مىنە, بىرنەشە اپتادان بەرى ەلىمىزدە مي قايناتار ىستىق تولاستاماي تۇر. قاپىرىق اۋانىڭ كەسىرىنەن وڭىردە ءورت وقيعالارى دا جيىلەپ كەتتى. اسىرەسە اشىق القاپتارداعى قۇرعاق ءشوپتىڭ جانۋ دەرەكتەرى سوڭعى كۇندەرى كوپ تىركەلىپ وتىر. وبلىستىق توتەنشە جاعداي دەپارتامەنتى ءباسپاسوز قىزمەتىنىڭ تاراتقان دەرەكتەرىنە سۇيەنسەك, ايماقتا تەك ەكى تاۋلىكتە 10 ءورت وقيعاسى تىركەلىپ, ءورت سوندىرۋشىلەر ءتورت بىردەي اۋداندا ايتىپ كەلمەيتىن اپاتپەن ارپالىسىپتى (جارما, اياگوز, بەسقاراعاي جانە سەمەي شاھارىنىڭ ماڭى).
«وسى كۇندەرى وبلىس بويىنشا قۇرعاق ءشوپتى سوندىرۋمەن جەكە قۇرامنىڭ 42 ادامى مەن 10 ارنايى تەحنيكا جۇمىس ىستەدى. بۇل جۇمىسقا شارۋا قوجالىقتارى مەن ورمان شارۋاشىلىقتارىنىڭ 30-عا جۋىق قىزمەتكەرى دە جۇمىلدىرىلدى» دەيدى وبلىستىق توتەنشە جاعداي دەپارتامەنتى ءباسپاسوز قىزمەتىنىڭ مامانى اناستاسيا سكليار.
10 تامىزدا كۇرشىم اۋدانىنىڭ قۇيعان اۋىلىنان 15 شاقىرىم جەردە ءورت شىعىپ, 800 گەكتار اۋماق قىزىل جالىن قۇرساۋىندا قالعانى, ونى سوندىرۋگە توتەنشە جاعداي, جەرگىلىكتى اتقارۋشى ورگاندار جانە ورمان شارۋاشىلىعى تاراپىنان 39 ادام مەن 9 ارنايى تەحنيكا جۇمىلدىرىلعانى تۋرالى اقپارات تارادى.
«ساقتانساڭ – ساقتايدى» دەيتىن حالىقپىز. ال ورتتەن قالاي ساقتانۋعا بولادى؟ دالا ءورتىنىڭ تۇتانۋىنا نە سەبەپ؟ وبلىستىق توتەنشە جاعداي دەپارتامەنتىنىڭ ماماندارى دالا ءورتىنىڭ شىعۋىنا نەگىزگى ەكى سەبەپ بارىن, ءبىرى ادامداردىڭ ابايسىزدىعى, ەكىنشىسى نايزاعايدىڭ ءتۇسۋى ەكەندىگىن ايتادى. «ورمان القاپتارى كۇن سايىن عارىش ارقىلى باقىلانادى. ال سوڭعى اپتالارداعى قۇرعاق ءشوپتىڭ جانۋ دەرەكتەرى تىركەلگەنىمەن ەشقانداي ماتەريالدىق شىعىن كەلگەن جوق. ءورت ەلدى مەكەندەردەن الىس اۋماقتا. دەگەنمەن ارقانى كەڭگە سالۋعا بولمايدى. كەيدە مالشىلار مال قاراپ ءجۇرىپ مىنگەن تەحنيكاسىنىڭ مۇرجاسىنان ۇشقىن تۇسكەنىن ءوزى دە اڭعارماۋى مۇمكىن. كەيبىر ادامدار تەرەزەدەن شىنى بوتەلكەنى لاقتىرىپ كەتەدى. اينەگىنىڭ كۇنگە قىزۋىنان قۋراعان جاپىراقتا وت تۇتانۋى ابدەن مۇمكىن. اڭشىلار نەمەسە جاي ادامدار دالادا وق اتۋى مۇمكىن. وق قالدىعىنان دا وت شىعادى. وسىنىڭ ءبارى ءورتتىڭ شىعۋىنا سەبەپ بولادى. سونىمەن قاتار شارۋا قوجالىقتارىنا ەگىستىك القاپتارىنا جۇمىس ىستەۋگە شىعار الدىندا اۋىلشارۋاشىلىق تەحنيكالارىنىڭ جاعدايىن مۇقيات تەكسەرتىپ السا دەيمىز», دەيدى ا.سكليار.
وسكەمەن
