ولاردىڭ ەڭ ەسكىسى 1907 جىلى, ەڭ «جاسى» 1977 جىلى شىعارىلعان. ماشينالاردىڭ ماركالارى دا ءتۇرلى-ءتۇرلى. Bentley, Lancia, Packard, Horch سەكىلدى جانە باسقا دا ماشينالاردى قوستانايلىقتار مەيىلىنشە قىزىقتادى. وسىدان جيىرما شاقتى كۇن بۇرىن پەكيننەن شىققان رەترو اۆتوموبيلدەر شەرۋى بيىل قازاقستاننىڭ ءۇش قالاسىنا توقتادى. قازاقستانعا التاي جاعىنان كەلىپ كىرگەن ولار الدىمەن پاۆلودار قالاسىنا, ودان نۇر-سۇلتانعا توقتاپ, ەندى قوستانايعا دا جەتتى. ورتالىق الاڭعا الدىمەن كىرگەن Buick ماركالى ماشينا زاۋىتتان 1929 جىلى شىققان ەكەن. دەۆيد مەين ونى 7 جىل بۇرىن كاليفورنيادان 25 مىڭ دوللارعا ساتىپ الىپتى. اجەپتەۋىر ۇلكەن ماشيناعا ەكى ادام عانا وتىرادى. دوڭعالاعى اعاشتان جاسالعان. سونىڭ وزىندە ماشينا پەكيننەن قوستانايعا دەيىنگى 7 مىڭ شاقىرىمدى سىر بەرمەي ءجۇرىپ كەلىپتى.
– مەنىڭ ماشيناما 90 جىل تولدى. شەرۋدىڭ اياعىنا دەيىن جەتەمىن دەپ ويلايمىن. ماعان ەسكى اۆتوموبيلدەر شەرۋى وتە ۇنادى, كوڭىلدى كەلەمىز,– دەيدى دەۆيد. شەرۋدەگى ەڭ ەسكى ترانسپورت Contal Motori Tricycle موتوتسيكل 1907 جىلعى. بىراق رەترو شەرۋدىڭ ۇزدىك ۇشتىگىندە ەكەن.
– ىلعي ەنتۋزياستاردىڭ باسىن قوسقان بۇل رەترو ءرالليدىڭ ماقساتى ماشينالار ەسكى بولسا دا, ولاردىڭ شىدامدىلىعىن سىناۋ بولاتىن. ءبىز بۇگىنگە دەيىن تەك داڭعىل تاس جولدارمەن عانا جۇرگەن جوقپىز, تاۋلى جەرلەردەن دە, قازاقستاننىڭ دالاسىنان دا وتتىك. پەكيننەن شىققاندا 30 ەلدەن قاتىسقان 120 ماشينا بولاتىن. سودان 20 ماشينا سىنىپ, شەرۋدەن شىعىپ, جولدا قالدى. قينالعان ساتتەرىمىز دە بولدى. بىراق شەرۋدىڭ قىزىعى دا سول, قيىندىقتارعا شىداي ءبىلۋ, – دەيدى رەترو راللي ەسكى اۆتوموبيلدەر شەرۋىن ۇيىمداستىرۋشىلاردىڭ ءبىرى تاالاي نازيردينوۆ.
رەترو-رالليگە قاتىسۋشىلار پاريجگە دەيىن ءالى 8 مىڭ شاقىرىمعا جۋىق جول جۇرەدى. ولار قوستانايدان كەيىن رەسەيگە وتەدى, ءارى قاراي ەۋروپاعا شىعىپ, پاريجگە جەتەدى. رەترو كولىكتەردىڭ جەڭىمپازى دا پاريجگە جەتكەن سوڭ جاريا بولادى.
قوستاناي
