قايىرىمدى بولۋ الەۋمەتتىك جاۋاپكەرشىلىكتەن
سەيسەنبى, 4 ماۋسىم 2013 2:04
«بيزنەس جانە قايىرىمدىلىق» اتتى IV حالىقارالىق عىلىمي-تاجىريبەلىك كونفەرەنتسيا «التىن قىران» حالىقارالىق قايىرىمدىلىق قورى مەن «نۇر وتان» حدپ-نىڭ قولداۋىمەن جانە «باۋىرجان» قايىرىمدىلىق قورىنىڭ ۇيىمداستىرۋىمەن كەشە استانادا بولىپ ءوتتى.
سەيسەنبى, 4 ماۋسىم 2013 2:04
«بيزنەس جانە قايىرىمدىلىق» اتتى IV حالىقارالىق عىلىمي-تاجىريبەلىك كونفەرەنتسيا «التىن قىران» حالىقارالىق قايىرىمدىلىق قورى مەن «نۇر وتان» حدپ-نىڭ قولداۋىمەن جانە «باۋىرجان» قايىرىمدىلىق قورىنىڭ ۇيىمداستىرۋىمەن كەشە استانادا بولىپ ءوتتى.
مەملەكەتتىڭ ايتارلىقتاي قولداۋ بىلدىرۋىنە قاراماستان, الەۋمەتتىك سالادا ءالى دە شەشىمىن كۇتكەن ماسەلەلەر بارشىلىق. وسى رەتتە مەملەكەت تاراپىنان قولداۋعا يە بولىپ جۇرگەن كاسىپكەرلەردىڭ ويعا ورالاتىنى زاڭدى. الەۋمەتتىك ماسەلەلەردىڭ باسىم بولىگى قايىرىمدىلىق مادەنيەتىنىڭ دەڭگەيى جوعارى بولعاندا عانا شەشىمىن تاباتىنى تاعى انىق. قازاقستاندا ۇجىمدىق الەۋمەتتىك جاۋاپكەرشىلىك قانشالىقتى دامىعان؟ ونىڭ جۇيەسى قانداي بولعانى دۇرىس؟ تيىمدىلىگى نەمەن ولشەنۋى ءتيىس؟
حالىقارالىق ءىس-شارا بارىسىندا وسى ماسەلەلەر جان-جاقتى تالقىعا ءتۇستى. ونىڭ جۇمىسىنا ارنايى كەلىپ قاتىسقان «نۇر وتان» حدپ ءتوراعاسىنىڭ ءبىرىنشى ورىنباسارى باۋىرجان بايبەك ءوز سوزىندە بىلاي دەدى: «ءبۇگىنگى تاڭدا ەلىمىزدە بيزنەستى دامىتۋ ءۇشىن بارلىق جاعداي جاسالدى. ەكونوميكالىق بازيس رەتىندە ءبىزدىڭ بيزنەس ورنىعىپ قالىپتاستى دەپ ايتۋعا بولادى. ەندىگى كۇنى ءبىزدىڭ بيزنەستە بەلسەندى, مۇمكىندىگى بار ازاماتتارىمىزدىڭ كومەككە ءزارۋ جاندارعا قولۇشىن بەرگەنى ماڭىزدى».
ارىپتەستەرىن قايىرىمدىلىق جاساۋعا شاقىرعان «التىن قىران» حالىقارالىق قايىرىمدىلىق قورىنىڭ پرەزيدەنتى يسلامبەك سالجانوۆ وزدەرىنىڭ 15 جىلدان بەرى قايىرىمدىلىق شارالارىمەن اينالىسىپ كەلە جاتقاندىقتارىن العا تارتتى. سونىڭ ءبىر جارقىن كورىنىسى رەتىندە اقتوبە وبلىسى قوبدا اۋىلىندا قۇنى 300 ميلليون تەڭگە بولاتىن 150 ورىندىق بالا-باقشا سالىپ بەرىپ جاتقاندىقتارىن كولدەنەڭ تارتتى. اتالعان نىسان قىركۇيەكتە بۇلدىرشىندەرگە ەسىگىن ايقارا اشادى دەپ كۇتىلۋدە.
نەگىزىنەن شارا ەلىمىزدەگى ۇجىمدىق قايىرىمدىلىقتىڭ, ونىڭ ءىشىندە بيزنەس تاراپىنان جاسالاتىن قولداۋلاردىڭ دامۋىنا سەرپىن بەرۋ ماقساتىندا وسىمەن ءتورتىنشى رەت ۇيىمداستىرىلىپ وتىر. بۇل ەلىمىز الەۋمەتتىك ساياسات باعىتىندا وتاندىق جانە حالىقارالىق دەڭگەيدەگى ماماندارمەن تاجىريبە الماسۋ الاڭىنا اينالدى دەگەندى بىلدىرەدى.
سونداي-اق, شارا بارىسىندا قايىرىمدىلىق قادامدارىنا قاتىستى زاڭنامالىق تەتىكتەردى جەتىلدىرۋدى كوزدەيتىن كوپتەگەن ويلار دا ورتاعا سالىندى. زاڭنامانى جەتىلدىرۋ بويىنشا پىكىرلەرىمەن ءماجىلىس دەپۋتاتى ايگۇل سولوۆەۆا ءبولىستى. ال «باۋىرجان» قايىرىمدىلىق قورىنىڭ پرەزيدەنتى جۇلدىز وماربەكوۆا قايىرىمدىلىقپەن اينالىسۋشىلار ءوز جۇمىستارىن اشىق, جاريالى تۇردە جۇرگىزگەنى ءجون دەگەندى ەرەكشە ايتتى. ونىڭ سوزىنە قاراعاندا, كەلەسى كونفەرەنتسيا جۇمىسى مەملەكەت پەن ۇكىمەتتىك ەمەس ۇيىمداردىڭ ءوزارا جۇمىس ىرعاعىنا قۇرىلاتىن بولادى.
جۇيەلى ۇجىمدىق قايىرىمدىلىقتىڭ دامۋىنا سەرپىن بەرۋگە ارنالعان شاراعا وسى سالاداعى وتاندىق جانە شەتەلدىك ماماندار قاتىسسا, ولاردىڭ قاتارىندا دەۆيد كروۋتەر, دجەيك حەيمان ( ۇلىبريتانيا), روستيسلاۆ كۋرينكو (ۋكراينا), اسەل ارىستانبەكوۆا (قىرعىزستان) جانە تاعى باسقالار بولدى. ولار وزدەرىنىڭ ۇستانىمدارىن بىلدىرۋمەن قاتار, وتاندىق بيزنەس پەن ۇكىمەتتىك ەمەس ۇيىمدار وكىلدەرىنە ارناپ, ترەنينگتەر ءوتكىزدى. كونفەرەنتسيا بارىسىندا «باۋىرجان» قايىرىمدىلىق قورىنىڭ «قايىرىمدىلىق قورىن قالاي اشىپ, قىزمەتىن قالاي ۇيىمداستىرۋعا بولادى؟» اتتى كىتابىنىڭ تۇساۋكەسەرى جاسالدى.
اسقار تۇراپباي ۇلى,
«ەگەمەن قازاقستان».
