جالپى, وزىنە ۇناعان سوزدەر مەن تۇراقتى ءسوز تىركەستەرىن, ماقال-ماتەلدەر مەن ولەڭ جولدارىن ارنايى قويىن داپتەر ارناپ ەرىنبەي جازىپ ءجۇرۋ – كوبىنە ىجداعاتشىل, شىعارماشىل ادامدارعا ءتان ءداستۇر. مۇنىڭ ءوزى ولاردىڭ وي تەڭىزىن كەشىپ, ودان ءىنجۋ-مارجان ءسۇزىپ, ۇنەمى ىزدەنىس ۇستىندە ءجۇرەتىنىن ايعاقتايدى. ەلدىڭ مۇڭى مەن مۇراتىن, ءتىلى مەن تىلەگىن, ۇرەيى مەن ءۇمىتىن, اڭسارى مەن ارمانىن 93 جىل بويى ۇزدىكسىز ءجۇرەگىندە تەربەتىپ, بىلتىر عانا دۇنيەدەن وتكەن قازاق ءسوز ونەرىنىڭ الىبى, اكادەميك شورا شامعالي ۇلى سارىباەۆ ءوزىنىڭ ۇزاق عۇمىرىندا ارتىنا وسىنداي بىرنەشە قويىن داپتەر قالدىرعان ناعىز پاراسات يەسى بولاتىن. بۇگىن وقىرمانعا جول تارتقان بۇل جيناق سولاردىڭ ىشىنەن ىرىكتەلىپ, سۇرىپتالىپ الىنىپ, توپتاستىرىلىپ, العاش رەت كوپشىلىككە ۇسىنىلىپ وتىر.
كىتاپتىڭ العىسوزىن جازعان مايرا شوراقىزى بىلاي دەيدى: «پوەزيا – اكەمىزدىڭ ءومىر بويعى ەڭ ءسۇيىپ وقيتىن جانرى ەدى جانە ونىڭ ۇزاق عۇمىرىنىڭ بولىنبەس ءبىر بولشەگىنە اينالدى. ول وسى ءبىر ادەبي جانردى جانىمەن ءسۇيدى جانە ونىڭ شابىتتى وقىرمانى, جانكۇيەر تىڭداۋشىسى جانە ناعىز زەرتتەۋشىسى بولا ءبىلدى. ونىڭ جەكە كىتاپحاناسىندا جۇزدەگەن ولەڭ توپتامالارى, گازەتتەن جانە جۋرنالدان قيىپ الىنعان پوەزيالىق تۋىندىلار كوپتەپ ساقتالعان. ونى عىلىمي جانە پەداگوگيكالىق جۇمىسىنا دەرەكتى ماتەريال رەتىندە ءوزىنىڭ فيلولوگيالىق شەبەرلىگىن ارتتىرۋدىڭ ءيمپۋلسى جانە پوەتيكالىق شىعارماشىلىعىن ناسيحاتتاۋدىڭ بىردەن-ءبىر قۇرالى رەتىندە پايدالاندى. پوەزيانىڭ ۇلتتىق قۇندىلىق رەتىندەگى ءرولىن جانىمەن ۇعىنىپ, سول ارقىلى ءومىردىڭ اقيقي ءمانىن ءتۇسىنۋگە ۇمتىلدى».
سونداي-اق كىتاپشادا شورا شامعالي ۇلىنىڭ ءوز قولىمەن قاعازعا ءتۇسىرگەن قولجازبالارى ارحيۆتىك قۇجات رەتىندە قوسىمشا بەرىلگەن. بۇل قۇجاتتاردىڭ ءتىل ءبىلىمى مەن عىلىمى سالاسىندا جان-جاقتى جەمىستى قىزمەتى مەن عۇمىربايانى تۋرالى زەرتتەۋ جۇرگىزگىسى كەلەتىن جاس ىزدەنۋشىلەرگە نەگىزگى قۇجات كوزى بولىپ تابىلادى دەپ ويلايمىز.
