ايتىس جاستار جىلىنا ارنالىپ, تەك جاس اقىندار اراسىندا وتكىزىلەدى. وعان 25 جىل بويى وبلىستا ۇزدىكسىز ءوتىپ كەلە جاتقان وقۋشىلار ايتىسىنىڭ جەڭىمپازدارى, وبلىسقا بەلگىلى جاس اقىندار, بارلىعى 12 جۇپ بولىپ, جاس اقىندار قاتىسادى. ايتىستى وبلىستىق مادەنيەت باسقارماسىنىڭ باسشىسى ەرلان قالماقوۆ اشىپ, حالقىمىزدىڭ رۋحاني ومىرىندەگى بۇل ونەردىڭ ورنى تۋرالى ايتا كەلىپ, جاس اقىندارعا ساتتىلىك تىلەدى. قازاقستاننىڭ حالىق اقىنى ءاسيا بەركەنوۆا جاستاردى قۇتتىقتاپ, ايتىستىڭ ونەر عانا ەمەس, ناسيحات قۇرالى ەكەنىن ايتتى.
«ەلباسىنىڭ «بولاشاققا باعدار: رۋحاني جاڭعىرۋ», « ۇلى دالانىڭ جەتى قىرى» باعدارلامالىق ماقالالارىندا ايتىلعان ماسەلەلەردى جۇرتشىلىققا جەتكىزە تۇسۋدە ايتىستىڭ الار ورنى ەرەكشە بولۋى ءتيىس. حالقىمىزدىڭ ءداستۇرىن, رۋحاني قۇندىلىقتارىن بۇگىنگى ۇرپاقتىڭ جوعالتپاۋىنا, كەلەر ۇرپاققا جەتكىزۋىنە قىزمەت ەتۋ اقىنداردىڭ پارىزى دا, مىندەتى» دەدى ءاسيا ايىپقىزى. بەلگىلى ايتىس اقىنى ءالفيا ورمانشينا جاستارعا ارناعان اقىندىق تىلەگىن جىرمەن جەتكىزدى.
وسى ايتىستى وتكىزۋگە باستاما كوتەرىپ, وبلىستىق «قوستاناي» تەلە ارناسىندا ء«بىزدىڭ ايتىس» اتتى حاباردى ۇيىمداستىرعان ءارى سول حاباردى جۇرگىزۋشى مارعۇلان وسپانوۆ 24 اقىن قاتىسقان تەلە ايتىستى وبلىس تەلەكورەرمەندەرى جىل بويى ەكراننان قىزىقتايتىنىن ايتتى. بىرەر جىل ول وسىنداي تەلەايتىس ۇيىمداستىرىلعان ەدى. ونى تەك قوستاناي قالاسىنىڭ تەلە كورەرمەندەرى كورە العان بولاتىن. ەندى بۇل جولى ايتىس ەكران ارقىلى وبلىس كورەرمەندەرىنە جەتەدى.
«ايتىس ءۇش كەزەڭنەن تۇرادى. العاشقى كەزەڭگە 24 اقىن قاتىسادى. ەكىنشى كەزەڭدە ودان ىرىكتەلگەن 12 اقىن 6 جۇپ بولىپ ايتىسادى. ءۇشىنشى كەزەڭگە ءۇش جۇپ شىعىپ, جەڭىمپازدار انىقتالادى. ءبىرىنشى كەزەڭنەن شىعىپ قالعاندارعا 20 مىڭ تەڭگەنىڭ, ەكىنشى كەزەڭنەن كەتكەندەرگە 50 مىڭ تەڭگەنىڭ سەرتيفيكاتى تاپسىرىلادى, ال جەڭگەن اقىندار كەلەسى كەزەڭگە ءوتىپ وتىرادى. ايتىستىڭ ءۇشىنشى شەشۋشى كەزەڭىندە وزا شاپقان جەڭىمپازدارعا قوماقتى جۇلدە تاپسىرىلادى» دەيدى مارعۇلان.
سونىمەن قاتار وسى ايتىستاعى جەڭىمپازدار رەسپۋبليكالىق «التىن دومبىرا» ايتىسىنا جولداما الادى.
«بيىل ايتىسقا تەك وبلىس اۋداندارى مەن قالالارىنداعى جاس تالاپ ايتىسكەرلەردى تارتتىق. بۇل شارانى وبلىستىق مادەنيەت باسقارماسى قارجىلاندىردى. ەگەر كەلەسى جىلى بيىلعىداي قارجى بولسا, ايتىستى ايماقتىق ەتىپ وتكىزگىمىز بار. وسى جولى فينالعا شىققان اقىندارمەن قاتار قازاقستاننىڭ سولتۇستىك وبلىستارىنان 6 جۇپ اقىندار شاقىرار ەدىك» دەيدى مارعۇلان وسپانوۆ.
قوستاناي
