستى جالعاسىن تاۋىپ كەلەدى. ۇزاق جىلدار بويى العان ءبىلىمى مەن جيناعان تاجىريبەسىن جاستارعا ۇيرەتۋدەن شارشاماي كەلەدى. بار عۇمىرىن بالالار دەنساۋلىعىنا ارناعان, قۇرمەتتى وقىتۋشى-پروفەسسور بولات حابيجان ۇلىنىڭ باستى جەتىستىگى – سان مىڭداعان قۇتقارىلعان ءومىر, مىڭداعان العىس پەن ريزاشىلىق جۇرەك, بۇگىندە دارىگەر اتانىپ وتىرعان, ونەگەسى مەن جولىن جالعاستىرار مىڭداعان شاكىرتتەرى.
بولات حابيجان ۇلىنىڭ جۇزدەگەن زەرتتەۋ جۇمىستارى, عىلىمي ەڭبەكتەرى, «پەدياتريا» مەن «كارديورەۆماتولوگيا» سالاسىندا قازاق تىلىندە جازىلعان وقۋلىقتارى جاس ماماندار, جاس ۇرپاق ءۇشىن ماڭگى قۇندى مۇرا بولىپ قالماق.
