مەملەكەت باسشىسى قىتاي كومپارتياسىنىڭ چجەتسزيان پروۆينتسياسىنداعى حاتشىسى چە تسزيۋنمەن كەزدەستى

• 12 قىركۇيەك، 2019

مەملەكەت باسشىسى قىتاي كومپارتياسىنىڭ چجەتسزيان پروۆينتسياسىنداعى حاتشىسى چە تسزيۋنمەن كەزدەستى

قاسىم-جومارت توقاەۆ قوناقجايلىق كورسەتكەنى ءۇشىن چجەتسزيان پروۆينتسياسىنىڭ باسشىسىنا ريزاشىلىق ءبىلدىرىپ، قىتاي حالىق رەسپۋبليكاسىنىڭ قارقىندى دامىپ كەلە جاتقانىن ايتتى. بۇل تۋرالى اقوردا حابارلادى.

Egemen Qazaqstan

قازاقستان پرەزيدەنتى ەكى ەل اراسىنداعى قاتىناستار ستراتەگيالىق سەرىكتەستىكتىڭ جاڭا دەڭگەيىنە كوتەرىلگەنىن اتاپ ءوتىپ، وسى مەملەكەتتىك ساپار بارىسىندا قول جەتكىزىلگەن ۋاعدالاستىقتار ءوزارا ارىپتەستىككە تىڭ سەرپىن بەرەتىنىن ايتتى.

– ماڭگىلىك ستراتەگيالىق سەرىكتەستىگىمىز، شىن مانىندە، ءوزارا ىنتىماقتاستىقتىڭ كوپتەگەن سالالارىن قامتيدى. تۇڭعىش پرەزيدەنتىمىز نۇرسۇلتان نازارباەۆ پەن قىتاي باسشىلارى نەگىزىن قالاعان ءىستى جالعاستىرامىز. ءبىز ەكونوميكا، ساياسات جانە وڭىرلىك قاۋىپسىزدىك، سونداي-اق مادەني-گۋمانيتارلىق سالالاردا ىنتىماقتاستىق ورناتامىز، – دەدى قاسىم-جومارت توقاەۆ.

مەملەكەت باسشىسى قىتايدىڭ تسيفرلىق ەكونوميكانى دامىتۋ سالاسىندا وراسان زور جەتىستىككە جەتكەنىنە توقتالىپ، وسى سالاداعى ماسەلەلەردى تالقىلاۋ ءۇشىن چجەتسزيان پروۆينتسياسىنا ارنايى ات باسىن بۇرعانىن ايتتى.

– حانچجوۋ – قىتاي مادەنيەتىنىڭ بەسىگى. بۇل قالا الەمدەگى جوعارى تەحنولوگيالار ورتالىعى بولىپ تابىلادى. مۇندا وسى سالا بويىنشا ءىرى كومپانيالار جۇمىس ىستەيدى. سونىمەن قاتار بۇل قالادا كەزىندە قىتاي توراعاسى سي تسزينپين جۇمىس ىستەپ، ءوزىنىڭ ەڭ تابىستى يدەيالارىن جۇزەگە اسىرعان. قالا كورىكتى جانە تابىستى ءارى قارقىندى دامۋدا، – دەدى مەملەكەت باسشىسى.

چە تسزيۋن قاسىم-جومارت توقاەۆقا ەكونوميكانىڭ ءتۇرلى سالالارى بويىنشا قازاقستانمەن تىعىز ىنتىماقتاستىق جانە مادەني ىقپالداستىق ورناتۋعا دايىن ەكەنىن ايتتى.