2019 جىلعى 14 قىركۇيەكتە وزبەكستان پرەزيدەنتى ش.ميرزيوەۆ تۇركىتىلدەس مەملەكەتتەردىڭ ىنتىماقتاستىق كەڭەسىن قۇرۋ تۋرالى ناحچىۆان كەلىسىمىنە قوسىلۋ تۋرالى جارلىققا قول قويدى. سول كۇنى وزبەكستان سىرتقى ىستەر مينيسترلىگى تمىك حاتشىلىعىنا وزبەكستاننىڭ تۇركى كەڭەسىنە قوسىلۋى تۋرالى قۇجاتتى جىبەردى.
تۇركى كەڭەسى قر تۇڭعىش پرەزيدەنتى – ەلباسى ن.ءا.نازارباەۆتىڭ باستاماسىمەن 2009 جىلدىڭ 3 قازانىندا قۇرىلدى. قۇرىلتايشى مەملەكەتتەر ازەربايجان, قازاقستان, قىرعىزستان جانە تۇركيا بولىپ تابىلادى.
تۇركى الەمى ءۇشىن بۇل ماڭىزدى تاريحي شەشىم ناحچىۆان كەلىسىمىنىڭ 10 جىلدىعىن اتاپ وتۋمەن ءدال كەلەدى. وزبەكستاننىڭ تۇركى كەڭەسىنە مۇشەلىگى تۋرالى شەشىمگە ۇيىمعا مۇشە مەملەكەتتەردىڭ باسشىلارى 2019 جىلعى 15 قازاندا باكۋدە وتەتىن شاعىن جانە ورتا بيزنەستى دامىتۋ ماسەلەلەرىنە ارنالعان تۇركى كەڭەسىنىڭ 7-ءشى ءسامميتى بارىسىندا قول قويادى.
وزبەكستاننىڭ تمىك-كە مۇشەلىگى تۇركى الەمىنىڭ ينتەگراتسياسىن نىعايتۋعا جانە مەملەكەتتەردىڭ ىنتىماقتاستىعىن جاڭا بەلەستەرگە شىعۋىنا ىقپال ەتەدى, اسىرەسە بۇل تۇركى كەڭەسى تۇركى ەلدەرىنىڭ ەكونوميكالىق ءوزارا ءىس-قيمىلىن كۇشەيتۋ جونىندە ناقتى قادامدار جاساعان كەزەڭدە ورىن الۋدا. 2019 جىلدىڭ مامىرىندا قازاقستاننىڭ ەلورداسىندا وتكەن XII استانا ەكونوميكالىق فورۋمى اياسىندا كاسىپكەرلەردىڭ اراسىندا ءوزارا بايلانىستى كۇشەيتەتىن جانە مەملەكەتتەر اراسىندا ساۋدا اينالىمىنىڭ وسۋىنە باعىتتالعان تۇركىتىلدەس مەملەكەتتەردىڭ بىرلەسكەن ساۋدا-ونەركاسىپ پالاتاسى قۇرىلدى.
