تاريحي جاعدايداعى جاڭا ساياسي باعىت
سەيسەنبى, 19 اقپان 2013 7:25
پارلامەنت ءماجىلىسىنىڭ ەكونوميكالىق رەفورما جانە وڭىرلىك دامۋ كوميتەتىنىڭ توراعاسى, «نۇر وتان» حدپ فراكتسياسىنىڭ مۇشەسى س.ايىمبەتوۆپەن اڭگىمە
– سەيىتسۇلتان سۇلەيمەن ۇلى, اۋەلى مەملەكەت باسشىسى نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىنىڭ تاريحي ءمانى, ەلدىك ماڭىزى تۋرالى ايتىپ وتسەڭىز.
سەيسەنبى, 19 اقپان 2013 7:25
پارلامەنت ءماجىلىسىنىڭ ەكونوميكالىق رەفورما جانە وڭىرلىك دامۋ كوميتەتىنىڭ توراعاسى, «نۇر وتان» حدپ فراكتسياسىنىڭ مۇشەسى س.ايىمبەتوۆپەن اڭگىمە
– سەيىتسۇلتان سۇلەيمەن ۇلى, اۋەلى مەملەكەت باسشىسى نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋىنىڭ تاريحي ءمانى, ەلدىك ماڭىزى تۋرالى ايتىپ وتسەڭىز.
– ەلباسى نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى جولداۋى – تاريحي ۇزاق مەرزىمدى قامتيتىن, ۇزاق مەجەنى بەلگىلەيتىن تاريحي ماڭىزدى قۇجات.
ەلباسى ءوزىنىڭ جىل سايىنعى قازاقستان حالقىنا جولداۋىندا ايماق دامۋىنا كوپ كوڭىل بولەدى جانە دە بۇل جولعى جولداۋدا مەملەكەتتىك ورگانداردىڭ وڭىرلىك دامۋ سالاسىنداعى جۇمىستارىن ۇيلەستىرۋ قاجەتتىگى اتاپ كورسەتىلگەن. باستى مىندەتتىڭ ءبىرى – مەملەكەتتىك جانە بارلىق سالالىق باعدارلامالاردىڭ ورىندالۋىن وڭىرلەردى دامىتۋدىڭ باسىمدىققا يە مىندەتتەرىن شەشۋمەن ءۇيلەستىرۋ. سونىمەن قاتار, پرەزيدەنت «قازاقستان-2050» ستراتەگياسىنىڭ نەگىزگى قاعيدالارىن ايتا كەلە, العا قويىلىپ وتىرعان ءمىندەتتەردى تولىققاندى جانە جان-جاقتى ءتۇسىندىرىپ قانا قويماي, ولاردى ساپالى شەشۋدىڭ جولدارىن دا بەلگىلەپ بەردى.
سونداي-اق ەلباسى: «ءبىز اكىمشىل-ءامىرشىل جۇيەنىڭ باسقارۋ داستۇرلەرىنەن ءتۇبەگەيلى باس تارتىپ, باسقارۋشىلاردىڭ زاماناۋي ءارى ءتيىمدى كورپۋسىن قۇرۋعا ءتيىسپىز. كادرلاردى ىرىكتەۋ مەن جوعارىلاتۋدىڭ بارلىق ازاماتتار تەڭ قۇقىقتار مەن ءمۇمكىندىكتەرگە يە بولاتىن, ءبىز جاساعان جۇيەسى مەملەكەتتىك اپپارات قىزمەتىنىڭ كاسىبيلىگى مەن اشىقتىعىنىڭ بارىنشا جوعارى دەڭگەيىن قامتاماسىز ەتەدى. ءبىز مەملەكەتتىك باسقارۋدا وزىندىك تۇرعىدا توڭكەرىس جاساۋعا قول جەتكىزدىك, ونى حالىققا مەملەكەتتىك قىزمەتتەردى كورسەتۋ ساپاسىن ارتتىرۋعا قايتا باعدارلادىق», دەپ اتاپ ءوتتى.
قازىرگى تاڭدا «مەملەكەتتىك قىزمەتتەر كورسەتۋ تۋرالى» زاڭ جوباسى ءماجىلىستىڭ قاراۋىنا الىنىپ, ول بويىنشا جان-جاقتى جانە قارقىندى جۇمىستار جۇرگىزىلۋدە. زاڭ جوباسىن قابىلداۋ مەملەكەتتىك قىزمەت كورسەتۋ ماسەلەلەرىن زاڭنامالىق رەتتەۋدىڭ, مەملەكەتتىك قىزمەت كورسەتۋ ءتارتىبىنە ءبىر ءتيپتى تالاپتاردى قامتاماسىز ەتۋدىڭ, مەملەكەتتىك قىزمەت كورسەتۋ سالاسىنداعى مەملەكەتتىك ورگاندار وكىلەتتىكتەرىنىڭ ارا-ءجىگىن ناقتى اجىراتۋدىڭ, مەملەكەتتىك قىزمەت كورسەتۋ, ونىڭ ىشىندە ەلەكتروندىق نىساندا كورسەتۋ ۇدەرىسىن جەتىلدىرۋدىڭ قاجەتتىلىگىنە نەگىزدەلگەن.
اتاپ ايتقاندا, زاڭ جوباسى شەڭبەرىندە مەملەكەتتىك قىزمەت كورسەتۋ سالاسىنداعى بىرقاتار كونتسەپتۋالدى ماسەلەلەردى شەشۋ جوسپارلانۋدا. وسىلايشا, ءبىرىنشى كەزەكتە مەملەكەتتىك قىزمەت كورسەتۋدىڭ ءتىزىلىمىن كەڭەيتۋدى كوزدەيتىن جاڭا ۇعىم زاڭنامالىق تۇرعىدا ايقىندالادى. سونداي-اق, مەملەكەتتىك قىزمەت كورسەتۋ تۇتىنۋشىلاردىڭ قۇقىقتارى, ونىڭ ىشىندە مەملەكەتتىك قىزمەت كورسەتەتىن تۇلعالاردىڭ ارەكەتىنە (ارەكەتسىزدىگىنە), مەملەكەتتىك قىزمەت كورسەتۋدىڭ ناتيجەسىنە مەملەكەتتىك قىزمەتتەردى تۇتىنۋشىلاردىڭ سوتقا دەيىنگى شاعىمدانۋ قۇقىعى زاڭنامالىق تۇرعىدا رەگلامەنتتەلەتىن بولادى.
مەملەكەتتىك قىزمەت كورسەتۋ تيىمدىلىگى مەن ساپاسىن ارتتىرۋعا باعىتتالعان قازاقستان رەسپۋبليكاسىنداعى مەملەكەتتىك باسقارۋدى رەفورمالاۋ جاعدايىندا مەملەكەتتىك قىزمەت كورسەتۋ ساپاسىنا قوعامدىق مونيتورينگ جۇرگىزۋ ءتارتىبىن ايقىنداۋدىڭ زاڭنامالىق ماڭىزى زور ەكەنى دە انىق. سونىمەن قاتار, مەملەكەتتىك قىزمەت كورسەتۋ ۇدەرىسىنە تىكەلەي قاتىساتىن تۇلعالاردىڭ ارەكەتى (ارەكەتسىزدىگى), زاڭنامادا بەلگىلەنگەن مەملەكەتتىك قىزمەت كورسەتۋ ءتارتىبىن بۇزعانى ءۇشىن تارتىپتىك جاۋاپكەرشىلىككە تارتۋ بويىنشا نورمالاردى قاراستىرۋ ۇسىنىلادى.
ەلباسى جولداۋىنىڭ نەگىزگى ماقساتى – قازاقستاندىقتاردىڭ جاسامپاز كۇش-قۋاتىن قوعامىمىزدىڭ قول جەتكىزگەن نەگىزگى جەتىستىكتەرىن ساياسي تۇراقتىلىقتى, حالىقتىڭ بىرلىگىن ساقتاي وتىرىپ, گۇلدەنگەن قوعام قۇرۋعا ارنالعان ستراتەگيالىق باعىتتىڭ توڭىرەگىندە يدەولوگيالىق جاعىنان توپتاستىرۋ ارقىلى دامۋدىڭ جاڭا مىندەتتەرىنە باعىتتاۋ. ال قازاقستان دامۋىنىڭ ساياسي باعىتىندا قاراپايىم قازاقستاندىق بۇرىنعىداي نەگىزگى ورىن الادى. جولداۋدىڭ بارلىق ماقساتتارى مەن مىندەتتەرى, تۇپتەپ كەلگەندە, بارلىق ازاماتتاردىڭ ءال-اۋقاتىن ارتتىرۋ ءۇشىن جاعداي جاساۋ بولىپ تابىلادى. وسى رەتتە ەلباسى وتانداستارىمىزدى جالپىۇلتتىق ستراتەگيانى ىسكە اسىرۋعا بەلسەندى تۇردە قاتىسۋعا شاقىرادى.
پرەزيدەنتتىڭ وسى جولداۋى – ىرگەلى تاريحي قۇجات, ول ەل تاريحىنىڭ جاڭا داۋىرىنە جول اشىپ وتىر. بۇل جاڭا ءىس-قيمىل باعدارلاماسىنىڭ ءوز بولاشاعىمىزعا جانە بالالارىمىزدىڭ بولاشاعىنا نىق سەنىممەن قاراۋىمىزعا مۇمكىندىك بەرەتىنى قازىردىڭ وزىندە انىق بايقالۋدا.
– ەلباسى ەكونوميكالىق الەۋەتىمىزدى ارتتىرۋعا ءمۇمكىندىگىمىز مول ەكەنىن ايتتى. ءسىز قانداي وي قوسار ەدىڭىز؟
– 2050 جىلعا قاراي مىقتى مەملەكەتتىڭ, دامىعان ەكونوميكانىڭ جانە جالپىعا ورتاق ەڭبەكتىڭ نەگىزىندە بەرەكەلى قوعام قۇرۋ ءۇشىن ەكونوميكالىق جەدەل ءوسۋ جاعدايىن قامتاماسىز ەتۋ جانە كۇنكورىس ساياساتىمەن ەمەس, جوسپارلاۋ ساياساتىمەن, ۇزاق مەرزىمدى دامۋمەن جانە ەكونوميكالىق وسۋمەن اينالىسۋ اسا ماڭىزدى. قازاقستاننىڭ 2012 جىلى الەمدىك ەكونوميكالاردىڭ جىل سايىنعى باسەكەگە قابىلەتتىلىك رەيتينگىندە 72-ءشى ورىننان 51-ءشى ورىنعا سەرپىندى سەكىرىسى 1997 جىلى پرەزيدەنت نۇرسۇلتان نازارباەۆتىڭ باستاماسىمەن «قازاقستان-2030» ستراتەگياسى قابىلدانعان كەزدە تاڭداپ الىنعان باعىتتىڭ دۇرىس ەكەنىنىڭ قيسىندى ايعاعى بولدى.
قازاقستان – ورتالىق ازيادا 14 مىڭ كيلومەترگە سوزىلعان مەملەكەتتىك شەكاراسىن زاڭ جۇزىندە رەسىمدەگەن بىردەن-ءبىر مەملەكەت. سوڭعى 15 جىلدا ەل ەكونوميكاسى 16 ەسە ءوستى. جان باسىنا شاققاندا ءىجو كولەمى 12 مىڭ اقش دوللارىنا جەتتى. يننوۆاتسيالىق بازا نەگىزىندە تابىستى ىسكە اسىرىلىپ جاتقان ۇدەمەلى يندۋستريالاندىرۋ ەكونوميكانىڭ بولاشاقتاعى وسىمىنە عانا ەمەس, ەڭ باستىسى, قازاقستاندىقتاردىڭ ءال-اۋقاتىن ساپالىق تۇرعىدان ارتتىرۋعا دا ەلەۋلى نەگىز قالايدى. سوڭعى ەكى جىلدىڭ وزىندە قازاقستاندا 12 ميلليارد تەڭگە سوماسىندا 400-گە جۋىق ينۆەستيتسيالىق جوبا جۇزەگە اسىرىلىپ, 44 مىڭداي جۇمىس ورنى اشىلدى.
– جاڭا بەسىنشى سايلانىم دەپۋتاتتارى ءوز قىزمەتىنە كىرىسكەلى تۋرا ءبىر جىل ۋاقىت ءوتتى. ءماجىلىستىڭ جاڭا قۇرامى زاڭ شىعارۋ قىزمەتىنە بىردەن كىرىسىپ كەتتى. كوپپارتيالى پارلامەنتتىڭ العاشقى ايلارىندا قانداي ەرەكشەلىكتەر بايقالدى؟
– وزدەرىڭىز بىلەتىندەي, 2007 جىلى قازاقستان رەسپۋبليكاسىنىڭ كونستيتۋتسياسىنا ەنگىزىلگەن وزگەرىستەر مەن تولىقتىرۋلارعا سايكەس پارلامەنت ءماجىلىسى 107 دەپۋتاتتان تۇرادى. ولاردىڭ 98-ءى ساياسي پارتيالاردان ءبىرتۇتاس جالپى ۇلتتىق وكرۋگ بويىنشا جالپىعا بىردەي, تەڭ جانە توتە سايلاۋ قۇقىعى نەگىزىندە جاسىرىن داۋىس بەرۋ ارقىلى سايلانسا, 9-ى قازاقستان حالقى اسسامبلەياسىنان سايلانادى.
بەسىنشى شاقىرىلىمدا پارلامەنت ءماجىلىسىن «نۇر وتان» پارتياسىنان – 83 دەپۋتات, «اق جول» پارتياسىنان – 8 دەپۋتات, قكحپ-دان 7 دەپۋتات قۇرادى جانە قازاقستان حالقى اسسامبلەياسىنان 9 دەپۋتات جۇمىس ىستەيدى.
كوپپارتيالى پارلامەنتتىڭ ەرەكشەلىكتەرىنە توقتالساق, قازىرگى دەموكراتيالىق قوعامداعى پارتيانىڭ ماڭىزدى ءمىندەتى ازاماتتىق قوعام مەن مەملەكەتتىڭ اراسىنداعى بايلانىستى باياندى ەتۋ بولىپ تابىلادى. پارتيالار ارقىلى ءارتۇرلى الەۋمەتتىك توپتار جانە سايلاۋشىلار وزدەرىنىڭ ساياسي, الەۋمەتتىك تالاپتارىن مالىمدەيدى. الەۋمەتتىك-ەكونوميكالىق ساياساتتى ودان ءارى جەتىلدىرۋ جانە مەملەكەت باسشىسىنىڭ تاپسىرمالارىنا سايكەس جاڭا وزگەرىستەر ەنگىزۋ كەرەكتىگى جونىندە وزدەرىنىڭ كوزقاراستارىن بىلدىرەدى. مىنە, ءار پارتيا پارلامەنت قابىرعاسىندا وسى باعىتتا جۇمىستار اتقارادى.
پالاتانىڭ بەسىنشى شاقىرىلىمىنىڭ دەپۋتاتتارى ءبىلىمى بويىنشا ينجەنەرلەر, پەداگوگتار, زاڭگەرلەر, ەكونوميستەر, اۋىل شارۋاشىلىعى جانە ت.ب. سالا ماماندارىنان قۇرالعان. ياعني, پارلامەنتكە ومىردەن تۇيگەندەرى مول, حالىقپەن تىعىز جۇمىس ىستەي بىلەتىن ءبىلىمدى ازاماتتار كەلدى دەپ ايتۋىما بولادى. 2007 جىلى كونستيتۋتسياعا ەنگىزىلگەن تولىقتىرۋلار مەن وزگەرىستەر پارتيالىق جۇيە دامۋىنىڭ جاڭا كەزەڭىن قالىپتاستىردى, وسىعان سايكەس مەملەكەتتەگى ساياسي پارتيالاردىڭ رولدەرى مەن مارتەبەلەرى ارتۋدا.
تاۋەلسىزدىگىن العالى بەرى جاس مەملەكەتىمىز ساياسي پارتيالار قىزمەتىنە ەرەكشە ءمان بەرۋدە. دەموكراتيالىق قوعام قالىپتاسۋىنىڭ ءمىندەتتى سەگمەنتى رەتىندە كوپپارتيالىق دامىتىلدى. سونىمەن قاتار, مەملەكەتىمىز قوعامدىق كەلىسىمگە جانە ەتنوسارالىق تاتۋلىققا جات پيعىلداعىلاردىڭ بىردەن جولىن كەسىپ, ساياسي تۇراقتىلىق ساياساتى شەڭبەرىندە قىزمەت ەتەتىن پارتيالار عانا رەسمي تانىلدى. قازاقستاندا ۇلتشىلدىق, سەپاراتيستىك, ەكسترەميستىك ساياسي باعىتتاعى ۇيىمدار ءوز قىزمەتتەرىن باستاي دا المادى.
اتا زاڭىمىزدىڭ ەلدەگى ساياسي رەفورمالارعا عانا ەمەس, ساياسي پارتيالارعا دا زاڭدىق كەڭىستىكتە قىزمەت ەتۋىنە جاعداي تۋعىزىپ وتىرعاندىعىنا قازىر بارلىعىمىز كۋامىز. سونداي-اق, كونستيتۋتسيالىق ەرەجەلەر ساياسي پارتيالاردىڭ قازاقستاندىق ىشكى ساياسي احۋالعا بايلانىستى قۇرىلۋىن جانە دامۋىن قىسقا مەرزىم ىشىندە قامتاماسىز ەتتى. جاس مەملەكەتتىڭ جاڭا ساياسي پارتيالارى جۇيەلى ومىرگە كەلىپ, مىنە, قازىرگى تاڭدا زاڭ شىعارۋ فۋنكتسياسىن جۇزەگە اسىراتىن رەسپۋبليكانىڭ ەڭ جوعارى وكiلدi ورگانى – پارلامەنت قابىرعاسىندا ەلدىڭ ەكونوميكاسىنا, ساياساتىنا جانە الەۋمەتتىك قاتىناستارىنا ىقپال جاساي باستاعانىنا بارلىعىمىز كۋا بولىپ وتىرمىز. ءىرى ساياسي پارتيالار بيلىك ءۇشىن عانا كۇرەسىپ قويماي, ەلدەگى ساياسي تۇراقتىلىقتىڭ جانە ەتنوسارالىق كەلىسىمنىڭ بەرىك بولا تۇسۋىنە دە قىزمەت ەتۋدە.
– جاڭا ءوزىڭىز ايتقانداي, ءماجىلىستىڭ قۇرامى ءۇش پارتيانىڭ جانە قازاقستان حالقى اسسامبلەياسىنىڭ وكىلدەرىنەن تۇرادى. ال ءوزىڭىز باسشىلىق جاسايتىن ەكونوميكالىق رەفورما جانە وڭىرلىك دامۋ كوميتەتىنىڭ قۇرامى قانداي؟ «نۇر وتاننان» وزگە پارتيالاردىڭ وكىلدەرى بار ما؟
– ارينە, بار. كوميتەتتە ءوزىمدى قوسا ەسەپتەگەندە 14 دەپۋتات بولسا, ۇشەۋى «اق جول» پارتياسىنان, بىرەۋى قكحپ-دان جانە ءبىر دەپۋتات قازاقستان حالقى اسسامبلەياسىنان, ال قالعان 10-ى «نۇر وتان» حدپ-دان. بىراق بولىنبەيمىز, بارلىعىمىزدىڭ دا ماقساتىمىز – حالىق ءۇشىن قىزمەت جاساۋ.
– ءسىز جەتەكشىلىك ەتەتىن كوميتەت ارقىلى قانداي زاڭ جوبالارى تالقىلاۋدان ءوتتى؟ سونىڭ ىشىندە ەڭ ماڭىزدىلارى قايسى؟
– پرەزيدەنت نۇرسۇلتان نازارباەۆ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى باعدارلامالىق ماقالاسىندا پارلامەنتكە تاياۋداعى سەسسيالار كەزىندە نەعۇرلىم قاجەت ەتىلەتىن زاڭدىق اكتىلەردى قاراعان ءجون بولادى دەگەن. مۇندا جاڭا زاڭداردىڭ ءتيىستى ماسەلەلەردى كەشەندى شەشۋىن, ولاردىڭ تىكەلەي ارەكەت ەتۋىن, قازاقستاندىقتاردىڭ كۇتكەن ۇمىتتەرىنە سايكەس كەلۋىن, حالىقتىڭ ءومىرىن قولايلى دا ىڭعايلى ەتۋىن, بارىنە تۇسىنىكتى دە قولجەتىمدى بولۋىن ەرەجە ەسەبىندە باسشىلىققا الۋ كەرەكتىگىن اتاپ كورسەتكەن.
پارلامەنت ءماجىلىسى بەسىنشى شاقىرىلىمىنىڭ دەپۋتاتتارى ءوز جۇمىسىن 2012 جىلدىڭ قاڭتار ايىنان باستادى. وسى مەرزىم ىشىندە ەكونوميكالىق رەفورما جانە وڭىرلىك دامۋ كوميتەتىنىڭ قاراۋىنا 15 زاڭ جوباسى الىندى, ونىڭ 12-ءسىن قازاقستان رەسپۋبليكاسىنىڭ ۇكىمەتى ءازىرلەگەن بولسا, ۇشەۋىنە پارلامەنت ءماجىلىسىنىڭ دەپۋتاتتارى باستاماشىلىق جاساعان. قازىرگى ۋاقىتتا كوميتەتتە 4 زاڭ جوباسى قارالۋدا.
جالپى, زاڭداردىڭ ءبىرەۋى ماڭىزدى, ال ەكىنشىسى ماڭىزسىز دەپ بولۋگە بولمايدى. سەبەبى, ءبارىنىڭ دە قوعامىمىز ءۇشىن وزىندىك الار ورنى, اتقاراتىن قىزمەتى بار. سوندىقتان قابىلدانىپ جاتقان زاڭداردىڭ بارلىعى ازاماتتارىمىزدىڭ الەۋمەتتىك جاعدايلارىن جاقسارتۋدى, بيزنەس ورتاسىندا بەلسەندىلىكتى ىنتالاندىرۋدى كوزدەيدى, وسى ماقساتتا بارلىق شارالار جاسالۋدا. باستى ماقسات – بيزنەس ءۇشىن اكىمشىلىك كەدەرگىلەردى تومەندەتۋ جانە ناقتى اشىق راسىمدەردى قۇرۋ, ادال كاسىپكەرلەردىڭ قاۋىپسىزدىگىن كەپىلدەندىرۋ, باسەكەگە قابىلەتتى وندىرىستەردىڭ ءوسۋى مەن جاڭا جۇمىس ورىندارىنىڭ اشىلۋىن, يكەمى بار جاڭا بيزنەس باستامالارىن ىنتالاندىرۋ, سونداي-اق, ىستەپ تۇرعان وندىرىستەردى قولداۋ.
– ماجىلىستە قوعامداعى كوكەيكەستى ماسەلەلەر بويىنشا ۇكىمەت ساعاتتارى ءوتىپ تۇرادى. ونى وتكىزۋ مىندەتى سالا بويىنشا ءار كوميتەتكە جۇكتەلەتىنى بەلگىلى. ءوزىڭىز باسقارىپ وتىرعان كوميتەتتىڭ اتسالىسۋى ارقىلى وتكەن ۇكىمەت ساعاتتارىندا قانداي ماسەلەلەر كوتەرىلدى؟ سونىڭ نەگىزىندە ۇكىمەتكە قانداي ۇسىنىستار جولداندى؟
– جالپى, بەسىنشى سايلانعان پارلامەنت ءماجىلىسىنىڭ دەپۋتاتتارى ءوز جۇمىستارىنا كىرىسكەلى بەرى 16 ۇكىمەت ساعاتى ءوتتى. ونىڭ جەتەۋىنە ءبىزدىڭ كوميتەت جاۋاپتى بولدى. ۇكىمەت ساعاتىندا مينيسترلەر مەن اگەنتتىك توراعالارىنىڭ باياندامالارى تىڭدالدى. ۇكىمەت ساعاتىنىڭ قورىتىندىسى بويىنشا پارلامەنت ءماجىلىسىنىڭ ۇسىنىستارى جولداندى. مىسالى, 2012 جىلدىڭ 15 قازانىندا دەپۋتاتتار الدىندا باسەكەلەستىكتى قورعاۋ اگەنتتىگىنىڭ توراعاسى «قازاقستان رەسپۋبليكاسى باسەكەلەستىكتى قورعاۋ اگەنتتىگى قىزمەتىنىڭ نەگىزگى باعىتتارى» دەگەن تاقىرىپتا بايانداما جاسادى.
بايانداماشى باسەكەلەستىكتى قورعاۋ اگەنتتىگىنىڭ 2012 جىلى اتقارعان جۇمىسى تۋرالى باياندادى. ۇكىمەت ساعاتىنىڭ قورىتىندىسى بويىنشا ءماجىلىس دەپۋتاتتارىمەن ۇكىمەتكە ۇسىنىس جولدانىپ, وندا جىلۋمەن جابدىقتاۋدىڭ, ۇيالى بايلانىس وپەراتورلارىنىڭ جەلىارالىق قوسىلىستارىنىڭ قىزمەتتەرىنە, سونداي-اق ينتەرنەت قىزمەتتەرىنە تاريفتەردى ازايتۋ ماقساتىندا رەسپۋبليكانىڭ جىلۋ-ەنەرگەتيكا, اقپاراتتىق-كوممۋنيكاتسيا سالالارىن باسەكەلەس نارىققا ودان ءارى بەرۋ تۋرالى, وڭىرلەردىڭ ازىق-ت ۇلىك, اۋىل شارۋاشىلىعى تاۋارلارىمەن قامتاماسىز ەتىلۋىنە جانە باسەكەگە قابىلەتتى بولۋىنا جاعداي جاساۋ, قازاقستان بيزنەسىنىڭ رەسەي جانە بەلارۋس نارىقتارىنا كىرۋىنە قويىلاتىن اكىمشىلىك كەدەرگىلەردى جويۋ بويىنشا ودان ءارى شارالار قابىلداۋ جانە ادال باسەكەلەستىككە دەگەن ءبىردەي كوزقاراستاردى, بىرىڭعاي قاعيداتتار مەن قاعيدالاردى (ستاندارتتاردىڭ, تاۋارلاردى تاڭبالاۋدىڭ ساقتالۋى, ۆەتەرينارلىق-سانيتارلىق شارالاردىڭ قولدانىلۋى, تاۋارلاردىڭ ءترانزيتى جونىندەگى جانە باسقا دا تالاپتار) قامتاماسىز ەتۋ جونىندە جانە وسى سياقتى حالىقتىڭ الەۋمەتتىك جاعدايىن دۇرىستاۋ باعىتىندا ماسەلەلەر قويىلدى.
– سايلاۋشىلارمەن بايلانىسىڭىز قانداي دەڭگەيدە؟ وڭىرلەرگە شىققاندا اۋىلدىقتاردىڭ جاي-كۇيىمەن جان-جاقتى تانىسا الدىڭىز با؟
– سايلاۋشىلارمەن بايلانىسىم جاقسى. سەبەبى, مەن تەك جۇمىس بارىسىندا عانا ەمەس, ەڭبەك دەمالىسىمدا دا ۋاقىت تاۋىپ قالا جانە اۋىل تۇرعىندارىمەن كەزدەسىپ, اڭگىمەلەسىپ تۇرامىن. وڭىرلەرگە شىققان كەزىمدە, ارينە, اۋىل تۇرعىندارىنىڭ جاي-كۇيىمەن تانىسامىن. ويتكەنى, بۇل مەنىڭ جۇمىس باعىتىمنىڭ ءبىرىنشى ماقساتى بولىپ تابىلادى. ارقايسىسىمەن جەكە-دارا سۇحباتتاسىپ, پروبلەمالارىن تىڭداپ, ولاردى بارىنشا سول جەرگىلىكتى جەردە شەشۋگە تىرىسامىن.
قازاقستان رەسپۋبليكاسىنىڭ پرەزيدەنتى – ەلباسى نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىن ءتۇسىندىرۋ جونىندەگى پارلامەنت ءماجىلىسىنىڭ ءىس-شارا جوسپارىنا سايكەس قاڭتار ايىنىڭ ورتاسىندا پاۆلودار وبلىسىنىڭ تۇرعىندارىمەن كەزدەسىپ, جولداۋ بويىنشا حالىق اراسىندا ۇگىت-ناسيحات جانە كەڭىنەن ءتۇسىندىرۋ جۇمىستارىن جۇرگىزىپ كەلدىم.
اڭگىمەلەسكەن سامات مۇسا,
«ەگەمەن قازاقستان».
