«اشىق ەسىك» كۇنىندە وزەكتى ماسەلەلەر ايتىلدى
سەنبى, 4 مامىر 2013 1:59
«قازاگروفينانس» اكتسيونەرلىك قوعامى ورتالىق اپپاراتىنىڭ ماماندارى اۋىل شارۋاشىلىعى تاۋارلارىن ءوندىرۋشىلەر ءۇشىن «اشىق ەسىك كۇنىن» وتكىزدى. ەلىمىزدىڭ ءىرى استىقتى جانە مال, قۇس شارۋاشىلىقتارىن دامىتۋدا دا مۇمكىندىگى جوعارى ءوڭىر بولعاندىقتان «قازاگروفينانس» اكتسيونەرلىك قوعامى «اشىق ەسىك كۇنىن» وتكىزۋگە اقمولا مەن سولتۇستىك قازاقستان وبلىستارىنان كەيىن ءۇشىنشى بولىپ قوستاناي وبلىسىنا اتباسىن بۇردى.
سەنبى, 4 مامىر 2013 1:59
«قازاگروفينانس» اكتسيونەرلىك قوعامى ورتالىق اپپاراتىنىڭ ماماندارى اۋىل شارۋاشىلىعى تاۋارلارىن ءوندىرۋشىلەر ءۇشىن «اشىق ەسىك كۇنىن» وتكىزدى. ەلىمىزدىڭ ءىرى استىقتى جانە مال, قۇس شارۋاشىلىقتارىن دامىتۋدا دا مۇمكىندىگى جوعارى ءوڭىر بولعاندىقتان «قازاگروفينانس» اكتسيونەرلىك قوعامى «اشىق ەسىك كۇنىن» وتكىزۋگە اقمولا مەن سولتۇستىك قازاقستان وبلىستارىنان كەيىن ءۇشىنشى بولىپ قوستاناي وبلىسىنا اتباسىن بۇردى. وعان قارجى الىپ, ۇلكەن جوبالاردى جۇزەگە اسىرىپ جاتقان نەمەسە «قازاگروفينانس» ارقىلى تەحنيكا پاركىن جاڭارتقاندار جينالدى. كوپتەگەن ماسەلەلەر وسىندا تالقىلاندى. بۇگىندە اۋىل شارۋاشىلىعى تاۋارلارىن ءوندىرۋشىلەر نەسيەنى 6 پايىز عانا ۇستەمەمەن بەرەتىن وسى قارجى ينستيتۋتىنىڭ تيىمدىلىگىن سەزىنىپ وتىر. قازىر اۋىل شارۋاشىلىعى سالاسىن سەرپىندى دامىتۋ تەحنيكاسىز, اسىل تۇقىمدى مالسىز جانە وزىق تەحنولوگياسىز مۇمكىن ەمەس. ولارعا قارجى ارقىلى عانا قول جەتكىزە الاتىنى تاعى بەلگىلى. رەسپۋبليكا ۇكىمەتى بەكىتكەن ون ءتورت باعىتتا جۇمىس ىستەيتىن «قازاگروفينانس» ىسكە كىرىسكەلى قوستاناي وبلىسىندا دا 8,1 ميلليارد تەڭگەگە قارجىلاندىرىلعان ءىرى يننوۆاتسيالىق-ينۆەستيتسيالىق جوبالار جۇزەگە اسىپ كەلەدى. مىسالى, ساتىلاپ جۇزەگە اسقان «سادچيكوۆ», «سارىاعاش» تاۋارلى ءسۇت فەرمالارىن, قۇس فابريكالارىن, تاعى باسقا شارۋاشىلىقتاردى تىزۋگە بولادى. ەلىمىزدە «قازاگروفينانس» قارجىسىمەن شەتەلدەن اكەلىنگەن اسىل تۇقىمدى ءىرى قارانىڭ قوماقتى ۇلەسى قوستاناي وبلىسىنا تيەسىلى. ول بارلىق كولەمنىڭ 25 پايىزىنا يە, ياعني 4018 باس ءىرى قارا اكەلىنگەن. شەتەلگە استىق پەن ەت, قۇس ەتىن ەكسپورتتاۋ ماسەلەسىن دە وسىنداي شارۋاشىلىقتار شەشەدى. قارجىلاندىرۋدىڭ باستى ماقساتى دا وسى. «قازاگروفينانس» اكتسيونەرلىك قوعامى ورتالىق اپپاراتىنىڭ باسشىلارى مەن جەتەكشى ماماندارىنىڭ ديقاندار مەن مالشىلارعا, ياعني وزدەرىنىڭ كليەنتتەرىنە جاقىن كەلىپ, ولاردى سۇحباتقا تارتۋىنىڭ سەبەبى بار. مىنە, سولتۇستىك استىقتى اۋدانداردا كوكتەمگى دالا جۇمىستارى باستالادى. ساپالى استىق ءوسىرۋ ءۇشىن وزىق تەحنولوگيا كەرەكتىگى ايتۋدى قاجەت ەتپەيتىن اكسيوماعا اينالعان. وزىق تەحنولوگيا – وزىق تەحنيكانى قاجەت ەتەدى. ەرتەڭگى جايقالعان ەگىن, التىن استىق بۇگىنگى جەر وڭدەۋدەن باستالادى. «قازاگروفينانسقا» جىل باسىنان بەرى وبلىستان بارلىعى 1,5 ميلليارد تەڭگەنى قۇرايتىن 157 ءوتىنىش ءتۇسۋى وسىنىڭ ايعاعى دەسەك بولادى. دەگەنمەن, قارجى الاتىنداردى ويلانتاتىن ماسەلەلەر دە جوق ەمەس. سوندىقتان, «اشىق ەسىكتە» قارجىگەر ماماندار اۋىل شارۋاشىلىعى تاۋارلارىن وندىرۋشىلەردىڭ – كليەنتتەرىنىڭ پىكىرىن, ۇسىنىستارىن تىڭدادى, ولارمەن اشىق سۇحبات بولدى. «قازاگروفينانس» قىزمەتىن پايدالانۋشىلار تاراپىنان, ەڭ الدىمەن, نەسيە الۋ ءۇشىن ۇسىناتىن قۇجاتتار ءتىزىمىنىڭ كوپتىگى ءجونىندەگى پىكىرلەر ءجيى ايتىلدى. ليزينگتىك نەگىزدە الىنعان اۋىل شارۋاشىلىعى تەحنيكالارىنا ونى جەتكىزۋشى كومپانيالار تاراپىنان كەپىلدىك قىزمەت كورسەتۋدىڭ جوقتىعى شارۋالار ءۇشىن جىل وتكەن سايىن وتكىرلەنىپ بارا جاتقان ماسەلە. شەتەلدەن الىپ كەلگەن تەحنيكالاردىڭ قوسالقى ءبولشەكتەرىن تابۋ دا وڭاي ەمەس ءارى قىمبات, سىنسا ونى جوندەپ, ىسكە قوسۋ ءتىپتى قيىن. ال ناۋقاندىق جۇمىس كەزىندە ءار ساعات قىمبات.
– ارينە, اۋىل شارۋاشىلىعى تاۋارلارىن وندىرۋشىلەر تاراپىنان كوتەرىلىپ وتىرعان دۇرىس ماسەلە. بىراق بۇل قارجى ءبىزدىڭ قۇزىرىمىزعا جاتپايدى. سوندا دا ءوزىمىزدىڭ ءمۇمكىندىگىمىزدى پايدالانىپ, ليزينگتىك كومپانيالارمەن وسى جونىندە دوڭگەلەك ۇستەلدەر وتكىزىپ, ءبىزدىڭ كليەنتتەر ايتقان ماسەلەلەردىڭ ناقتى ءتىزىمىن جاساپ, ولاردىڭ نازارىنا ۇسىنۋ كەرەك. بۇل ورايداعى اڭگىمەنىڭ تەحنيكا جەتكىزۋشى قانداي كومپانياعا, قانداي تەحنيكاعا, ونىڭ قانداي بولشەگىنە قاتىستى ەكەنىن ناقتىلاعان دۇرىس. استىق وسىرەتىن سولتۇستىك ايماقتارداعى «قازاگروفينانسپەن» جۇمىس ىستەپ وتىرعان 350 زاڭدى تۇلعا ءۇشىن مۇنداي ءىستىڭ شەشىمىن تابۋى ۇلكەن جەتىستىك بولادى, – دەدى «قازاگروفينانس» اكتسيونەرلىك قوعامىنىڭ باسقارما ديرەكتورى زاۋرەش شوكۋمانوۆا.
زاۋرەش نىعمەتقىزى مۇنداي ماسەلەلەر الداعى ۋاقىتتا جەتكىزۋشى كومپانيالارمەن كەلىسىم-شارت جاساماي تۇرىپ شەشىلەتىندىگىنەن حاباردار ەتتى جانە ولاردىڭ تەحنيكالارعا كەپىلدىك قىزمەت كورسەتۋ ماسەلەسى «نۇر وتان» حالىقتىق-دەموكراتيالىق پارتياسى تاراپىنان دا باقىلاناتىن بولادى. «اشىق ەسىك كۇنى» «قازاگروفينانس» جەتەكشىلەرى مەن ماماندارى جانە اۋىل شارۋاشىلىعى تاۋارلارىن وندىرۋشىلەر كوكتەمگى دالا جۇمىستارىنا دايىندىق, قوستاناي وبلىسىنداعى اۋىل شارۋاشىلىعى كەشەنىن ينۆەستيتسيالاۋ, نەسيەنىڭ ۇستەمە پايىزىن ازايتۋ, سۋبسيديالاۋ, شەتەلدەن تەحنيكا اكەلۋ مەن وعان سالىناتىن سالىق نەگىزدەرى جانە اسىل تۇقىمدى مال اكەلۋ مەن ونىڭ اۋرۋلارىنا قاتىستى جاعدايلار تۋرالى ماسەلەلەردى ورتاعا سالدى. سونداي-اق, «اشىق ەسىك» اياسىندا قارجىگەرلەر جۋرناليستەرمەن ءباسپاسوز ءماسليحاتىن وتكىزىپ, ولاردىڭ كوپتەگەن ساۋالدارىنا جاۋاپ بەردى. «قازاگروفينانس» اكتسيونەرلىك قوعامىنىڭ وزگە قارجىلاندىرۋ ينستيتۋتتارىنان ايىرماشىلىعى تۋرالى ساۋالعا دا جاۋاپ الىندى. ءارينە, شارۋاشىلىقتارعا بەرگەن قارجىنىڭ جىلدىق ۇستەمەسىنىڭ تومەندىگى باستى ارتىقشىلىقتىڭ ءبىرى ەكەنىندە داۋ جوق. سونىمەن قاتار, قارجىلاندىرىلعان جوبانىڭ اياعىنان تىك تۇرىپ كەتۋىنە «قازاگروفينانس» ءمۇددەلى بولىپ وتىرادى. ونىڭ كەڭەستىك, ياعني ساراپشىلىق توبىنا وبلىستىق اكىمدىكتىڭ, «نۇر وتان» پارتياسىنىڭ جانە ءماسليحاتتار وكىلدەرىنىڭ ەنگىزىلۋى ونىڭ ەكونوميكانىڭ, سول ارقىلى مەملەكەتتىڭ دامۋىن الدىڭعى ورىنعا قوياتىنىن كورسەتەدى.
ءنازيرا جارىمبەتوۆا,
«ەگەمەن قازاقستان».
قوستاناي.
