قوعام • 17 قازان، 2019

ا.ايماعامبەتوۆ: مينيسترلىك جۇمىسىنا فۋنكتسيونالدىق تالداۋ جۇرگىزدىك

21 رەتكورسەتىلدى

بۇل تۋرالى ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا جازدى. 

«مينيسترلىك جۇمىسىنىڭ تيىمدىلىگىن ارتتىرۋ - ماڭىزدى ماسەلە. بۇل - ىشكى بيزنەس-پروتسەستەردى رەتتەۋ، كەيبىر فۋنكتسيالاردىڭ قايتالانۋىن بولدىرماۋ، ءار قىزمەتكەرگە ناقتى مىندەتتەر جۇكتەۋ، بولىمشەلەردىڭ جۇمىسىن وڭتايلاندىرۋ مەن ولاردىڭ ۇيلەسىمدى جۇمىسىن قامتاماسىز ەتۋ جانە ت. ب. ءبىز مينيسترلىك جۇمىسىنا فۋنكتسيونالدىق تالداۋ جۇرگىزدىك. ءبىراز ماسەلەلەر وزگەرىستەردى قاجەت ەتەتىندىگى انىقتالدى. ماسەلەن، نەگىزگى بولىمشەلەردىڭ جۇمىسىندا باستى نازار ستراتەگيالىق باسىمدىلىقتاردى انىقتاپ، ءبىلىم بەرۋ ساياساتىن بەلگىلەۋگە ەمەس، اعىمداعى وپەراتسيالىق-شارۋاشىلىق جۇمىستارعا اۋدارىلعان. مەكتەپكە دەيىنگى جانە ورتا ءبىلىم بەرۋ، تجكب جانە جوعارى جانە جوعارى وقۋ ورنىنان كەيىنگى ءبىلىم بەرۋ سەكىلدى نەگىزگى دەپارتامەنتتەر وزدەرىنە ءتان ەمەس قىزمەت اتقارادى. اتاپ ايتقاندا كونكۋرستىق راسىمدەردى جۇرگىزۋ، مەملەكەتتىك ساتىپ الۋلاردىڭ تەحنيكالىق سيپاتتامالارىن ازىرلەۋ، اتقارىلعان جۇمىستاردىڭ ەسەبىن قابىلداۋ، اكتىلەرگە قول قويۋ، بيۋدجەتتىك وتىنىمدەردى جاساۋ جانە ت.س. سويتە تۇرا، ءنورماتيۆتى قۇجاتتارمەن جۇمىس ىستەۋ جانە ءوز سالاسىنداعى جۇمىستى ۇيلەستىرۋ سياقتى باستى مىندەتتەرىنە قاجەتتى دەڭگەيدە كوڭىل بولىنبەي كەلەدى»، دەدى اسحات ايماعامبەتوۆ.

سونداي-اق مينيستر بىرقاتار قىزمەتكەرلەر مەن بولىمشەلەردە فۋنكتسيالاردىڭ قايتالانۋى مەن قاراما-قايشىلىقتار انىقتالعانىن اتاپ ءوتتى.

«قۇرىلىمدىق بولىمشەلەردىڭ جۇكتەمەلەرىن تالداۋ دا وسىنداي سايكەسسىزدىكتەردىڭ كوپ ەكەندىگىن كورسەتتى. جوعارى جانە جوعارى وقۋ ورنىنان كەيىنگى ءبىلىم بەرۋ دەپارتامەنتىنىڭ ءبىر قىزمەتكەرىنىڭ جۇكتەمەسى باسقا سەرۆيستىك دەپارتامەنتتەگىدەن 7 ەسە ارتىق. وسى جانە باسقا دا ماسەلەلەردى شەشۋ ءۇشىن مينيسترلىكتىڭ قۇرىلىمىندا بىرقاتار وزگەرىستەر ورىن الماق. ەندى مەملەكەتتىك ساتىپ الۋ، ورىندالعان جۇمىستاردىڭ اكتىلەرىن قابىلداۋ، بيۋدجەتتى يگەرۋ، تەحنيكالىق سيپاتتامالاردى جاساۋ سياقتى بارلىق مىندەتتەر قارجى دەپارتامەنتىنە جۇكتەلەدى. بيۋدجەتتىك وتىنىمدەردى ازىرلەۋ ماسەلەلەرىمەن الداعى ۋاقىتتا بيۋدجەتتىك جوسپارلاۋ دەپارتامەنتى اينالىسادى. ۆيتسە-مينيسترلەر مەن سالالىق دەپارتامەنتتەر تەك عانا ءوز باعىتتارى بويىنشا مەملەكەتتىك ساياساتتى قالىپتاستىرۋمەن، وسى سالالارداعى قىزمەتتى قۇقىقتىق قامتاماسىز ەتۋمەن جانە ۇيلەستىرۋمەن اينالىسادى. ءبىلىم جانە عىلىم سالاسىنداعى باقىلاۋ كوميتەتى ساپانى قامتاماسىز ەتۋ جونىندەگى كوميتەت بولىپ قايتا قۇرىلادى. دەمەك كوميتەتتىڭ ميسسياسى مەن مىندەتتەرى دە وزگەرەدى. ەندىگى مىندەت - ءتارتىپ بۇزۋشىلىقتى تەكسەرۋ مەن انىقتاۋ عانا ەمەس، سونىمەن بىرگە ادىستەمەلىك كومەك كورسەتۋ. ويتكەنى، ماقساتىمىز - تەكسەرۋ ەمەس، سوندىقتان كوميتەت قانداي سىنىپتا، قانداي تاقىرىپ بويىنشا، قاي جەردە كەمشىن تۇس، تۇيتكىلدى جەرلەر بار ەكەنىن كورسەتىپ، وسى ماسەلەنى شەشۋ ءۇشىن ەگجەي-تەگجەيلى ۇسىنىستار بەرەتىن بولادى»، دەپ جازدى مينيستر. 

سونىمەن قاتار مەكتەپكە دەيىنگى جانە ورتا ءبىلىم دەپارتامەنتى قىزمەتكەرلەرىنىڭ سانى باسقا بولىمشەلەردىڭ جۇمىسكەرلەرىنىڭ ەسەبىنەن ارتىپ، مەكتەپكە دەيىنگى جانە ورتا ءبىلىم كوميتەتى بولىپ قۇرىلادى.

«بۇل رەتتە مينيسترلىكتىڭ جالپى شتات سانى ارتپايدى، ونىڭ ۇستىنە بوس جۇمىس ورىندارى ەسەبىنەن ءبىراز قىسقارتۋ جوسپارلانىپ وتىر. مينيسترلىك قىزمەتكەرلەردىڭ بىلىكتىلىگىن ارتتىرۋ جانە وقىتۋ ارقىلى جۇمىسكەرلەردىڭ الەۋەتىن كۇشەيتۋ جونىندەگى جەكە باعدارلاما بەكىتۋدەمىز. كۋرستارعا جانە ماگيستراتۋرادا وقىتۋعا جىبەرۋ جونىندەگى ماقساتتى باعدارلاما دايىندالۋدا. وزگەرىستەر ادەتتە ادامداردى جايلى ورىننان قوزعايتىنى بەلگىلى. دەگەنمەن، بيزنەس-ۇدەرىستەرى، لاۋازىمدىق نۇسقاۋلىقتار جانە ءاربىر بولىمشە مەن قىزمەتكەردىڭ فۋنكتسيونالى ناقتى ايقىندالىپ، نەگىزگى باسىمدىقتار مەن مىندەتتەردىڭ دۇرىس قويىلۋىنا، ءوز كەزەگىندە جۇمىسىمىزدىڭ تيىمدىلىگىن ارتتىرۋعا مۇمكىندىك بەرەتىندىگىنە سەنىمدىمىن»، دەپ جازدى ا.ايماعامبەتوۆ. 

سوڭعى جاڭالىقتار

قازالىدا رەترو-فەستيۆال ءوتتى

ايماقتار • بۇگىن، 16:58

كۇلكى كەرۋەنى № 20

رۋحانيات • كەشە

ۇقساس جاڭالىقتار