ونىڭ جارقىن ءبىر ۇلگىسىنە جۋىردا وزبەكستان رەسپۋبليكاسىنىڭ حورەزم وبلىسىمەن ناقتى ءارىپتەستىك كەلىسىمگە قول جەتكىزىلىپ, العاشقى قادامدار جاسالعانىن ايتقان ءجون. ايماق باسشىسى قۇمار اقساقالوۆ «اۋىلى ارالاس, قويى قورالاس» ىرگەلەس كورشى ەلدەن كەلگەن دەلەگاتسيانى قابىلداپ, بەرىك بايلانىس ورناتۋ سىندارلى كەزدەسۋدىڭ نەگىزگى وزەگىنە اينالدى. قۇمار ىرگەباي ۇلى ءوز سوزىندە قازاقستان وزبەكستان ءۇشىن سەنىمدى ستراتەگيالىق ءارىپتەس ەكەنىن اتاپ ءوتتى. «ءبىز وڭىرلىك دەڭگەيدە جۇمىس ىستەۋگە اركەز ءازىرمىز. ءبىرلەسكەن جوبالاردى جۇزەگە اسىرۋدىڭ مۇمكىندىكتەرى مول. قىزىلجاردىڭ توپىراعى قۇنارلى. جىلىنا شامامەن بەس ميلليون تونناداي ساپالى استىق جينالادى. 2017 جىلعا قاراعاندا ءوزبەكستانمەن ساۋدا-ساتتىق كولەمى 55 پايىزعا ۇلعايدى. كوبىنە بيداي ەكسپورتتالادى. ول جاقتان ماقتا-ماتا ونىمدەرى, جەمىس-جيدەك تاسىمالدانادى», دەدى ول.
حورەزم وبلىسى حوكيمىنىڭ ءبىرىنشى ورىنباسارى, دەلەگاتسيا جەتەكشىسى كۋدراتبەك يگامبەرگەنوۆتىڭ ايتۋىنشا, وبلىس ورتا ازياداعى ەڭ كونە ايماقتاردىڭ ءبىرى سانالادى. كولىك ينفراقۇرىلىمى جاقسى وركەندەگەن. جەمازىق, جىبەك, اينەك, كولىك شىعاراتىن كاسىپورىندار جۇمىس ىستەيدى. سىرتقى ساۋدا اينالىمى بيىل 242 ميلليون دوللاردى قۇراسا, قازاقستاننىڭ ەكسپورتى 72 ملن دوللار. جىلىنا 250 مىڭ توننا ماقتا, 490 مىڭ توننا بيداي, 1 ميلليون توننادان استام كوكونىس ءوندىرىلەدى. ۇرگەنىش, حيۋا سەكىلدى تۋريستىك قالالاردى قازاقستاندىقتار ءجيى تاماشالايدى.
قوس تاراپتىق جۇزدەسۋ بارىسىندا بىرىككەن ءوندىرىس وشاقتارىن سالۋ, كاسىپكەرلىك سالاعا تىڭ سەرپىن بەرۋ ماسەلەلەرى دە كەڭىنەن تالقىلانىپ, ءبىرقاتار ىنتىماقتاستىق قۇجاتتارعا قول قويىلدى.
ەكى ءوڭىردىڭ بيزنەس وكىلدەرى قاتىسقان القالى باسقوسۋدا وبلىس اكىمىنىڭ ءبىرىنشى ورىنباسارى مارات تاسماعانبەتوۆ ءىرى كومپانيالاردى سەنىمدى ارىپتەس بولۋعا شاقىردى. مايلى داقىلدار القابى ءبىر ميلليون گەكتارعا جەتىپ وتىر. جىلىنا 555 مىڭ توننا ءسۇت, 56 مىڭ توننا ەت وندىرىلەدى. وسىنشاما كول-كوسىر شيكىزاتتى ءوڭدۋمەن اينالىساتىن كاسىپورىندار از, دەي كەلىپ, مارات يمانباي ۇلى ينۆەستيتسيالىق احۋالى قولايلى ءوڭىردىڭ ارتىقشىلىقتارىنا, جەڭىلدىكتى سۋبسيديالار جايىنا توقتالىپ ءوتتى. حورەزم وبلىسى ينۆەستيتسيالار جانە سىرتقى ساۋدا باس باسقارماسىنىڭ باسشىسى انۆار داۋلەتوۆ ەركىن ەكونوميكالىق ايماقتار قۇرىلعانىن, ينۆەستورلار سالىق پەن كەدەندىك الىمداردان بوساتىلاتىنىن ايتتى. «Kazakhinvest» ۇك سولتۇستىك قازاقستان وڭىرلىك ديرەكتورىنىڭ ورىنباسارى دانيار شالاباەۆ بىرنەشە پروبلەمانى تالقىعا سالدى. بيدايدى تەرەڭدەتىپ وڭدەيتىن, زىعىر مايىن شىعاراتىن زاۋىتتار اۋاداي قاجەت. بىزدە قانت قىزىلشاسىن وسىرۋگە بارلىق العىشارتتار بار.ۇيرەك ەتىن ءوندىرۋ ارقىلى دا قىرۋار تابىس تابۋعا بولادى, دەدى ول.
«ۆ2ۆ» فورماتىندا ءوتكەن ىسكەرلىك ديالوگتا «يانگيبوزور تومورقا حيزماتي» اگروفيرماسىنىڭ وكىلى اليمبوي مادراحيموۆ وبلىستان اسىل تۇقىمدى ءىرى قارا مالى مەن قوي ساتىپ الاتىنىن مالىمدەسە, «سوكيركو س.ن.» جك ديرەكتورىنىڭ ورىنباسارى ەلەنا كيرياكوۆا فيرما مەكتەپ فورمالارىن تىگۋمەن اينالىساتىنىن, بۇدان بىلاي جەيدەلەر, سپورتتىق كيىمدەر, تاعى باسقا دايىن تاۋارلاردى حورەزمگە يمپورتتايتىندارىن جەتكىزدى. شۇلىق شىعاراتىن جەرگىلىكتى «Matex» سەرىكتەستىگى بالالار مەن مەكتەپ فورمالارىن تىگەتىن ماتا, ءجىپ ساتىپ الۋعا, حورەزم ساۋدا ءۇيىن اشۋعا ۋاعدالاستى.
وزبەكستاندىق كاسىپكەرلەر وبلىس ورتالىعىندا ەكى كۇن بويى اۋىلشارۋاشىلىق جارمەڭكەسىن ۇيىمداستىرىپ, جەمىس-جيدەك, بال ونىمدەرىن, توقىما جانە قىش بۇيىمدارىن قولجەتىمدى باعاعا ۇسىندى. ساتىلىمعا 55 مىڭ توننادان استام اۋىلشارۋاشىلىق ءونىمدەرى شىعارىلىپ, قاربىز, قاۋىن, ورىك, شابدالى, شيەگە سۇرانىس كوپ بولدى.
سولتۇستىك قازاقستان وبلىسى
