سەيسەنبى كۇنى «استانا» كومانداسىنىڭ مۇشەلەرى «نۇرسۇلتان نازارباەۆ حالىقارالىق اۋەجايىنان» ۇشاققا وتىردى. باعىت – بەلورۋسسيانىڭ مينسك قالاسى. جەرگىلىكتى ۋاقىتپەن 11:00-دە اۋەگە كوتەرىلگەن ۇشاق بورتىندا جيىرماعا جۋىق فۋتبولشى مەن جاتتىقتىرۋشىلار قۇرامى بار. سونداي-اق ەلىمىزدىڭ بىرقاتار باق وكىلدەرى دە كوماندامەن مينسكىگە بارعانىن ايتا كەتەيىك. ءسويتىپ اراعا ءتورت ساعات سالىپ اۋە كولىگىمىز مينسك حالىقارالىق اۋەجايىنا قوندى. اۋا رايى جىلى, شامامەن 25 گرادۋس.
«استانا» كومانداسى بەلورۋسسياعا جوعارى كوڭىل كۇيمەن كەلدى. سەبەبى وتكەن اپتادا ءوز الاڭىندا ەۋروپا ليگاسىنىڭ باتە-گە قارسى نۇر-سۇلتاندا وتكەن العاشقى ماتچىندا 3:0 ەسەبىمەن جەڭسە, اراعا ەكى-ءۇش كۇن سالىپ ەل چەمپيوناتىنىڭ كەزەكتى تۋرىندا «تاراز» كومانداسىن 5:0 ناتيجەسىمەن تاس-تالقانىن شىعاردى. سوندىقتان سوڭعى بەس ويىندا تەك ءىرى ەسەپپەن جەڭىسكە جەتىپ كەلە جاتقان «استانا» فۋتبولشىلارىنىڭ كوڭىل كۇيى ناشار دەپ ايتا المايمىز.
دەگەنمەن باس باپكەر دە, فۋتبولشىلار دا بەرگەن سۇحباتتارىندا جەڭىستىڭ ەفورياسىنا بەرىلمەي, سىرت الاڭداعى ماتچ 0:0 ەسەبىمەن باستالاتىنىن ۇمىتپاي, تەك جەڭىس ءۇشىن وينايتىندارىن ايتۋدا.
سونداي-اق باتە دە ءوز بىرىنشىلىگىنىڭ كەزەكتى تۋرىندا «سلاۆيا» كومانداسىنان 4:0 ەسەبىمەن باسىم ءتۇسىپ, وزدەرىنە دە, جانكۇيەرلەرىنە دە سەنىم وتىن جاققانداي بولدى. بىراق جەرگىلىكتى جانكۇيەرلەر «استاناعا» قارسى وتەتىن قارىمتا ماتچتا ءوز كوماندالارىنىڭ جەڭىسكە جەتىپ, توپتىق كەزەڭىنە شىعاتىنىنا سەنبەيتىنىن ايتۋدا.
جانكۇيەرلەردى بىلاي قويعاندا, باتە-ءنىڭ باس باپكەرى الەكسەي باگا ەلوردادا وتكەن كەزدەسۋدەن كەيىن كومانداسىنىڭ توپتىق كەزەڭگە شىعۋعا مۇمكىندىكتەرى وتە تومەن ەكەنىن ايتقان بولاتىن. دەگەنمەن فۋتبول 90 مينۋت ەمەس, تورەشىنىڭ سوڭعى ىسقىرىعىنا دەيىن جالعاساتىنىن ەسكەرسەك, بۇگىن ەكى كوماندانى دا وتە تارتىستى جانە قىزىققا تولى ماتچ كۇتىپ ءتۇر. سونداي-اق جەرگىلىكتى كوماندا ءوز الاڭىندا بارىن سالىپ, جانكۇيەرلەرىن قۋانتۋعا تىرىساتىنى انىق.
حوش, كەشە باتە مەن «استانا» كوماندالارى اشىق جاتتىعۋ جيىنىن وتكىزدى. ارتىنشا باس جاتتىقتىرۋشىلار ءباسپاسوز ءماسليحاتىندا جۋرناليستەردىڭ سۇراقتارىنا جاۋاپ بەردى.
الدىمەن ءسوز العان باتە كومانداسىنىڭ باس جاتتىقتىرۋشىسى الەكسەي باگا: «مەنىڭ كوماندام ەرتەڭگى ويىنعا دايىن. ءبىز قازاقستاندا دەڭگەيىمىزدى تولىقتاي كورسەتە المادىق. بىراق ەرتەڭ كەزدەسۋ باسقاشا جاعدايدا ءوربيدى. كەتكەن ەسەنى قايتارۋعا مۇمكىندىگىمىز تولىق جەتەدى», دەدى. ء«بىر اپتا بۇرىن عانا «استانادان» 3:0 ەسەبىمەن جەڭىلگەن كوماندا از ۋاقىت ىشىندە ءوز قاتە-كەمشىلىكتەرىن تۇزەپ, جەڭىسكە جەتە الا ما؟» دەگەن ساۋالعا بەلورۋسسيالىق ماماننىڭ بەرگەن جاۋابى مىناداي بولدى: «كەز كەلگەن كوماندا ءۇشىن ءوز جانكۇيەرلەرىنىڭ الدىندا ونەر كورسەتكەن الدەقايدا جەڭىل. قازاقستاندا وتكەن ويىندا «استانا» شابۋىلشىلارى قورعاۋشىلارىمىزدى ابدەن ابىگەرگە ءتۇسىردى. بىراق ەرتەڭ ونداي پروبلەما بولمايتىنىنا سەنىمدىمىن. ويتكەنى كەتكەن كەمشىلىكتەر وسى جولى قايتالانباس ءۇشىن جۇمىس ىستەدىك. ەرتەڭ – سونىڭ جەمىسىن كورەتىن كەز».
وسىدان كەيىن «استانا» كومانداسىنىڭ باس جاتتىقتىرۋشىسى رومان گريگورچۋك جۋرناليستەر ساۋالىنا جاۋاپ بەردى. «ەرتەڭ ءبىز ءۇشىن ەڭ قيىن ويىنداردىڭ ءبىرى بولماق. سەبەبى باتە ويىنشىلارى نۇر-سۇلتاندا كەتكەن ەسەنى قايتكەندە دە قايتارۋعا بىلەك سىبانا كىرىسەتىنى بەلگىلى, – دەپ باستادى ءوز ءسوزىن ۋكراين مامانى. – ونىڭ ۇستىنە, باتە – ءوز الاڭىندا ەسە جىبەرمەيتىن كوماندا. ايتكەنمەن, ءبىزدىڭ جىگىتتەر توپتىق كەزەڭىنە شىعۋ ءۇشىن جەڭىسكە جەتۋ كەرەكتىگىن جاقسى بىلەدى. سوندىقتان ءبىز دە شايقاسقا دايىنبىز».
سونداي-اق باس باپكەر بۇگىنگى ويىنعا شابۋىلشى فيرمين مۋبەلەنىڭ قاتىسۋ-قاتىسپاۋى بەيمالىم ەكەنىن ايتتى. سەبەبى كونگولىق فۋتبولشى باتە-گە قارسى وتكەن العاشقى ويىندا ازداپ جاراقات الىپ قالعان. ەگەر دارىگەرلەر رۇقسات بەرسە, مۋبەلەنى جاسىل الاڭنان كورىپ قالۋىمىز دا مۇمكىن.
باتە – «استانا» ماتچىنا شوتلانديالىق تورەشىلەر بريگاداسى قازىلىق ەتەدى. الاڭداعى باس تورەشى بوببي مەددەنگە قاپتالدان وتانداستارى دۋگلاس روسس پەن دەۆيد رۋم كومەكتەسەدى. ءتورتىنشى تورەشى – دونالد روبەرتسون.
ەكى كوماندا اراسىنداعى كەزدەسۋ بۇگىن بەلورۋسسيانىڭ بوريسوۆ قالاسىنداعى «بوريسوۆ-ارەنادا» وتەدى. ماتچتى وتاندىق «قازسپورت» تەلەارناسى نۇر-سۇلتان ۋاقىتى بويىنشا تۇنگى 23:00-دە تىكەلەي ەفيردە كورسەتەدى.
