وسى تاپسىرمانىڭ قورىتىندىسى بويىنشا ماۋسىم ايىندا ەكى ءىرى ءىس-شارا – بالقاش ايماعىنداعى كۋرورتتىق ايماق نىساندارى بويىنشا اقپاراتتىق تۋر جانە «Balkhash Tourism-2019» حالىقارالىق تۋريستىك فورۋمى وتكىزىلدى. ءىس-شارا ۇلكەن نازارعا يە بولدى. ونىڭ جۇمىسىنا ىشكى جانە كوشپەلى ءتۋريزمدى دامىتۋعا ماماندانعان رەسپۋبليكا وڭىرلەرىنەن جانە شەتەلدەردەن, سونىڭ ىشىندە رەسەي فەدەراتسياسىنان, وزبەكستاننان, موڭعوليادان جانە گونكونگتەن 80-گە جۋىق تۋروپەراتور قاتىستى.
گونكونگتىڭ اتىنان تۋريستىك سالادا ماماندار دايارلايتىن گونكونگ پوليتەحنيكالىق ۋنيۆەرسيتەتى مەنەدجمەنت جانە تۋريزم مەكتەبىنىڭ وقۋ ءبولىمىنىڭ جەتەكشىسى تيفاني چەنگ كەلگەنىن اتاپ ءوتۋ كەرەك. ۋنيۆەرسيتەت ە.ا.بوكەتوۆ اتىنداعى قارمۋ-مەن ىنتىماقتاستىق ورناتتى, ونىڭ اياسىندا ەكى اپتا بويى (7-20 ماۋسىم) اقتوعاي اۋدانىندا 29 ستۋدەنت ەكى وقىتۋشىنىڭ باسشىلىعىمەن قاراعاندى وبلىسىندا ەكولوگيالىق ءتۋريزمدى دامىتۋ بويىنشا ءىس-تاجىريبەدەن ءوتتى. وسى ۋاقىت ىشىندە ولار شابانباي بي اۋىلىنداعى قوناق ۇيلەردە تۇردى.
ينفوتۋر باعدارلاماسى وتە مازمۇندى بولدى. ول بالقاش كولىندەگى تەپلوحودتا بەكتاۋاتا شاتقالى بويىنشا تانىستىرۋ ەكسكۋرسياسىن, كەمەلەر شەرۋى, اۋە جىلاندارى فەستيۆالى, ۇلتتىق تاعامدار فەستيۆالى, يوگا بويىنشا شەبەرلىك سىنىبى, ۇلتتىق ستيلدەگى فوتوسەسسيانى جانە ت.ب. قامتىدى. سونىمەن قاتار قاتىسۋشىلارعا بالقاش جانە پريوزەرسك قالالارى, اقتوعاي اۋدانىنىڭ شۇبارتۇبەك جانە توراڭعالىق كەنتتەرى كىرەتىن «پريبالحاش» كۋرورتتىق ايماعىنىڭ دەمالىس ورىندارى مەن ۇيلەرىمەن تانىسۋعا مۇمكىندىك بەرىلدى.
حالىقارالىق تۋريستىك فورۋمعا قىزمەت كورسەتۋ سالاسىنداعى 250 كاسىپكەر, وتەلەرلەر, الەۋەتتى ينۆەستورلار, قۇرىلىس كومپانيالارى مەن تۋروپەراتورلار قاتىستى. VIP-قوناقتاردىڭ قاتارىندا رەسەي فەدەراتسياسى ەلشىسىنىڭ ورىنباسارى الەكساندر اندرەەۆيچ مۋسيەنكو, «Kazakh Tourism» ۇلتتىق كومپانياسى توراعاسىنىڭ كەڭەسشىسى ەركەبۋلان حاسەنوۆ, «McKinsey&Company» حالىقارالىق كونسالتينگ كومپانياسىنىڭ, قازاقستاندىق قوناق ۇيلەر مەن مەيرامحانالار قاۋىمداستىعىنىڭ, «اتامەكەن» ۇلتتىق كاسىپكەرلەر پالاتاسىنىڭ وكىلدەرى جانە قارمۋ-دىڭ پرورەكتورى بولدى.
پلەنارلىق وتىرىستا قاتىسۋشىلار 2019-2025 جىلدارعا ارنالعان تۋريستىك سالانى دامىتۋدىڭ مەملەكەتتىك باعدارلاماسىمەن جانە بالقاش كۋرورتتىق ايماعىن دامىتۋدىڭ ماستەر-جوسپارىمەن تانىستى. الەۋەتتى ينۆەستورلار بالقاش جاعالاۋىنداعى بوس جەر ۋچاسكەلەرىنىڭ بار-جوعى جانە «قاراپايىم زاتتار ەكونوميكاسى», «بيزنەستىڭ جول كارتاسى – 2020» جانە «ەڭبەك» باعدارلامالارى بويىنشا مەملەكەتتىك قولداۋ شارالارى تۋرالى تولىق اقپارات الدى.
فورۋم ناتيجەسىندە تۋروپەراتورلار مەن دەمالىس ورىندارى اراسىندا شامامەن 20 كوممەرتسيالىق كەلىسىمشارت جاسالدى. وسىلايشا, تۇمەن جانە ومبى كومپانيالارى قاراعاندىنىڭ «پاۆلين-تۋر» تۋروپەراتورى ارقىلى سەگىز تۋريستىك نىسانمەن ىنتىماقتاسۋعا نيەت تانىتتى.
ەگەر «قازاقستاننىڭ كيەلى جەرلەرىنىڭ گەوگرافياسى» جوباسى تۋرالى ايتاتىن بولساق, وندا قاراعاندى وبلىسىنىڭ ۇلىتاۋ اۋدانىنا ەرەكشە قىزىعۋشىلىق تانىتىلادى. تۇڭعىش پرەزيدەنت ءوزىنىڭ «رۋحاني جاعىرۋ» باعدارلامالىق ماقالاسىندا ءاربىر حالىقتىڭ, ءاربىر وركەنيەتتىڭ وسى حالىقتىڭ ءاربىر وكىلىنە بەلگىلى جالپىۇلتتىق سيپاتقا يە قاسيەتتى ورىندارى بار ەكەنىن اتاپ ءوتتى. ۇلىتاۋ ەجەلدەن ۇلى قازاق دالاسىنىڭ كيەلى قازىناسى بولىپ سانالادى.
ء«بىز تاريحىمىزدا وسىناۋ كوركەم, رۋحاني, قاستەرلى جەرلەرىمىزدىڭ ءبىرتۇتاس جەلىسىن بۇرىن-سوڭدى جاساعان ەمەسپىز.
ماسەلە ەلىمىزدەگى ەسكەرتكىشتەردى, عيماراتتار مەن كونە قالالاردى قالپىنا كەلتىرۋدە تۇرعان جوق.
يدەيانىڭ تۇپكى توركىنى ۇلىتاۋ تورىندەگى جادىگەرلەر كەشەنىن, قوجا احمەت ياساۋي ماۆزولەيىن, تارازدىڭ ەجەلگى ەسكەرتكىشتەرىن, بەكەت اتا كەسەنەسىن, التايداعى كونە قورىمدار مەن جەتىسۋدىڭ كيەلى مەكەندەرىن جانە باسقا دا جەرلەردى ءوزارا ساباقتاستىرا وتىرىپ, ۇلت جادىندا ءبىرتۇتاس كەشەن رەتىندە ورنىقتىرۋدى مەڭزەيدى.
مۇنىڭ ءبارى تۇتاسا كەلگەندە حالقىمىزدىڭ ۇلتتىق بىرەگەيلىگىنىڭ مىزعىماس نەگىزىن قۇرايدى», دەپ اتاپ ءوتتى ن.نازارباەۆ.
ۇلىتاۋ ءوڭىرى تۋريستيفيكاتسيا كارتاسىنىڭ توپ-50 نىساندارىنىڭ قاتارىنا ەندى. ول تاريحي-مادەني, زياراتتىق, ەكولوگيالىق جانە ەتنوتۋريزمدى دامىتۋ ءۇشىن ۇلكەن الەۋەتكە يە. ۇلىتاۋدا 600 ءتۇرلى ەسكەرتكىش بار. ولاردىڭ ىشىندە ەڭ تانىمال جانە كيەلىلەرى: جوشى حان كەسەنەسى – اتاقتى شىڭعىسحاننىڭ ۇلكەن ۇلى, قازاق حاندىعىنىڭ قۇرىلۋىمەن بايلانىستى تاريحتىڭ ۇلى وقيعالارىنىڭ كۋاسى بولعان «حان ورداسى» تاريحي ورنى, ەجەلگى جارتاس ونەرىنىڭ قىزىقتى جانە قاستەرلى جاۋھارلارىن جانە باسقا دا تاريحي-مادەني جانە كيەلى ورىنداردى سيپاتتايتىن تەرەكتى اۋليە, تامدى پەتروگليفتەرى.
ءتۋريزمدى دامىتۋ ءۇشىن رەسپۋبليكالىق بيۋدجەت قاراجاتى ەسەبىنەن جالپى سوماسى 546 ملن تەڭگەگە ۆيزيت-ورتالىعىنىڭ قۇرىلىسى كىرەتىن ءىس-شارالار جوسپارى ازىرلەندى. مۇندا كەلۋشىلەر كورىكتى جەرلەر تۋرالى اقپاراتتى, تۋريستىك باعىتتار مەن مۇراجاي بويىنشا ەكسكۋرسيالاردى ۇيىمداستىرۋدى قوسا العاندا, تولىق قىزمەت كەشەنىن الا الادى.
كولىك لوگيستيكاسى ماسەلەسى شەشىلۋدە. قاسيەتتى نىساندارعا وڭاي جەتۋ ءۇشىن ۇزىندىعى 233 شاقىرىم بولاتىن قاراعاندى-جەزقازعان- ۇلىتاۋ اۆتوجولى جوندەۋدەن وتكىزىلدى. وتكەن جىلى الاشا حان, جوشى حان جانە دومباۋىل كەسەنەلەرىنە اپاراتىن 35 شاقىرىم جولعا جالپى سوماسى 695 ملن تەڭگەگە جوندەۋ جۇرگىزىلدى. اعىمداعى جىلى «حان ورداسى» جانە «التىن شوقى» تاريحي ورىندارىنا اپاراتىن 20 شاقىرىم اۆتوجولدى جوندەۋ جوسپارلانۋدا. قارجىلاندىرۋ كولەمى 803,6 ملن تەڭگەنى قۇرايدى.
وتكەن جىلى ۇلىتاۋ اۋدانىنا تۋريستەردى تارتۋ ءۇشىن «جەزكيىك» حالىقارالىق مۋزىكالىق ەتنوفەستيۆالى وتكىزىلدى, ونىڭ اياسىندا ۇلىتاۋ كيەلى جەرلەرىنە تۋريستىك فورۋم جانە تۋروپەراتورلار ءۇشىن اقپاراتتىق تۋر ءوتتى. وسى جىلدىڭ ماۋسىم ايىندا مۇندا «كوكمايسا» اتتى حالىقارالىق ەتنوفەستيۆال وتكىزىلدى, باعدارلاما ۇلىتاۋ تاۋلارىنا ەكسكۋرسيا, قولدانبالى ونەر بويىنشا شەبەرلىك سىنىپتارى, سونداي-اق ۇلتتىق جارىستار مەن كونكۋرستاردى قامتىدى.
قاراعاندى
