• 23 اقپان, 2013

جاڭعىرتۋ جۇمىستارى جان-جاقتى جۇرگىزىلۋدە

372 رەت

كورسەتىلدى

17 مين

وقۋ ءۇشىن

Egemen Qazaqstan

جاڭعىرتۋ جۇمىستارى جان-جاقتى جۇرگىزىلۋدە

سەنبى, 23 اقپان 2013 7:23

مەملەكەت باسشىسى نۇرسۇلتان نازارباەۆتىڭ «قازاقستان-2050» ستراتەگياسى – قالىپتاسقان مەملەكەتتىڭ جاڭا ساياسي باعىتى» جولداۋىنداعى باسىم باعىتتاردىڭ ءبىرى – پايدا الۋ, ينۆەستيتسيالار مەن باسەكەگە قابىلەتتىلىكتەن قايتارىم الۋ پرينتسيپىنە نەگىزدەلگەن ەكونوميكالىق پراگماتيزم. وتاندىق ەكونوميكانىڭ دامۋىنا سۇبەلى ۇلەس قوسىپ وتىرعان قازاقستاندىق كومپانيالار ءوز شەشىمدەرىن تۇگەلدەي ەكونوميكالىق ماقساتتىلىق جانە ۇزاق مەرزىمدى مۇددەلەر تۇرعىسىندا قابىلداۋى قاجەت. ەلىمىزدەگى ءىرى وتاندىق مۇناي كومپانياسى – «قازمۇنايگاز» بارلاۋ ءوندىرۋ» اق باسشىسى ابات نۇرسەيىتوۆپەن وسى تاقىرىپتا اڭگىمەلەسكەن ەدىك.

سەنبى, 23 اقپان 2013 7:23

– ابات اقمۇقان ۇلى, ءسىز باسقارىپ وتىرعان كاسىپورىننىڭ الدىندا تۇرعان ءمىندەتتەر تۋرالى ايتا كەتسەڭىز. پرەزيدەنت جولداۋىنىڭ نەگىزگى تۇجىرىمدارىن جۇزەگە اسىرۋ باعىتىندا قانداي جۇمىستار اتقارىلىپ جاتىر؟
– پرەزيدەنت نۇرسۇلتان نازارباەۆ حالىققا ارناعان جولداۋىندا ەلىمىزدىڭ 2050 جىلعا دەيىنگى دامۋ ستراتەگياسىنىڭ باستى باعىتتارىن ايقىندادى. بۇل ستراتەگيالىق قۇجاتتى جۇزەگە اسىرۋ بىزگە ۇلكەن مىندەتتەر جۇكتەيدى.
جاڭا ەكونوميكالىق ساياساتتىڭ ءمانى جاپپاي قامتيتىن ەكونوميكالىق پراگماتيزم ەكەنىن ءبىز جاقسى تۇسىنەمىز. بۇل ءبىزدى شىن مانىندە بۇگىنگى كوزقاراستارىمىز بەن ۇستانىمدارىمىزدى تۇبەگەيلى وزگەرتۋگە باعىتتايدى. بارلىق ەكونوميكالىق جانە باسقارۋ شەشىمدەردى ەكونوميكالىق ماقساتتىلىق جانە ۇزاق مەرزىمدى مۇددەلەر تۇرعىسىندا قابىلداۋىمىز قاجەت.
وتكەن جىلى ءبىز ءوندىرىستى تەحنولوگيالىق جاڭعىرتۋ باعدارلاماسىن باستادىق. تەحنيكالىق قايتا جاراقتاندىرۋداعى ماقساتىمىز مۇناي ءوندىرۋدى ارتتىرۋ جانە جوبانىڭ ەكونوميكاسىن جاقسارتۋ. وسى ماقساتتا ءۇش جىلعا ارنالعان ءوندىرىستى جاڭعىرتۋ باعدارلاماسىن ازىرلەدىك. بۇعان جۇمسالاتىن جالپى ينۆەستيتسيا كولەمى 100 ملرد. تەڭگەدەن اسادى.
كومپانيا قولعا الىپ جانە ىسكە اسىرىپ جاتقان وزەندەگى وندىرىستىك قۋاتتىلىقتى جاڭعىرتۋ جونىندەگى جوبالار كولەمى جاعىنان تەڭدەسسىز. جاقىن ارادا ءبىز جاڭاوزەن قالاسىنان تمد ەلدەرىندە تەڭدەسى جوق جەراستى جابدىقتارىن جوندەۋ جانە دياگنوستيكالاۋ تسەحىن اشامىز. بۇل زاۋىت ىسكە قوسىلعاننان كەيىن «وزەنمۇنايگاز» اق جۇمىسكەرلەرىنىڭ قاتارىنان 300-350 ادام جۇمىس ىستەيتىن بولادى. جۇمىسكەرلەرگە قازىرگى زامانعا ساي قولايلى ەڭبەك جاعدايلارى جاسالادى.
ودان بولەك, «وزەنمۇنايگاز» اق مۇناي بازاسى, ۇڭعىمالاردى باستىرتۋعا ارنالعان سۇيىقتىق دايىنداۋ جونىندەگى ەكى ۋچاسكە, مۇناي كاسىپشىلىگى قۇرالدارىنا قىزمەت كورسەتۋ تسەحى, مۇناي قوندىرعىلارىن جوندەۋ تسەحى, 1000 بىرلىك اۆتوكولىك پەن ارناۋلى تەحنيكاعا قىزمەت كورسەتۋ ورتالىعى سالىنىپ, سۇيىقتىقتى جيناۋ جانە تاسىمالداۋ جۇيەسى مەن شوعىرلانعان سوراپتىق ستانسانىڭ قاباتىنا سۋ ايداۋ جۇيەسى قايتا جاراقتاندىرىلادى.
«ەمبىمۇنايگاز» اق-تا پرورۆا كەن ورىندارى توبىنان شىعاتىن ىلەسپە مۇناي گازىن كۇكىرتتەن تازالاۋ جونىندەگى قوندىرعى سالىنىپ, پرورۆا ورتالىق جيناۋ پۋنكتىنەن تەڭىز مۇناي ايداۋ ستانساسىنا دەيىن مۇناي قۇبىرى قايتا جاراقتاندىرىلادى. س.بالعىمباەۆ جانە شىعىس ماقات كەن ورىندارىندا ىلەسپە گازدى پايداعا اسىراتىن قوندىرعىنىڭ قۇرىلىسى اياقتالۋعا جاقىن. ۇزىندىعى 61 شاقىرىمدى قۇرايتىن اقىنگەن-اققۇدىق-قيسىمباي جوعارى قىسىمدى گاز قۇبىرىنىڭ قۇرىلىسى جۇرگىزىلىپ جاتىر. قارت ەمبىنىڭ ءتوسىندە جاتقان كەن ورىندارى ءبىر-بىرىنەن قاشىق ورنالاسقان. سوندىقتان, ءبىز مۇناي كاسىپشىلىكتەرى اراسىنداعى جولداردى جوندەپ, جاڭا جولدار سالىپ جاتىرمىز. بۇل جۇمىسشىلاردى جانە جۇكتەردى تاسىمالداۋدى جەڭىلدەتەدى.
– بولاشاقتاعى جوسپارلارىڭىزعا توقتالا كەتسەڭىز. جاڭادان گەولوگيالىق بارلاۋ جانە ءوندىرۋ جوبالارىنا قاتىسۋ ويلارىڭىزدا بار ما؟ ەلباسى جاڭا كەن ورىندارىن بارلاۋعا ينۆەستيتسيا تارتۋ ماقساتىندا جەر قويناۋىن پايدالانۋعا ءموراتوريدى الىپ تاستاۋدى تاپسىرعان جوق پا؟
– 2012 جىلى قمگ ءبو قازاقستاندا جانە باسقا شەتەلدەردەگى وننان استام جوبانى قاراپ, ونىڭ ىشىندە ەڭ تارتىمدى دەگەندەرىنە گەولوگيالىق-تەحنيكالىق جانە ەكونوميكالىق باعالاۋ جاسادى. قانداي بلوكتاردى ساتىپ العالى جاتقانىمىز تۋرالى ايتۋعا ءالى ەرتە, الايدا قانداي دا ءبىر ءمامىلە جاسالاتىن بولسا, ول تۋرالى مىندەتتى تۇردە حابارلايتىن بولامىز.
قازىر ءبىزدىڭ ماماندار قازاقستاننىڭ مۇنايلى وڭىرلەرىن زەرتتەۋ ۇستىندە. كوپتەگەن مۇنايلى ايماقتار از زەرتتەلگەندىكتەن, قازىرگى تاڭدا بۇل ايماقتاردا مۇناي كەنىشتەرىنىڭ اشىلۋ مۇمكىندىگى تۋرالى ءدوپ باسىپ ايتۋ قيىن. بۇعان دەيىن جۇرگىزىلگەن زەرتتەۋ جۇمىستارىن جيناقتاپ, وعان تەرەڭ تالداۋ جاساۋ قاجەت. سەيسميكالىق زەرتتەۋلەر جاساپ, ولاردىڭ قورىتىندىسى بويىنشا گەولوگيالىق جاعىنان دا, ەكونوميكالىق جاعىنان دا ىزدەۋ-بارلاۋ بۇرعىلاۋ قوندىرعىلارىن ورناتۋدىڭ تيىمدىلىگىن انىقتاۋىمىز قاجەت.
وتكەن جىلى «كارپوۆسكي سەۆەرنىي» گەولوگيالىق بارلاۋ جوباسىنا سەرىكتەستىك تارتتىق. قازىر اتالعان جوبانىڭ 49 پايىز قاتىسۋ ۇلەسى ۆەنگەرلىك MOL مۇناي-گاز كومپانياسىنىڭ ۇلەسىندە. بۇل ءمامىلە ءبىزدىڭ كومپانياعا 8,75 ملن. اقش دوللارى كولەمىندە تازا پايدا اكەلدى. سونداي-اق بولاشاقتا ينۆەستيتسيا مەن گەولوگيالىق بارلاۋدىڭ تاۋەكەلدەرىن بولىسۋگە ءمۇمكىندىك بەردى. گەولوگيالىق بارلاۋ – شىعىندى كوپ قاجەت ەتەتىن پروتسەسس جانە بارلاۋ ۇڭعىماسى ناتيجە بەرەدى دەپ سەنۋگە بولمايدى. سوندىقتان شىعىندار مەن مۇمكىن بولاتىن تاۋەكەلدەردى ءبولىسۋ جاڭا جوبالاردى يگەرۋدەگى ەڭ وڭتايلى شەشىم.
ەڭ باستىسى, MOL كومپانياسىمەن ءبىرلەسكەن كاسىپورىن قۇرۋ قمگ ءبو-گە حالىقارالىق تاجىريبەگە سۇيەنە وتىرىپ, جاڭا تەحنولوگيالاردى ۇيرەنۋگە مۇمكىندىك بەرەدى. جاسىراتىن نەسى بار, قازاقستاندا ءالى دە بولسا, بىلىكتى كادرلار تاپشىلىعى بايقالادى. سوندىقتان بۇل سەرىكتەستىك بىزگە وتاندىق مامانداردىڭ كاسىبي بىلىكتىلىگىن جاڭا دەڭگەيگە كوتەرۋگە مۇمكىندىك بەرەدى. ءوزىڭىز جاقسى بىلەسىز, پرەزيدەنت ءوزىنىڭ حالىققا ارناعان جولداۋىندا جاڭا كادر ساياساتىنا ەرەكشە توقتالىپ ءوتتى. ءوز كەزەگىندە, ءبىز دە كورپوراتيۆتىك باسقارۋ پرينتسيپتەرى مەن زاماناۋي باسقارۋ قۇرالدارىن ەنگىزۋىمىز كەرەك. ءبىز جۇمىسقا ۇزدىك مامانداردى, ونىڭ ىشىندە شەتەلدىك كادرلاردى تارتۋىمىز قاجەت. ءوتكەن جىلدىڭ سوڭىنان باستاپ ءبىز قاۋىپسىزدىك تەحنيكاسى, ەڭبەك جانە قورشاعان ورتانى قورعاۋ جونىندەگى باسقارۋشى ديرەكتور قىزمەتىنە حالىقارالىق تاجىريبەسى مول رەيموند ميتچەمدى شاقىردىق. وسىلايشا, حالىقارالىق ءتاجىريبەسى بار ماماندى جۇمىسقا تارتۋ ارقىلى ءبىز تەك ءوندىرىستىڭ مەنەدجمەنتىن جەتىلدىرىپ قانا قويماي, سونىمەن بىرگە بىلىكتى مامانداردى وقىتىپ, دايىندايمىز.
– قمگ ءبو – ەلىمىزدىڭ ءارتۇرلى وڭىرلەرىندەگى كاسىپورىنداردى بىرىكتىرىپ وتىرعان كومپانيالار توبى. سەرىكتەستەرىڭىزبەن ءوزارا قارىم-قاتىناستى ۇيلەستىرۋدىڭ قانداي جولدارىن نيەت ەتىپ وتىرسىز؟ ودان ءارى قۇرىلىمداۋ جوسپارلانىپ وتىر ما؟ جاڭا جوبالار تۋرالى نە ايتار ەدىڭىز؟
– 2012 جىلى قمگ ءبو ەنشىلەس ۇيىمدارىنىڭ باسقارۋ قۇرىلىمدارىن وڭتايلاندىرۋ بويىنشا ۇلكەن جۇمىستار اتقارىلدى. ءبىزدىڭ «وزەنمۇنايگاز» جانە «ەمبىمۇنايگاز» وندىرىستىك فيليالدارى اكتسيونەرلىك قوعامدار بولىپ قۇرىلدى. بۇل جۇمىسكەرلەردىڭ وندىرىستىك جانە الەۋمەتتىك ماسەلەلەرىن جەدەل شەشۋگە مۇمكىندىكتەردى كەڭەيتتى. ءبارى بىردەن شەشىلىپ جاتىر دەپ ازىرگە كەسىپ-ءپىشىپ ايتا المايمىن, ۇيىمداستىرۋ جانە اكىمشىلىك ماسەلەلەرى بار, دەگەنمەن «ساباقتى ينە ساتىمەن» دەگەن, ۋاقىت وتە كەلە اق-تاعى جۇمىستار قالىپتى ارناعا تۇسەدى دەپ ويلايمىن.
جاڭاوزەن وقيعاسىنان كەيىن پرەزيدەنت بۇرىن جۇمىستان شىعارىلعان مۇنايشىلاردى جۇمىسقا ورنالاستىرۋ جانە كومپانيا قىزمەتكەرلەرىنىڭ ەڭبەك جاعدايىن جاقسارتۋ تۋرالى تاپسىرما بەردى. وسى تاپسىرمانى ورىنداۋ باعىتىندا ۇلكەن جۇمىستار اتقارىلدى. 2012 جىلدىڭ قاڭتارىندا جاڭاوزەندە «بۇرعىلاۋ جۇمىستارى باسقارماسى» وقب جانە اقتاۋ قالاسىندا «تەحنولوگيالىق كولىك جانە ۇڭعىلارعا قىزمەت كورسەتۋ باسقارماسى» جشس قۇرىلدى. «قاراجانباس» كەن ورنىندا كومپانيانىڭ «تەحنولوگيالىق كولىك جانە ۇڭعىلارعا قىزمەت كورسەتۋ باسقارماسى» جۇمىسكەرلەرىنە ارنالعان 400 ورىندىق جاتاقحاناسى جانە 300 ورىندىق اسحاناسى, مونشا, كىر جۋاتىن كەشەنى جانە سپورت زالى بار ۆاحتالىق قالاشىق سالىنىپ, پايدالانۋعا بەرىلدى. قالامقاس كەن ورنىندا دا ينفراقۇرىلىمدارى بار ۆاحتالىق قالاشىق كەشەنى سالىندى.
سونداي-اق, بۇرعىلاۋ جۇمىستارى باسقارماسى جانە تەحنولوگيالىق كولىك جانە ۇڭعىلارعا قىزمەت كورسەتۋ باسقارماسىنىڭ وندىرىستىك قاجەتتىلىكتەرى ءۇشىن 300-دەن اسا جاڭا ارنايى تەحنيكا ساتىپ الىندى. بۇل كەلەشەكتە وسى سەرۆيستىك كومپانيالاردىڭ قمگ ءبو-گە عانا ەمەس, وڭىردەگى باسقا دا مۇناي ءوندىرۋشى كومپانيالارعا قىزمەت كورسەتە الۋى جانە ەكونوميكالىق تۇرعىدان ءتيىمدى بولۋى ءۇشىن جاسالدى.
قمگ ءبو ستراتەگياسىنا سايكەس, سالالىق ەمەس قىزمەتتەردى قىسقارتۋ جونىندە جۇمىستار جۇرگىزدىك. قمگ ءبو-ءنىڭ «Kazakhstan Petrochemical Industries Inc» جشس مۇنايحيميا جوباسىنداعى 51% ۇلەسى ساتىلدى, بۇل كومپانيانىڭ بۇرىن سالىنعان ينۆەستيتسيالاردى قايتارۋ جولىمەن 32,4 ملن. اقش دوللارى كولەمىندە تازا پايدا الۋىنا مۇمكىندىك بەردى. «قاراجانباسمۇناي» ءجانە «قازگەرمۇنايمەن» ءبىزدىڭ سەرىكتەستىگىمىز تۋرالى ايتار بولساق, بۇرىننان ۇيلەسىمدى قارىم-قاتىناسىمىز قالىپتاسقان. قازاق-قىتاي بىرلەسكەن كاسىپورىندارى بولىپ تابىلاتىن بۇل كومپانيالارعا وتكەن جىلى قازاقستاندىق توپ-مەنەدجەرلەر باسشىلىق ەتتى.
– ءوز قىزمەتىن جۇرگىزىپ وتىرعان وڭىرلەرگە قاتىستى كومپانيانىڭ الەۋمەتتىك ساياساتىندا وزگەرىستەر بولۋى مۇمكىن بە؟
– الەۋمەتتىك ساياسات – بۇل ءبىزدىڭ قىزمەتىمىزدەگى نەگىزگى باسىمدىقتاردىڭ ءبىرى. وڭىرلەردىڭ دامۋىنا ەرەكشە ماڭىز بەرەمىز, مۇنايشىلاردىڭ جانە ولاردىڭ وتباسىلارىنىڭ جاقسى الەۋمەتتىك جاعدايىن قامتاماسىز ەتۋ – بۇل ءبىزدىڭ مەملەكەت الدىنداعى تىكەلەي مىندەتىمىز, وبلىس حالقى الدىنداعى پارىزىمىز.
ماڭعىستاۋ وبلىسىنىڭ الەۋمەتتىك ينفراقۇرىلىمدارىن دامىتۋعا ارنالعان قمگ ءبو كەلىسىم-شارتتىق مىندەتتەمەلەرى 907,4 ملن. تەڭگەنى قۇرايدى. الەۋمەتتىك ارىپتەستىك باعدارلاماسى اياسىندا جاڭاوزەن قالاسىنىڭ تۇرعىندارىنا 800-دەن كەم ەمەس الەۋمەتتىك جۇمىس ورىندارىن اشۋ ءۇشىن وتكەن جىلى وبلىس اكىمدىگىنە قوسىمشا 200 ملن. تەڭگە ءبولىندى. بۇدان باسقا 2011 جىلدىڭ جەلتوقسانىندا قازا بولعان جانە ءجابىر كورگەن وتباسىلارىنا ماتەريالدىق كومەك كورسەتىلدى. سونداي-اق, جەلتوقسان وقيعاسى كەزىندە جاراقات العان ادامداردىڭ قازاقستاندىق جانە رەسەيلىك مەديتسينالىق مەكەمەلەردە ەمدەلىپ, وڭالۋىنا قارجىلاي كومەكتەر جاسالدى.
اتىراۋ وبلىسىندا قمگ ءبو-ءنىڭ الەۋمەتتىك ينفراقۇرىلىمداردى دامىتۋداعى كەلىسىم-شارتتىق مىندەتتەمەلەرى 286,6 ملن. تەڭگەنى قۇرايدى. مۇندا ءبىز ءمىندەتتى تولەمدەرمەن عانا شەكتەلىپ وتىرعان جوقپىز. ماسەلەن, 2012 جىلى اتىراۋ وبلىسىندا الەۋمەتتىك جوبالاردى ىسكە اسىرۋعا 350 ملن. تەڭگە كولەمىندە دەمەۋشىلىك كومەك كورسەتىلدى. بۇل قاراجاتتار وڭىردەگى بەس دەنە شىنىقتىرۋ-ساۋىقتىرۋ كەشەندەرىنىڭ قۇرىلىسىن اياقتاۋعا جۇمسالدى.
اتىراۋ وبلىسىندا – بايشوناس جانە ەسكەنە اۋىلدارىنىڭ تۇرعىندارىن وبلىس ورتالىعىنا كوشىرۋ جوباسىن ىسكە اسىرىپ جاتىرمىز. بۇل ماقساتقا 5,4 ملرد. تەڭگە قاراجات ءبولىندى. بۇگىنگى كۇنى ەسكەنە اۋىلىنىڭ 80 وتباسى اتىراۋ قالاسىنا قونىس اۋداردى, وبلىس ورتالىعىندا تۇرىپ جاتىر. بايشوناس اۋىلىنىڭ 377 وتباسىن كوشىرۋ كەزەڭمەن ىسكە اسىرىلۋدا. ولارعا ارنالعان پاتەرلەر نۇرسايا جانە تۇلپار شاعىن اۋداندارىنداعى جاڭا ۇيلەردەن بەرىلىپ وتىر.
قورىتا ايتقاندا, قمگ ءبو بۇرىن جاريا ەتكەن باسىمدىقتاردى ساقتاۋدا. ءبىز ءوز قىزمەتىمىزدى جۇرگىزىپ وتىرعان ءوڭىرلەر الەۋمەتتىك جاعدايىنىڭ جاقسارۋىنا, جاس مۇنايشىلار بۋىنىنىڭ كاسىبي ءوسىپ-دامۋىنا بۇرىنعىسىنشا ىقپال ەتپەكپىز. ءوندىرىستىڭ ەكولوگيالىق جانە قاۋىپسىزدىك ماسەلەلەرىن شەشۋ ءمىندەتى دە باستى نازاردا.
– وسى جىلدىڭ قاڭتار ايىنىڭ ورتاسىندا باق-تا قمگ ءبو ورتالىق اپپاراتىن اقتاۋ قالاسىنا كوشىرۋ قاجەتتىلىگى تۋرالى ماسەلە كەڭىنەن ءسوز بولدى. كومپانيانىڭ رەسمي حابارىنا سايكەس, بۇل ماسەلە اكتسيونەرلەردىڭ جينالىسىنا شىعارىلماعان, ياعني كۇن ءتارتىبىندە تۇرعان جوق. كومپانيا جەتەكشىسى رەتىندە بۇل ماسەلەگە ءسىزدىڭ كوزقاراسىڭىز قانداي؟
– زەردەلەپ قاراساق, قمگ ءبو ورتالىق اپپاراتىن كوشىرۋ – بۇل سالماقتى قادام, بۇل ماسەلەنىڭ ماقساتتىلىعى ءبىزدىڭ عانا ەمەس, «قازمۇنايگاز» ۇك, «سامۇرىق-قازىنا» ۇاق, مۇناي جانە گاز مينيسترلىگى تاراپىنان دا زەرتتەلۋى ءتيىس. اقتاۋعا كوشۋدىڭ سالدارىن, شىعىندار مەن تاۋەكەل جايتتارىن دا پايىمعا سالىپ, باعالاي ءبىلۋىمىز قاجەت. مۇنداي شەشىمدى بارلىق «ءيا» نەمەسە «جوق» دەگەن پىكىرلەردىڭ سالماعىن ولشەپ بارىپ قابىلداۋىمىز كەرەك. بۇگىنگى كۇنى قمگ ءبو-ءنىڭ رەسمي اقپاراتىندا ايتىلعانداي, كوشۋ تۋرالى ماسەلە اكتسيونەرلەر الدىنا قويىلىپ وتىرعان جوق.
دەگەنمەن, جاقىن ۋاقىتتاردا قمگ ءبو ورتالىق اپپاراتىنىڭ قۇرىلىمىنا سالماقتى وزگەرىستەر جاسالاتىنىن اتاپ ايتقىم كەلەدى. ءبىزدىڭ وندىرىستىك فيليالداردىڭ اق مارتەبەسىن الۋلارىنا جانە باسقارۋ فۋنكتسيالارى بولىگىنىڭ ولارعا وتۋىنە بايلانىستى, باس كەڭسەدەگى قىزمەتكەرلەر ءبولىگىنىڭ لاۋازىمدىق مىندەتتەرى قايتادان قارالاتىن بولادى. اتقارىپ وتىرعان مىندەتتەرى ەنشىلەس باعىنىشتى ۇيىمداردا قايتالاناتىن قىزمەتكەرلەر قىسقارتىلادى.
– ءسىز كومپانيا باسشىلىعىنا وسى جىلدىڭ قاڭتارىندا سايلاندىڭىز. مۇنايشىلىق كاسىپتىڭ مۇناي ءوندىرۋ وپەراتورىنان, ديرەكتوردىڭ ءوندىرىس ءجونىندەگى ورىنباسارىنا دەيىنگى ەڭبەك جولىنان ءوتتىڭىز. ەندى مىنە, كومپانيا جەتەكشىسى بولىپ وتىرعان ءسىز ءۇشىن ەلىمىزدەگى مۇناي كەنىشتەرىندەگى ءوندىرۋ جاعدايى ەتەنە تانىس. ءوزىڭىز تىزگىنىن العان كومپانيانى الدا قانداي وزگەرىستەر كۇتىپ تۇر؟
– قمگ ءبو ستراتەگيالىق ماقساتتارى بۇرىنعىسىنشا ساقتالادى. قازاقستانداعى جەتەكشى مۇناي-گاز كومپانيالارىنىڭ ءبىرى رەتىندە ۇستانىمىمىزدى نىعايتۋ ءۇشىن قۋاتىمىزدى جوسپارلى تۇردە ءوسىرىپ وتىراتىن بولامىز. ءبىزدىڭ باستى مىندەتتەرىمىز – بۇل شوعىرلاندىرىلعان ءوندىرۋ كولەمىن ۇلعايتۋ, جاڭا اكتيۆتەردى ساتىپ الۋ جولىمەن كومىرسۋتەگى قورىن تولىقتىرۋ جانە ءوسىرۋ, سونداي-اق گەولوگيالىق بارلاۋ جۇمىستارى جانە قمگ ءبو نەگىزگى كەن ورىندارىنداعى ءوندىرىستى وڭتايلاندىرۋ.
وتكەن جىل بويى كومپانيادا ەڭبەك ۇجىمدارىمەن ىشكى كوممۋنيكاتسيانى قالىپتاستىرۋ بويىنشا قارقىندى جۇمىستار جۇرگىزىلدى. قىزمەتكەرلەردىڭ وزدەرىن تولعانتقان ماسەلەلەردى تالقىعا شىعارىپ جانە ولاردىڭ قىسقا مەرزىم ىشىندە شەشىمىن تابۋى ءۇشىن كومپانيا جۇمىسكەرلەرىمەن تىعىز بايلانىس تەتىكتەرى جاسالدى. جۇمىسكەرلەرمەن قارىم-قاتىناس ورناتۋداعى جۇمىستاردا وڭ ناتيجەلەر بار. مۇندا, ءسوز جوق بۇرىنعى باسشىلىقتىڭ ەڭبەگى زور. بۇل باعىتتاعى جۇمىستار ودان ءارى جالعاساتىن بولادى.
ەندى ءوندىرىستى كوتەرەتىن ۋاقىت كەلدى. بيىلعى جىلى رەسۋرستاردى, بارلىق قاجىر-قايرات پەن نازارىمىزدى وسىعان باعىتتايتىن بولامىز. كوپ جىلداردان بەرى ءبىزدىڭ نەگىزگى اكتيۆىمىز – «وزەنمۇنايگاز» اق ءوندىرۋ جوسپارىن ورىنداي الماي كەلەدى. بۇل ماسەلەنى شەشۋىمىز كەرەك. ءوندىرۋ كولەمىنىڭ تومەندەۋ سەبەپتەرىنىڭ ءبىرى 2011 جىلى ۇزاققا سوزىلعان نارازىلىقتار كەزىندە ۇڭعىمالاردىڭ توقتاپ قالۋى سالدارىنان بولدى. بۇدان باسقا, كوپتەگەن كاسىپشىلىكتەردە ينفراقۇرىلىمدار توزعان, جابدىقتاردىڭ بارلىعى بىردەي زاماناۋي تالاپتارعا جاۋاپ بەرمەيدى. ءبىز كەڭ كولەمدەگى جاڭعىرتۋ باعدارلاماسىن ىسكە قوستىق, ونىڭ ناتيجەسى «وزەنمۇنايگاز» اق ءوندىرۋ جاعدايىن تۇراقتاندىرۋعا مۇمكىندىك بەرەدى.