ا. ايماعامبەتوۆ قوسىمشا 5 مىڭ گرانت بولىنەتىن ماماندىقتار جانە باسقا دا ناقتىلىقتارى ەڭبەك نارىعىنىڭ سۇرانىسىنا وراي ايقىندالاتىنىن ايتتى.
«قوسىمشا گرانتتاردى بولۋگە قاراجاتتار جەرگىلىكتى اتقارۋشى ورگاندارعا, جەرگىلىكتى بيۋدجەتتەرگە ترانسفەرتتەرمەن باعىتتالادى. جانە نارىقتىڭ سۇرانىستارى مەن بەلگىلى ءبىر ماماندىقتارعا قاجەتتىلىكتەرگە وراي ءاربىر ءوڭىر بويىنشا قاجەتتى ماماندىقتار ايقىندالاتىن بولادى», — دەدى مينيستر.
جالپى كونكۋرستا گرانت الا الماعان, كوپ بالالى وتباسىلار مەن اتاۋلى الەۋمەتتىك كومەك الاتىن وتباسىلاردان شىققان بالالار تامىز ايىندا جەرگىلىكتى اكىمدىكتەرگە قوسىمشا ءوتىنىش بەرىپ, جيناعان باللىنا سايكەس تيىسىنشە گرانتقا يە بولا الادى.
«بارلىعى 5 مىڭ گرانت بولىنەدى. بۇل گرانتتار بيىل دا بولىنەدى, ياعني, وسى گرانتتار بويىنشا وقۋعا تۇسەتىن جاستار بيىلعى 1 قىركۇيەكتەن باستاپ ءبىزدىڭ جوو-لاردا وقۋلارىن باستاي الادى», — دەپ ناقتىلادى ا. ايماعامبەتوۆ.
