قولىڭمەن جاساعاندى موينىڭمەن كوتەر
جۇما, 19 ءساۋىر 2013 0:40
مەملەكەتتىك قىزمەتكەرلەر اراسىندا زاڭعا مويىنسىنباۋشىلىق, ار-نامىس كودەكسى تالاپتارىن ورەسكەل بۇزۋشىلىق ءالى دە ءجيى كەزدەسەدى. وبلىستىق تارتىپتىك كەڭەس جىل باسىنان بەرى تالاي شەنەۋنىكتى ساباسىنا ءتۇسىرىپ, باسقالارعا ساباق بولارلىق شارا كوردى.
جامبىل اۋدانىنىڭ پروكۋرورى شوقان قۇلدانوۆتىڭ حابارلاماسى تارتىپتىك كەڭەس مۇشەلەرىنىڭ جاعالارىن ۇستاتقانداي بولدى. ول بلاگوۆەششەنكا اۋىلدىق وكرۋگىنىڭ اكىمى تۇرمىس يمانجانوۆتىڭ كىناسىن بۇلتارتپاس ايعاقتارمەن دالەلدەپ بەردى. سويتسە, اۋىل ىشىندە قىزمەتتىك كولىكتى جۇرگىزىپ كەلە جاتقان ونى جول پوليتسەيلەرى توقتاتىپ, ىشىمدىك ءىشىپ العانىن انىقتاعان. اكىمشىلىك حاتتاما اۋداندىق سوتقا جىبەرىلىپ, 2 جىلعا كولىك جۇرگىزۋ قۇقىنان ايىرىلعان. ونىڭ مونشادان كەيىن جارتى بوتەلكە سىرا ىشكەنىمدى جاسىرمايمىن.
جۇما, 19 ءساۋىر 2013 0:40
مەملەكەتتىك قىزمەتكەرلەر اراسىندا زاڭعا مويىنسىنباۋشىلىق, ار-نامىس كودەكسى تالاپتارىن ورەسكەل بۇزۋشىلىق ءالى دە ءجيى كەزدەسەدى. وبلىستىق تارتىپتىك كەڭەس جىل باسىنان بەرى تالاي شەنەۋنىكتى ساباسىنا ءتۇسىرىپ, باسقالارعا ساباق بولارلىق شارا كوردى.
جامبىل اۋدانىنىڭ پروكۋرورى شوقان قۇلدانوۆتىڭ حابارلاماسى تارتىپتىك كەڭەس مۇشەلەرىنىڭ جاعالارىن ۇستاتقانداي بولدى. ول بلاگوۆەششەنكا اۋىلدىق وكرۋگىنىڭ اكىمى تۇرمىس يمانجانوۆتىڭ كىناسىن بۇلتارتپاس ايعاقتارمەن دالەلدەپ بەردى. سويتسە, اۋىل ىشىندە قىزمەتتىك كولىكتى جۇرگىزىپ كەلە جاتقان ونى جول پوليتسەيلەرى توقتاتىپ, ىشىمدىك ءىشىپ العانىن انىقتاعان. اكىمشىلىك حاتتاما اۋداندىق سوتقا جىبەرىلىپ, 2 جىلعا كولىك جۇرگىزۋ قۇقىنان ايىرىلعان. ونىڭ مونشادان كەيىن جارتى بوتەلكە سىرا ىشكەنىمدى جاسىرمايمىن. مەكتەپتەگى قازاندىق ىستەن شىقتى دەگەن سۋىت حابار جەتكەن سوڭ رۋلگە وتىرعانىم راس. ايەلى اۋىرىپ قالعاندىقتان, جۇرگىزۋشى سۇرانىپ كەتكەن ەدى, دەگەن ءسوزى ەشكىمدى يلاندىرا قويمادى. ءويتكەنى, تالقىلاۋ بارىسىندا سوت شەشىمىنە قارسى تالاپ ارىز تۇسىرمەگەنى بەلگىلى بولدى. قىستىڭ سۋىعىندا ءتۇن قاتىپ, مەملەكەتتىك قىزمەتتە جۇرگەنىن كولدەنەڭ تارتىپ, قانشا اقتالسا دا, قاتاڭ سوگىس ارقالاۋىنا تۋرا كەلدى.
ال تيميريازەۆ اۋدانى ميچۋرين اۋىلدىق وكرۋگى اپپاراتىنىڭ جەتەكشى مامانى گالينا ۆاسيلەنكونىڭ مىنا ارەكەتى ەكى جەپ, بيگە شىقپاق بولعان پىسىقايدىڭ تىرلىگىنە كەلىڭكىرەيدى. اۋرۋحانادا ستاتسيونارلىق ەم-دوم الىپ جاتقانىنا قاراماستان, قانداي تۇلەن تۇرتكەنىن كىم ءبىلسىن, ەڭبەك تابەلىنە تولىق جۇمىس كۇندەرىن قوندىرىپ قويۋدى ۇمىتپاعان. ءسويتسە, بۋحگالتەردىڭ بولماعانىن جەكە باس مۇددەسىنە ۇتىمدى پايدالانىپ, 126 مىڭ تەڭگەنى قالتاعا باسقان. وسىلايشا, ءوز وكىلەتتىگىن اسىرا سىلتەپ ءجۇرىپ قۇرىققا قالاي ىلىنگەنىن بىلمەي قالعان. ونى قىزمەتىنەن شەتتەتۋگە شەشىم الىندى.
تايىنشا اۋداندىق ءبىلىم ءبولىمىنىڭ باستىعى ەركىن ورازوۆ تا زاڭدى بەلدەن باسقانى ءۇشىن ءتيىستى جازاسىن الىپ, قىزمەتىنەن بوساتىلاتىن بولدى. ول وقۋشىلاردىڭ وقۋ ورنىن وزگەرتۋىنە اتا-انالاردىڭ ارنايى رۇقساتى مىندەتتىلىگىن بىلە تۇرا, اقىلداسۋدى ءجون كورمەگەن. اۋدان ورتالىعىندا تىپ-تىنىش وقىپ جاتقان ەكى وقۋشىنى نەگىزگى مەكتەپكە اۋىستىرۋ تۋرالى مەكتەپ ديرەكتورلارىنىڭ وتىنىشىنە ەلپ ەتە قالعان. ونىڭ بۇل پيعىلىنىڭ ارعى جاعىندا بالالاردىڭ سانىن قولدان كوبەيتۋ ارقىلى ءبىلىم ۇيلەرىن ەش سەبەپسىز ساقتاپ قالۋ ارەكەتى جاتقانى اشكەرەلەندى.
تارتىپتىك جاۋاپقا تارتىلعانداردىڭ اراسىندا ماسەلەنى بايىپپەن, ادەپپەن شەشۋدىڭ ورنىنا, بالاباقشانىڭ ءبۇلدىرشىندەرى ءتارىزدى توبەلەسە كەتۋگە قۇمارتىپ تۇراتىندارى جوق ەمەس. ولاردىڭ قاتارىنا تايىنشا اۋدانى, دراگوميروۆكا اۋىلدىق وكرۋگىنىڭ اكىمى ادىلبەك وتەۋباەۆ پەن كەللەروۆكا اۋىلدىق وكرۋگى اپپاراتىنىڭ باس مامانى دميتري زاينۋلليندى قوسۋعا بولادى. بۇل ەكەۋىنىڭ ءوزارا ەرەگىسىنە جولدىڭ قاردان تازالانباۋى سەبەپ بولعانعا ۇقسايدى. ءسىرا, كۇشتەرى بويلارىنا سىيماعان بولۋلارى كەرەك, الدىمەن بىلاپىت سوزدەرمەن ايىزى قانعانشا بالاعاتتاسىپ الىپ, ونىڭ سوڭى رينگتەگى بوكسشىلاردىڭ الما-كەزەك سوققىلارىنا ۇلاسىپ كەتكەن. سوت شەشىمىمەن ەكى تاراپ بەيبىت ىمىراعا كەلسە دە, جۋان جۇدىرىق يەلەرىنىڭ بىرىنە قاتاڭ سوگىس, ەكىنشىسىنە سوگىس جاريالاندى.
«ءبىر قىزىم ءبىر قىزىمنان سوراقى» دەمەكشى, پەتروپاۆل قالالىق اكىمدىگى زاڭ ءبولىمىنىڭ باس مامانى جانات راحمەتوۆتىڭ مىنا ارەكەتى مەملەكەتتىك قىزمەتكەردىڭ ابىروي-بەدەلىنە ۇلكەن نۇقسان كەلتىرگەنى انىق. اتاپ ايتقاندا, جەر ينسپەكتسياسىنا جالعان ۇيعارىم ازىرلەۋ ماقساتىمەن نەبىر قيتۇرقىلىققا بارعان. ول ءۇشىن ارنايى بلانككە قالا پرورۋرورىنىڭ قولىن قويۋدان شىمىرىكپەگەن. ونىڭ وزىنە تاعىلعان كىنانى مويىنداۋدان باس تارتقانىنا قاراماستان, زاڭ تالاپتارىن ورەسكەل بۇرمالاۋى سوت-مەديتسينا ساراپتاماسىنىڭ قورىتىندىسى ارقىلى قۋاتتالعان.
وبلىستىق تارتىپتىك كەڭەس مۇشەلەرى الداعى ۋاقىتتا دا ءتارتىپ پەن تالاپتى ودان ءارى قاتايتىپ, مەملەكەتتىك قىزمەتكەرلەردىڭ زاڭعا دەگەن قۇرمەت سەزىمىن نىعايتۋدى باستى ماقسات ەتىپ وتىر.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
