ەكىجاقتى ىقپالداستىققا ەكپىن بەرگەن ساپار
سارسەنبى, 6 اقپان 2013 7:27
قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ ءوزىنىڭ گەرمانيالىق ارىپتەسى, فەدەرالدى سىرتقى ىستەر ءمينيسترى گيدو ۆەستەرۆەللەنىڭ شاقىرۋى بويىنشا رەسمي ساپارمەن گفر-دا بولدى. ساپار اياسىندا قازاقستاندىق سىرتقى ساياسات ۆەدومستۆوسىنىڭ باسشىسى گفر ساياسي جانە ىسكەر توپتارىنىڭ وكىلدەرىمەن بىرقاتار ەكىجاقتى كەزدەسۋلەر وتكىزدى, دەپ حابارلادى قر ءسىم-ءىنىڭ ءباسپاسوز قىزمەتى.
سارسەنبى, 6 اقپان 2013 7:27
قازاقستان رەسپۋبليكاسىنىڭ سىرتقى ىستەر ءمينيسترى ەرلان ىدىرىسوۆ ءوزىنىڭ گەرمانيالىق ارىپتەسى, فەدەرالدى سىرتقى ىستەر ءمينيسترى گيدو ۆەستەرۆەللەنىڭ شاقىرۋى بويىنشا رەسمي ساپارمەن گفر-دا بولدى. ساپار اياسىندا قازاقستاندىق سىرتقى ساياسات ۆەدومستۆوسىنىڭ باسشىسى گفر ساياسي جانە ىسكەر توپتارىنىڭ وكىلدەرىمەن بىرقاتار ەكىجاقتى كەزدەسۋلەر وتكىزدى, دەپ حابارلادى قر ءسىم-ءىنىڭ ءباسپاسوز قىزمەتى.
ساپار باعدارلاماسىن ەلىمىزدىڭ ديپلوماتيا ۆەدومستۆوسى باسشىسىنىڭ گەرمانيا بۋندەستاگىنىڭ ءتۇرلى پارتيالىق فراكتسيالارىنىڭ وكىلدەرىمەن كەزدەسۋى اشتى. وندا ەكىجاقتى قارىم-قاتىناستىڭ ماڭىزدى باعىتتارى تالقىلانىپ, حالىقارالىق قاتىناستاردىڭ وزەكتى ماسەلەلەرى بويىنشا پىكىر الماسىلدى. گەرمانيالىق دەپۋتاتتار قازاقستاننىڭ ورتالىق ازياداعى ماڭىزدى ءرولىن اتاي وتىرىپ, ەلباسىنىڭ «قازاقستان-2050» ستراتەگياسىندا جوسپارلانعان باسىمدىقتارعا جوعارى باعالارىن بەردى.
ە.ىدىرىسوۆتىڭ گفر ۆيتسە-كانتسلەرى – ەكونوميكا جانە تەحنولوگيالار فەدەرالدى مينيسترى فيليپپ رەسلەرمەن كەلىسسوزدەرى بارىسىندا ەكىجاقتى ساۋدا-ەكونوميكالىق, ينۆەستيتسيالىق جانە تەحنولوگيالىق ىنتىماقتاستىق جونىندە كەڭىنەن پىكىر الماسىلدى. قازاقستان باسشىسى نۇرسۇلتان نازارباەۆتىڭ 2012 جىلعى اقپان ايىندا بەرلينگە جاساعان ساپارى كەزىندە قول جەتكىزىلگەن ۋاعدالاستىقتاردى جۇزەگە اسىرۋعا قاتىستى ماسەلەلەر تالقىعا سالىندى.
فەدەرالدى كانتسلەردىڭ سىرتقى ساياسات جانە قاۋىپسىزدىك جونىندەگى كەڭەسشىسى كريستوف حويسگەنمەن اڭگىمە بارىسىندا ەكىجاقتى قارىم-قاتىناس جانە حالىقارالىق ىنتىماقتاستىق ماسەلەلەرى قوزعالدى. اۋعانستانداعى جانە تاياۋ شىعىستاعى جاعدايدى رەتتەۋگە, لاڭكەستىكپەن جانە ەكسترەميزممەن كۇرەسۋگە, ەۋروپاداعى داعدارىسقا, سونىمەن قاتار, قر مەن ەو اراسىنداعى ىقپالداستىققا ەرەكشە نازار اۋدارىلدى. كەزدەسۋ سوڭىندا ك.حويسگەن گفر كانتسلەرى انگەلا مەركەلدىڭ اتىنان قازاقستان باسشىسىنا ەڭ جاقسى سوزدەرىن سالەممەن جەتكىزۋدى سۇرادى.
قر-گفر ستراتەگيالىق ىنتىماقتاستىق جونىندەگى ىسكەرلىك كەڭەسىنىڭ تورالقا مۇشەسى, گفر ەكونوميكا جانە تەحنولوگيالار ءمينيسترىنىڭ ورىنباسارى ۆەرنەر رەسسينگپەن جانە ىسكەرلىك كەڭەستىڭ تەڭ-توراعاسى, «Deutsche Bank» بانكىنىڭ اتقارۋشى ديرەكتورى پەتەر تيلسپەن كەزدەسۋلەر اياسىندا ەكى ەلدىڭ اراسىندا ساۋدا-ەكونوميكالىق جانە ينۆەستيتسيالىق ىقپالداستىقتى كەڭەيتۋ ماسەلەلەرى قاراستىرىلدى.
قازاقستان ەلشىلىگىنىڭ گەرمانيا استاناسىنداعى جاڭا عيماراتىندا وتكەن كەزدەسۋدەن كەيىن ءبىرقاتار ماڭىزدى ەكىجاقتى ەكونوميكالىق كەلىسىمدەرگە قول قويىلدى.
سوڭعى ۋاقىتتارى قازاقستان مەن گەرمانيا اراسىنداعى ەكىجاقتى ەكونوميكالىق قارىم-قاتىناستار ۇدەمەلى قارقىنمەن دامىپ كەلە جاتقانىن اتاپ ءوتۋ قاجەت. 2011 جىلدىڭ قورىتىندىسى بويىنشا ءوزارا تاۋار اينالىمى داعدارىسقا دەيىنگى كورسەتكىشتەرگە جەتىپ, 6,2 ملرد. ەۋرودان اسىپ ءتۇستى. بۇل ۇدەرىس وتكەن جىلدىڭ قورىتىندىسى بويىنشا دا تىركەلەدى دەپ كۇتىلۋدە. ماسەلەن, قازاقستان گفر-عا شيكى مۇناي جەتكىزۋشىلەر ۇشتىگىنە كىرەدى (وپەك ەلدەرىن ەسەپتەمەگەندە), ال قر مەن گفر اراسىنداعى تاۋار اينالىمىنىڭ جالپى ۇلەسى گەرمانيانىڭ بارلىق ورتالىق ازيا جانە وڭتۇستىك كاۆكاز ەلدەرىمەن سىرتقى ساۋداسىنىڭ 65%-ىنان اسىپ تۇسەدى.
ەلىمىز سىرتقى ىستەر مينيسترىنىڭ بەرلين ەۋرازيالىق كلۋبىنىڭ بەسىنشى وتىرىسىندا ءسوز سويلەۋى ساپاردىڭ ماڭىزدى بولىگى بولدى. ونىڭ جۇمىسىنا نەمىس تاراپىنان كورنەكتى ساياسي قايراتكەرلەر مەن ساراپشىلار, ىسكەر توپتار مەن باق وكىلدەرى قاتىستى. ەۋرازيالىق قاۋىپسىزدىك تاقىرىبىنداعى بايانداماسىندا قازاقستاندىق مينيستر ءبىزدىڭ ەلىمىزدىڭ جاھاندىق جانە وڭىرلىك قاۋىپسىزدىك, ەۋرازيالىق ينتەگراتسيا ماسەلەلەرىندەگى ۇستانىمدارىن جەتكىزىپ, بەك جۇمىسىنا مۇحيتتىڭ ارعى جاعىنداعى جانە پوستكەڭەستىك ساراپشىلار قوعامداستىعىن شاقىرۋ ارقىلى ءوزارا ىقپالداسۋ ديالوگىن كەڭەيتۋدى ۇسىندى. ءىس-شارا سوڭىندا قىزۋ پىكىر الماسۋ ورىن الدى.
بەرلين ەۋرازيالىق كلۋبىنىڭ پرەزيدەنت ن.نازارباەۆتىڭ باستامالارىن جۇزەگە اسىرۋ اياسىندا قر مەن گفر, سونداي-اق ەو اراسىنداعى قوعامدىق-ساياسي ماسەلەلەردىڭ كەڭ اۋقىمىن تالقىلاۋعا ارنالعان ۇنقاتىسۋ الاڭى رەتىندە قۇرىلعانى بەلگىلى. كلۋب قازاقستاننىڭ وسى ىڭعايداعى ەۋروپاداعى العاشقى جوباسى بولىپ تابىلادى. ول جاڭا مۇمكىندىكتەردى زەرتتەۋگە, ەۋروپالىق جانە ازيالىق ءمادەنيەتتەر اراسىنداعى ءۇنقاتىسۋدى نىعايتۋعا باعىتتالعان.
قازاقستاندىق مينيستر سونداي-اق گەرمانيا ەكونوميكاسى شىعىس كوميتەتىنىڭ توراعاسى ە.كوردەسپەن جانە بيزنەس وكىلدەرىمەن كەزدەسۋ وتكىزدى. كەزدەسۋلەر شەڭبەرىندە ەكونوميكالىق ىنتىماقتاستىقتى ءارى قاراي دامىتۋ مەن نىعايتۋدىڭ جاي-جاپسارى, سونىمەن قاتار, قازاقستان باسشىسىنىڭ گەرمانيانىڭ ەكونوميكالىق جانە تەحنولوگيالىق الەۋەتىن ەسكەرە وتىرىپ ارىپتەستىكتى ىلگەرىلەتۋ تۋرالى تاپسىرماسىن ىسكە اسىرۋ ماسەلەلەرى تالقىلاندى.
گەرمانيا استاناسىنداعى ساپارىنىڭ سوڭعى كۇنىندە ە.ىدىرىسوۆ گفر سىرتقى ىستەر فەدەرالدى ءمينيسترى گيدو ۆەستەرۆەللەمەن كەلىسسوز جۇرگىزىپ, ساياسي, ساۋدا-ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ باسىم باعىتتارى مەن قازىرگى جاعدايىن قاراستىردى. تاراپتار حالىقارالىق بىرلەستىكتەر شەڭبەرىندەگى ءوزارا ىقپالداستىق ءجونىندە پىكىر الماسىپ, قازىرگى تاڭداعى حالىقارالىق قارىم-قاتىناستاردىڭ وزەكتى ماسەلەلەرىن قوزعادى.
كەزدەسۋ قورىتىندىسى بويىنشا قر مەن گفر ديپلوماتيا ۆەدومستۆولارىنىڭ باسشىلارى ەكى ەلدىڭ سىرتقى ساياسات ۆەدومستۆولارى اراسىنداعى ىنتىماقتاستىقتى كەڭەيتۋگە باعىتتالعان بىرلەسكەن دەكلاراتسياعا قول قويدى.
ساپار شەڭبەرىندە ە.ىدىرىسوۆتىڭ قاۋىپسىزدىك ماسەلەلەرى ءجونىندەگى حالىقارالىق كونفەرەنتسياعا قاتىسقانى ءمالىم.
