مۇراجايلار ءماسليحات قۇرعان شارانىڭ سالتاناتتى اشىلۋىندا جەزقازعان قالاسى اكىمىنىڭ ورىنباسارى زينا اقىلبەكوۆا, قاراعاندى وبلىسىنىڭ ءمادەنيەت, مۇراعاتتار ءجانە قۇجاتتاما باسقارماسىنىڭ باسشىسى ەركەبۇلان اعىمباەۆ جانە «مۇراعات-2025» عىلىمي-ءادىستەمەلىك ورتالىعىنىڭ جەتەكشىسى بەرىك ابدىعالي ۇلى, وبلىستىق ءماسليحاتتىڭ دەپۋتاتى, مەتسەنات بەكزات التىنبەكوۆ قۇتتىقتاۋ ءسوز سويلەدى.
فەستيۆالدىڭ العاشقى كۇنى «ءوز ەسىمىڭدى تاريحتا قالدىر» اكتسياسى ءوتكەننەن كەيىن, جەزقازعان تاريحي-ارحەولوگيالىق مۇراجايى, تۇرىك رەسپۋبليكاسىنىڭ انكارا ۋنيۆەرسيتەتى مەن استراحان مۋزەي-قورىعى اراسىندا ىنتىماقتاستىق تۋرالى ءۇشجاقتى مەموراندۋمعا قول قويىلدى.
بۇدان كەيىن باعدارلاماعا ساي, قولدانبالى ونەر بويىنشا شەبەرلىك ءدارىستەر ۇيىمداستىرىلىپ, وعان مۇراجايلاردىڭ سۋرەتشى-رەستاۆراتورلارى, قىش ءىسىنىڭ شەبەرلەرى بەلسەنە اتسالىستى.
فەستيۆالدە ۇيىمداستىرىلعان « ۇلى دالا مۇراسى» ەكسپوزيتسياسىندا ەلىمىزدىڭ 60-تان استام ءبىرەگەي جادىگەرى قاتىسۋشىلار مەن قوناقتار نازارىنا ۇسىنىلدى. سونىڭ ىشىندە جۇرتتى وزىنە قاراتقان ەكسپوناتتىڭ ءبىرى «التىن ادام» جادىگەرىنىڭ كوشىرمەسى بولدى.
حالىقارالىق فەستيۆالعا قاتىسۋشى قوناقتار قۇر قول كەلمەگەن ەكەن. مىسالى, قىتاي دەلەگاتسياسى قاراعاندى وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ يەلىگىنە XVIII عاسىرداعى قىتاي مەن قازاقستان اراسىنداعى جىبەك ساۋداسى تۋرالى قۇجاتتىڭ كوشىرمەسىن سىيعا تارتتى. موڭعول دەلەگاتسياسى بولسا, قازاق دياسپوراسىنىڭ موڭعوليا اۋماعىنا قالاي قونىس اۋدارعانى تۋرالى قۇجاتتىڭ كوشىرمەسىن اكەلىپتى. ال وزبەك دەلەگاتسياسى XIX-XX عاسىرلارداعى قازاق حالقىنىڭ تاريحىنا قاتىستى قۇجاتتار مەن فوتوسۋرەتتەردىڭ كوشىرمەسىن تارتۋ رەتىندە ۇسىندى.
فەستيۆالدىڭ ەكىنشى كۇنى مۇراجاي قىزمەتكەرلەرىنە ارنالعان «مۇراجاي قىزمەتىن جاھاندىق جاڭعىرتۋ – ۋاقىت قاجەتتىلىگى» تاقىرىبىندا سەمينار-ترەنينگ ۇيىمداستىرىلدى. شارا بارىسىندا انكارا ۋنيۆەرسيتەتىنىڭ پروفەسسورى ايشا چاكير يلحان, جوعارى ساناتتى ەكسكۋرسوۆود-ادىسكەر, قازاق سپورت جانە تۋريزم اكادەمياسىنىڭ تۋريزم ساراپشىسى, يۋنەسكو ۇلتتىق كوميسسياسىنىڭ مۇشەسى باقىت ورازىمبەتوۆا, تاريح عىلىمدارىنىڭ كانديداتى, ءال-فارابي اتىنداعى قازۇۋ ارحەولوگيا, ەتنولوگيا جانە مۋزەولوگيا كافەدراسىنىڭ دوتسەنتى, پروفەسسور تاتتىگۇل قارتاەۆا جانە باسقا دا تانىمال تۇلعالار ءدارىس وقىپ, تاجىريبەلەرىمەن ءبولىستى.
حالىقارالىق فەستيۆالدىڭ قورىتىندى كۇنىندە الىس-جاقىننان كەلگەن قوناقتار ءۇشىن ۇلت ۇياسى – ۇلىتاۋدىڭ تاريح تۇنعان قاسيەتتى جەرلەرىنە ساياحات ۇيىمداستىرىلدى.
قاراعاندى وبلىسى
