كەشە ءوڭىر باسشىسى وڭداسىن ءورازاليننىڭ توراعالىعىمەن حالىقتىڭ اسا مۇقتاج توبىن باسپانامەن قامتاماسىز ەتۋ سۇراقتارى بويىنشا جيىن ءوتتى. اتقارىلعان جۇمىستار تۋرالى اقتوبە قالاسىنىڭ اكىمى ءىلياس يسپانوۆ ەسەپ بەردى.
«وبلىس بويىنشا 30 مىڭ ادام باسپانا كەزەگىندە تۇرسا, ولاردىڭ ىشىندە 23 500-ءى اقتوبە قالاسىندا. بۇل ماسەلە بىردەن شەشىلمەيدى, بىراق ءتيىستى جۇمىستار جۇرگىزىلىپ جاتىر جانە ءبىز ەڭ الدىمەن اسا مۇقتاج جانداردى باسپانامەن قامتاماسىز ەتۋ ءۇشىن بارلىق مۇمكىندىكتى جاسايمىز. وسى جىلدىڭ وزىندە وبلىستا 1 ملن م2-دەن اسا تۇرعىن ءۇي سالىندى, بۇل دەگەنىڭىز 8 مىڭنان اسا پاتەر. ولاردىڭ جارتىسى مەملەكەت قولداۋىنىڭ ارقاسىندا از قامتىلعان وتباسىلارعا ءتيىمدى شارتتارمەن بەرىلەتىن بولادى. حالىقتى تۇرعىن ۇيمەن قامتاماسىز ەتۋ – ءبىزدىڭ جۇمىسىمىزدا باسىمدىق بولىپ تابىلادى. بيىل ءبىزدىڭ وبلىستا «باقىتتى وتباسى» باعدارلاماسىمەن كوپبالالى جانە تولىق ەمەس, سونىمەن قاتار, مۇمكىندىگى شەكتەۋلى بالا تاربيەلەپ وتىرعان وتباسىلار ءۇشىن 1600 پاتەر پايدالانۋعا بەرىلەدى»,- دەدى وبلىس اكىمى.
وسى جىلدىڭ باسىنان بەرى حالىقتىڭ الەۋمەتتىك جاعىنان از قامتىلعان توبىن تۇرعىن ۇيمەن قامتاماسىز ەتۋ ءۇشىن ارنايى قۇرىلعان جۇمىس توبى تەك اقتوبە قالاسىندا ازاماتتاردىڭ باسپانا بەرۋ تۋرالى 170 ءوتىنىشىن قاراعان. 97 ءوتىنىش وڭ شەشىمىن تاپتى. ناتيجەسىندە 45 وتباسى ساتىپ الۋ قۇقىعىمەن جالدامالى پاتەرلەرگە يە بولدى. قالعان وتىنىشتەر بويىنشا قازىرگى تاڭدا كەلىسىمشارتتار جاسالىپ جاتىر.
سونداي-اق, از قامتىلعان, كوپبالالى جانە مۇمكىندىگى شەكتەۋلى بالا تاربيەلەپ وتىرعان وتباسىلاردى باسپانامەن قامتۋ ءۇشىن دەمەۋشىلەردىڭ دە قاراجاتتارى بەلسەندى تۇردە تارتىلۋدا. ماسەلەن, بيىل تەك «قولعانات اقتوبە» قوعامدىق قورىنىڭ ءوزى 37 وتباسىنىڭ «باقىتتى وتباسى» الەۋمەتتىك تۇرعىن ءۇي يپوتەكالىق باعدارلاماسى بويىنشا العان باسپانالارىنىڭ باستاپقى جارناسىن تولەدى. اتالمىش قوردىڭ وكىلى التىناي مۇحانوۆانىڭ ايتۋىنشا, بۇل ماقساتقا جالپى سوماسى 22,7 ملن تەڭگە بولىنگەن. قاراجاتتى كاسىپكەرلەر بەرگەن. سونىمەن قاتار, «باقىتتى وتباسى» باعدارلاماسى بويىنشا جىلدىق پايىزدىق مولشەرلەمە نەبارى 2 پايىز.
وبلىس اكىمى قايىرىمدىلىقتى دامىتۋعا قوسقان ۇلەسى ءۇشىن كاسىپكەر بولات يتەعۇلوۆقا «اقتوبە قالاسىنىڭ 150 جىلدىعى» مەدالىن تاپسىردى. كاسىپكەر شاحان جولداسباەۆ تا الەۋمەتتىك كاسىپكەرلىكتى دامىتىپ, مۇمكىندىگى شەكتەۋلى جاندار اراسىندا سپورتتى دارىپتەگەنى ءۇشىن وسى مەدالمەن ماراپاتتالدى.
جيىن اياقتالعاننان كەيىن وبلىس اكىمى وڭداسىن ورازالين حالىقتىڭ اسا مۇقتاج توبىنا بەرىلىپ جاتقان تۇرعىن ۇيلەردى قاراپ شىقتى, سونىڭ ىشىندە مۇمكىندىگى شەكتەۋلى بالانى جالعىز تاربيەلەپ وتىرعان گاۋحار ابدىرازاقوۆانىڭ ۇيىندە بولدى. ول «قولعانات اقتوبە» قوعامدىق قورى بەرگەن باستاپقى جارنانىڭ كومەگىمەن «نۇر اقتوبە» تۇرعىن ءۇي الابىنان مەملەكەتتىك باعدارلاما ارقىلى ءۇيلى بولدى.
«ءوز اس ءۇيىم, جەكە جۋىناتىن بولمەم بولسا دەپ ارمانداعان ەدىم. وسىنىڭ ءبارى بىزدە بولعان جوق. بىراق قازىر ءبارى جاقسى, ءبىزدىڭ جاڭا پاتەر جايلى. قولداۋ كورسەتكەنى ءۇشىن مەملەكەتكە راحمەت. ەندى مەملەكەتتىڭ كومەگىمەن ءوز ءىسىمدى اشۋدى جوسپارلاپ وتىرمىن»,- دەدى گاۋحار ابدىرازاقوۆا.
ءوڭىر باسشىسى كوپبالالى انالاردىڭ ماسەلەسى ءارى قاراي دا شەشىلەتىنى جايىندا اتاپ ءوتتى.
«مەملەكەت كومەگىنە مۇقتاج وتباسىنىڭ بىردە ءبىرى نازاردان تىس قالمايدى»,- دەدى وڭداسىن ورازالين.
تەمىر قۇسايىن
