ل. بيۋرابەكوۆا اتاپ وتكەندەي, قازىرگى كەزدە مينيسترلىك قازاقستاندا اينالىمعا تۇسكەن ءدارى-دارمەكتەر مەن مەديتسينالىق بۇيىمداردىڭ ساپاسى مەن قاۋىپسىزدىگىن باقىلاۋدى كۇشەيتۋ بويىنشا جۇمىستاردى جۇرگىزىپ جاتىر. وسىعان بايلانىستى, ءدارى-دارمەكتەردىڭ باعاسىن رەتتەۋ, دارىلەردى رەتسەپتى ارقىلى بوساتۋ جانە جالعان دارىلەر جاساۋمەن كۇرەس بويىنشا شارالاردى كۇشەيتۋگە قاتىستى بىرقاتار زاڭنامالىق اكتىلەرگە وزگەرىستەر ەنگىزىلدى.
دەنساۋلىق ساقتاۋ مينيسترلىگىنە بارلىق ءدارى-دارمەكتەردىڭ باعاسىن رەتتەۋ قۇزىرەتىن بەرەتىن زاڭ نورماسى كۇشىنە ەندى.
«دارىلەردىڭ باعاسىن رەتتەۋ ەرەجەسى ازىرلەندى, شەكتى كوتەرمە جانە بولشەك ساۋدا باعاسى كورسەتىلگەن بۇيرىق جاسالدى, ول زاڭنامادا بەلگىلەنگەن ءتارتىپ بويىنشا راسىمدەردەن وتكىزىلۋدە جانە شىلدە ايىندا بولشەك ساۋدا جەلىسىندە ساتۋ ءۇشىن دارىلەردىڭ باعاسى بەكتىلەتىن بولادى», — دەدى ل. بيۋرابەكوۆا.
دەنساۋلىق ساقتاۋ مينيسترلىگىنىڭ مالىمەتتەرىنە سايكەس, قابىلدانعان شارالار ءدارى-دارمەكتەر باعاسىن رەتتەۋگە مۇمكىندىك بەرەدى.
«باعالار بەلگىلەنگەن شەكتى باعالاردان تومەن بولا الادى, بىراق جوعارى بولماۋى ءتيىس. ءاربىر ءدارى-دارمەكتىڭ ساۋدالىق اتاۋىنا شەكتى باعالار قويىلادى جانە ولاردىڭ قۇنى ەلىمىزدىڭ قانداي ءوڭىرى ەكەنىنە قاراماستان, بىردەي بولادى. بىردەي اتاۋى بار ءدارى-دارمەك ەلىمىزدىڭ بارلىق وڭىرىندە بىردەي باعادا بولادى», — دەدى ل. بيۋرابەكوۆا.
سونىمەن قاتار, باعالاردى رەتتەۋ ەرەجەلەرىن بۇزعانى ءۇشىن سۋبەكت ساناتىنا قاراي, 70 اەك-تەن 1000 اەك-كە دەيىن (2019 جىلى 176 750 تەڭگەدەن 2 525 000 تەڭگەگە دەيىن) ايىپپۇل تۇرىندە اكىمشىلىك جاۋاپكەرشىلىك, سونداي-اق فارماتسەۆتيكالىق قىزمەتكە ليتسەنزيانىڭ ارەكەتىن جويۋ قاراستىرىلعان.
تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ ءتورايىمى ل. بيۋرابەكوۆانىڭ ايتۋىنشا, اتالعان وزگەرىستەر ساپالى ءدارى-دارمەكتەردىڭ ازاماتتارعا قولجەتىمدىلىگىن قامتاماسىز ەتەدى, ال باعالاردى رەتتەۋدى ەنگىزۋ رەسپۋبليكانىڭ بارلىق وڭىرىندە بىرىڭعاي باعا ساياساتىنا اكەلەدى.
