جوبا ۇيىمداستىرۋشىلارى مۇنداي جاڭاشىلدىق اتا-انالاردىڭ ۋاقىتىن ۇنەمدەۋگە كومەكتەسەدى جانە سىبايلاس جەمقورلىق تاۋەكەلىن جويادى دەگەن پىكىر ايتادى.
ءوتىنىشتى دۇرىس راسىمدەۋ ءۇشىن بالانىڭ ەلەكتروندى فوتوسۋرەتى, ونىڭ تۋ تۋرالى كۋالىگىنىڭ سكانەرلىك كوشىرمەسى جانە بالانىڭ دەنساۋلىق تولقۇجاتىنىڭ سكانەرلەنگەن 1, 17 جانە 18-ءشى بەتتەرى قاجەت. ءوتىنىش بەرۋشى قۇجاتتاردىڭ قاراۋعا قابىلدانعانى تۋرالى سمس-حابارلاما الادى.
بالاسى ءبىرىنشى سىنىپقا باراتىن اتا-انالارعا ونلاين-ءوتىنىمدى قالاي دۇرىس راسىمدەۋ كەرەكتىگى تۋرالى قاراعاندىنىڭ بارلىق مەكتەپتەرىندە وتكەن اتا-انالار جينالىسىندا ءتۇسىندىرىلدى.
جاڭا جۇيە تارتىبىنە ساي, ءبىرىنشى كەزەكتە تىركەلگەن مەكەنجايى بويىنشا تاڭدالعان مەكتەپكە قاتىستى وقۋشىلار قابىلدانادى. ال بالالارىن باسقا اۋداندا ورنالاسقان مەكتەپكە بەرگىسى كەلەتىندەر ءۇشىن كۆوتالىق ورىندار قاراستىرىلعان. بۇل ورىندار تامىزدىڭ 1-جۇلدىزىنان كەيىن بولىنەدى. بۇل رەتتە گيمنازيا مەن ليتسەيلەردە بالامەن اڭگىمەلەسۋ جانە تەستىلەۋ وتكىزۋگە قۇقىعى بولادى.
جاڭا جۇيە ءبىر سىنىپقا 25 بالادان ارتىق قابىلدانبايتىنداي ەتىلىپ جاسالعان. ال ەگەر سىنىپ ينكليۋزيۆتى بولسا, وندا وقۋشىلار سانى ازايتىلۋى مۇمكىن.
– بۇل جۇيەدە اتا-انالار قالاداعى رەيتينگتەرى كورسەتىلگەن بارلىق مەكتەپتىڭ ءتىزىمىن كورە الادى. سونداي-اق ولار بيىل ءبىرىنشى سىنىپ وقۋشىلارىن قابىلدايتىن بارلىق پەداگوگتارمەن ونلاين رەجىمىندە تانىسۋ مۇمكىندىگىنە يە. ياعني, بازادا ءار مۇعالىمنىڭ ماراپات, سانات جانە جەتىستىكتەر ءتىزىمى بار قۇجاتتاما بولادى. ەسكەرەتىن ءبىر جايت, ەگەر قابىلداۋ كەزىندە قانداي دا ءبىر قۇجات جەتىسپەسە, مەكتەپتىڭ ول بالانى قابىلداماۋعا قۇقى بولادى, – دەپ ءتۇسىندىردى قاراعاندى قالالىق ءبىلىم ءبولىمىنىڭ جالپى جانە ورتا ءبىلىم بەرۋ سەكتورىنىڭ مەڭگەرۋشىسى ناتاليا گولوۆينا.
بۇدان بولەك, الداعى ۋاقىتتا ەلەكتروندى جۇيەدە مەملەكەتتىك-جەكەمەنشىك ارىپتەستىك جۇيەسى بويىنشا جۇمىس ىستەيتىن جەكە مەكتەپتەر دە پايدا بولادى. قازىرگى تاڭدا وبلىس ورتالىعىندا جەكەمەنشىك بەس مەكتەپ جۇمىس ىستەيدى. مامىر ايىنىڭ سوڭىنا قاراي مەملەكەتتىك ءبىلىم بەرۋ تاپسىرىسىن ورنالاستىرۋعا بايقاۋ ۇيىمداستىرىلادى. ونىڭ تومەنگى سىنىپ وقۋشىلارىنا ارنالعان باعاسى 15 780 تەڭگەگە تەڭ. ال بۇل قارجىنىڭ قالعان بولىگىن اتا-انالار ءوز قالتاسىنان تولەيدى.
وتىنىشتەردى ەلەكتروندى تۇردە قابىلداۋ 29 تامىزعا دەيىن ءجۇرگىزىلەدى. ال بۇل مەرزىمدە ونلاين-ءوتىنىم بەرىپ ۇلگەرە الماعان اتا-انالار وقۋ مەكەمەسىنىڭ كەڭسەسىنە حابارلاسۋى كەرەك. بۇعان قوسا, جاقىن ارادا بالالاردى مەكتەپكە قابىلداۋ ماسەلەلەرى بويىنشا «جەدەل جەلى» جۇمىس ىستەي باستايدى.
قاراعاندى
