سونداي-اق مەملەكەت باسشىسى اۋىل شارۋاشىلىعى عىلىمىنداعى جاعداي ەرەكشە نازار اۋدارۋدى تالاپ ەتەتىنىن اتاپ ءوتتى. ونسىز ءبىز ۇلتتىڭ كەلەشەكتەگى دامۋىن قامتاماسىز ەتە المايمىز. ۇكىمەت بۇل پروبلەمانى عىلىمي زەرتتەۋلەردىڭ دەڭگەيىن ارتتىرۋ جانە ولاردى پراكتيكادا قولدانۋ تۇرعىسىنان قاراعانى ءجون.
ا.ي.باراەۆ اتىنداعى عىلىمي-وندىرىستىك ورتالىق (عوو) قىزمەتكەرلەرى مەملەكەت باسشىسىنىڭ يدەيالارىن تولىعىمەن قولداي وتىرىپ, جولداۋدا اگروونەركاسىپ كەشەنى مەن عىلىمدى دامىتۋ سالاسىنا قاتىستى دۇرىس مىندەتتەر قويىلدى دەپ سانايدى.
قازىرگى تاڭدا ا.ي.باراەۆ اتىنداعى عوو ەلىمىزدىڭ اگروونەركاسىپ كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى شەڭبەرىندە سۋارمالى پوليگون (اقىلدى پوليگون) قۇرۋ ماسەلەسى بويىنشا بەلسەندى جۇمىس جۇرگىزۋدە. بۇل جۇمىستى ءبىز اۋىل شارۋاشىلىعى مينيسترلىگىمەن بىرلەسىپ جۇرگىزەمىز. ول ءۇشىن اشعوو «Valmont» امەريكالىق كومپانياسىمەن كەلىسىم جاسادى جانە بۇگىن ءبىز ولارمەن ناقتى سۋارۋ سالاسىندا ىنتىماقتاستىققا قول قويدىق. جوبا اۋىل شارۋاشىلىعى داقىلدارى مەن يرريگاتسيالىق جۇيەلەردى ءوسىرۋدىڭ جاڭا يننوۆاتسيالىق اگروتەحنولوگيالارىن, سونداي-اق اشعوو بازاسىندا مونيتورينگ جانە باقىلاۋ تەحنولوگيالارىن كورسەتۋگە باعىتتالعان. كومپانيا عىلىمي ورتالىققا جاڭا بۋىن ءۇش جاڭبىرلاتقىش قوندىرعىسىن جەتكىزدى. جاڭا اگرەگات ونىمدىلىكتى ارتتىرۋعا جانە سۋ رەسۋرستارىن ۇنەمدەۋگە مۇمكىندىك بەرەدى. جوباعا سايكەس, عوو بازاسىندا ءۇش مىڭ گەكتار جەر سۋارىلاتىن القاپ بولماق. ءبىزدىڭ الدىن الا عىلىمي ىزدەنىستەرىمىز بويىنشا مۇنداي جوبالار ەلدىڭ ەكسپورتتىق الەۋەتىن ارتتىرۋعا مۇمكىندىك بەرەدى. بۇل رەتتە بۇل جوبا تەك استىق داقىلى عانا ەمەس, سونداي-اق ءارتاراپتاندىرۋ باعدارلاماسىنا قاتىساتىن اۋىل شارۋاشىلىعى داقىلدارىن ناقتى سۋارۋدىڭ ارقاسىندا جۇزەگە اسىرىلادى. اتاپ ايتقاندا, سولتۇستىكتەگى سويا, جاسىمىق – ورتالىق قازاقستاندا, جۇگەرى مەن ماقتا – تۇركىستان وبلىسىندا. بۇل جوبا قازاقستاننىڭ اگروونەركاسىپ كەشەنىنە شەتەلدىك ينۆەستيتسيالاردى تارتۋدا سەرپىن بەرەتىنى قۋانتادى. بۇل تۋرالى پرەزيدەنت ءوزىنىڭ جولداۋىندا دا اتاپ ءوتتى.
سۋارۋدىڭ ءرولىن اۋىل شارۋاشىلىعىندا اسىرا باعالاۋ قيىن. ال قازىرگى جاعدايدا ونىمدىلىگى از جەرلەردى تۇبەگەيلى جاقسارتۋعا جانە ولاردى جوعارى ءونىمدى جەرگە اينالدىرۋعا بولادى, بۇل ەكونوميكالىق ماقساتتىلىقتىڭ نەگىزى.
ال الەمدىك اۋىل شارۋاشىلىعى زاماناۋي جاعدايدا وندىرىلەتىن ءونىمنىڭ عىلىمدى قاجەتسىنۋىن كۇشەيتۋ باعىتىندا قوزعالىپ كەلە جاتقاندىقتان, بۇل جاعدايدا قازاقستانعا دا دامۋ ينستيتۋتتارىندا, عىلىمي ورتالىقتاردا جانە تەحنولوگيالىق جوبالاردا اوك-تەگى جوسپارلارعا جەتەكشى عىلىمي باعدارلامالاردى پراكتيكالىق بايلانىستىرۋ قاجەت. رەسپۋبليكادا اۋىل شارۋاشىلىعىنىڭ ەلەۋلى وسۋىنە باعىتتالعان اگروسەكتوردى يننوۆاتسيالىق دامىتۋدىڭ وبەكتيۆتى, شىنايى, قازىرگى زامانعى جانە مەملەكەت جاقسى قولدايتىن ستراتەگياسى قاجەت. «اقىلدى» سۋلاندىرۋ, تىڭايتقىشتاردى قولدانۋ جانە اۋىل شارۋاشىلىعى داقىلدارىن ديۆەرسيفيكاتسيالاۋدى ەنگىزۋ – تەك وسى جاعدايدا عانا ەلەۋلى تابىستارعا قول جەتكىزۋگە جانە قازاقستاندىق اۋىل شارۋاشىلىعىن الەمدىك دەڭگەيدە تولىق باسەكەگە قابىلەتتى ەتۋگە بولادى.
كەنجە ابدۋللاەۆ,
ا.باراەۆ اتىنداعى اشعوو
باس ديرەكتورى, پروفەسسور
