اكتسيا اياسىندا نۇر-سۇلتان قالاسىنداعى ەتنومادەني بىرلەستىكتەردىڭ شىعارماشىلىق توبى ەلورداداعى بۇرىنعى قارتتار ءۇيى, قازىرگى الەۋمەتتىك قىزمەت كورسەتۋ ورتالىعىنداعى قارتتارعا ارناپ كونتسەرت قويىپ, ارنايى داستارحان جايدى. وندا مۇمكىندىگى شەكتەۋلى جانە ءتۇرلى قيىن جاعدايلارعا تاپ بولعان ادامدار تۇرادى. قوعام تاراپىنان ولارعا مەيىرىم شۋاعى مەن جۇرەك جىلۋىن سىيلاۋ ءاردايىم ماڭىزدى. «شاراپات» الەۋمەتتىك قىزمەت كورسەتۋ ورتالىعى ديرەكتورىنىڭ ورىنباسارى ارداق سەيىتوۆانىڭ ايتۋىنشا قارتتارعا مۇنداي قۇرمەت مەملەكەتتىك مەكەمەلەر, جەكە كومپانيالار جانە بالاباقشالار تاراپىنان ءجيى كورسەتىلىپ تۇرادى ەكەن. «ولار وسى كىسىلەردىڭ كوڭىلىن كوتەرىپ, قالانىڭ سىرتىنداعى دەمالىس ورىندارىنا دا شاقىرىپ وتىرادى», دەيدى ول.
قارتتارمەن جىلى جۇزدەسۋدە ءسوز العان نۇر-سۇلتان قالاسى قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا ءىس-شارانىڭ بەيبىتشىلىك پەن كەلىسىمنىڭ ۇلگىسىن كورسەتىپ, ۇلكەندەرگە كوتەرىڭكى كوڭىل كۇي سىيلاۋدى كوزدەيتىنىن اتاپ ءوتتى. كەزدەسۋگە كەلگەن «قوعامدىق كەلىسىم» كمم ديرەكتورى نۇرالى ايداشەۆ «سىزدەردىڭ ارالارىڭىزدا قازاقستاندى قۇرۋعا اتسالىسقان قۇرمەتتى ازاماتتار بار. ومىرلەرىڭىز – وتانعا قىزمەت ەتۋدىڭ ۇلگىسى. سوندىقتان وزدەرىڭىزگە تەك باسىمدى ءيىپ, راحمەت ايتامىن. بارلىقتارىڭىزدى دوستىق ۇيىندە اشىلعان «انالار اماناتى» كورمەسىنە شاقىرامىن», دەدى.
قحا ۇيىتقى بولعان قايىرىمدىلىق ءىس-شاراسى جىل سايىن جالعاسىن تاۋىپ كەلەدى. كەزدەسۋ سوڭىندا ۇيىمداستىرۋشىلار قارتتارعا ءتۇرلى سىيلىقتار تارتۋ ەتتى.
