كوپتومدىق تاڭدامالىعا اباي, شاكارىم, ماعجان, ءىلياس جانسۇگىروۆ, قاسىم امانجولوۆ, جۇبان مولداعاليەۆ, جۇمەكەن ناجىمەدەنوۆ, تۇمانباي مولداعاليەۆ, قادىر مىرزا-ءالى, مۇقاعالي ماقاتاەۆ, فاريزا وڭعارسىنوۆا, ولجاس سۇلەيمەنوۆ, مۇحتار شاحانوۆ سىندى بارلىعى 13 اقىننىڭ ولەڭدەرى ەنگىزىلدى. جوبانىڭ شىعارماشىلىق جەتەكشىسى, جازۋشى الىبەك اسقاروۆتىڭ ايتۋىنشا, انتولوگياعا ەنگەن اقىنداردىڭ ءتىزىمىن پرەزيدەنت قاسىم-جومارت توقاەۆ بەكىتىپ بەرىپتى.
– وسىدان ءبىر جارىم اي بۇرىن پرەزيدەنتتىڭ تىكەلەي باستاماسىمەن مەملەكەتتىك حاتشى مارات ءتاجين ايتۋلى جوبانى جۇزەگە اسىرۋ جونىندە تاپسىرما بەردى. سودان ارنايى ءتىزىم دايىنداپ, ۇسىندىق. ءتىزىمدى مەملەكەت باسشىسى قاسىم-جومارت توقاەۆتىڭ ءوزى قاراپ شىقتى. ىشىنەن جوعارىدا اتى اتالعان 13 اقىن تاڭداپ الىندى. ۋاقىت وتە تىعىز بولعاندىقتان, باسپا ىزدەپ الىسقا بارمادىق. جيناق ەلورداداعى «فوليانت» باسپاسىنان باسىلىپ شىقتى», – دەدى كىتاپ تۇساۋكەسەرىندە جازۋشى الىبەك اسقاروۆ.
جوبا جەتەكشىسى اتاپ وتكەندەي, مەملەكەت باسشىسىنىڭ ءار اقىننىڭ شىعارماشىلىعىنا اسا ىجداھاتتىلىقپەن قاراپ, جيناققا ەنگەن ءار تۋىندىعا ۇلكەن جاۋاپكەرشىلىك ءھام جاناشىرلىق تانىتقانىن كىتاپتىڭ العىسوزىندە جازىلعان مىنا پىكىرى ايقىن دالەلدەيدى:
«البەتتە قازاق ادەبيەتى دارىندى اقىندارعا كەندە ەمەس. قازاق ولەڭىندە تەبىرەنىس تە, تولعانىس تا, نامىس تا, تەرەڭ تانىم دا بار. مارتەبەلى وقىرمان ءار اقىننان ءوز تالعامىنا ساي ولەڭ ىزدەيدى. سوندىقتان دا الداعى ۋاقىتتا وسى توپتاما جالعاسىن تاۋىپ, كورنەكتى اقىندارىمىزدىڭ شىعارمالارىن جارىققا شىعارا بەرەمىز دەگەن سەنىمدەمىن. قازاقتىڭ جىر كەرۋەنى, رۋحاني دۇنيەمىز جاڭعىرتىپ, بولاشاعىمىزعا باياندى باعدار كورسەتە بەرسىن» دەپ جازادى قاسىم-جومارت توقاەۆ انتولوگيانىڭ العىسوزىندە.
مەملەكەتتىك حاتشى مارات ءتاجيننىڭ باسشىلىعىمەن جۇزەگە اسىرىلعان وسى ەڭبەكتىڭ تۇساۋكەسەر راسىمىنە قازاقستان جازۋشىلار وداعىنىڭ توراعاسى ۇلىقبەك ەسداۋلەت, سەنات دەپۋتاتى نۇرتورە ءجۇسىپ, جازۋشى-عالىمدار – انەس ساراي, مۇحتار شاحانوۆ, مۇرات اۋەزوۆ, بايانعالي ءالىمجانوۆ, نامازالى وماشەۆ, شەرۋباي قۇرمانباي ۇلى, سەرىكزات دۇيسەنعازين باستاعان قالامگەرلەر قاتىسىپ, جيناق جايلى ءوز پىكىر-لەبىزدەرىن ورتاعا سالدى. قۇتتىقتاۋلارىن جەتكىزدى. ۇسىنىستارىن ايتتى. ماسەلەن, الماتىدان ارنايى كەلگەن قوناق, مادەنيەتتانۋشى-عالىم مۇرات اۋەزوۆ انتولوگيانىڭ اياسىن كەڭەيتىپ, ابايدان كەيىنگى عانا ەمەس, ابايعا دەيىنگى اقىن, جىراۋلاردىڭ شىعارماشىلىعىن دا الداعى ۋاقىتتا قامتۋ قاجەتتىلىگىن ايتسا, بەلگىلى اقىن, ماناسشى بايانعالي ءالىمجانوۆ پوەزيا تۋرالى تەلەباعدارلامالاردى كوبەيتۋ ارقىلى جاستارىمىزدى پوەزيانى ءتۇسىنۋ مەن ولەڭ وقۋ مادەنيەتىنە تاربيەلەۋ ءىسى بۇگىنگى تاڭدا كەزەڭ كۇتتىرمەيتىن ماسەلە ەكەنىن العا تارتتى. تۇساۋكەسەر ءراسىمىن سەنات دەپۋتاتى نۇرتورە ءجۇسىپ تۇيىندەدى:
– ء«بىر ادام وت جاقسا, ءجۇز ادام جىلىنادى» دەيدى. قولىمىزداعى مىنا تاماشا كىتاپقا توپتاستىرىلعان 13 اقىننىڭ جىرى ارقىلى ميلليونداردىڭ جانى دا, جۇرەگى دە جىلىنادى عوي دەپ ويلايمىن. سوندىقتان بۇل ىزگى باستاما باياندى, ۇزاعىنان بولعاي, – دەدى.
جوبا ۇيىمداستىرۋشىلارى اتاپ وتكەندەي, «قازاق پوەزياسىنىڭ ءىنجۋ-مارجاندارى» انتولوگياسى بۇل 13 توممەن شەكتەلمەيدى. كەلەشەكتە تاعى دا تىڭ باستامالارعا نەگىز بولادى, ءتىزىم تولىعا تۇسەدى. ال بۇگىنگى تۇساۋى كەسىلىپ, وقىرمانىن قۋانتقان قازىنا قىركۇيەك ايىنىڭ 4-6-سى ارالىعىندا ەلوردا تورىندە تۇڭعىش رەت وتكەلى وتىرعان «ازيا قالامگەرلەرىنىڭ ءى فورۋمىنا» قاتىسۋشى قوناقتارعا تاماشا تارتۋ بولادى دەپ كۇتىلۋدە.
