قازاقستان • 13 ماۋسىم، 2019

ءدارى-دارمەكتەردى QR-كودپەن تاڭبالاۋ جالعان دارىلەر جاساۋ فاكتىلەرىنىڭ الدىن الادى - دسم

139 رەت كورسەتىلدى

بۇگىن ۇكىمەتتىڭ ءباسپاسوز ورتالىعىندا وتكەن بريفينگتە دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى توراعاسىنىڭ ورىنباسارى نۇرلىبەك اسىلبەكوۆ ءدارى-دارمەكتەردى تاڭبالاۋعا قاتىستى اتقارىلىپ جاتقان جۇمىستار تۋرالى ايتىپ بەردى. بۇل تۋرالى پرەمەر-ءمينيستردىڭ ءباسپاسوز قىزمەتى حابارلادى.

كوميتەت باسشىسىنىڭ ورىنباسارى اتاپ وتكەندەي، ءدارى-دارمەكتەردى QR-كودپەن تاڭبالاۋ تۋرالى شەشىم پيلوتتىق جوبانىڭ قورىتىندىسى بويىنشا قابىلداناتىن بولادى.

«ءدارى-دارمەكتەردى تاڭبالاۋ بويىنشا ەۋرووداق اياسىندا بۇل تۋرالى كەلىسىمگە قول قويىلعان. ءبىز وسى سالاداعى قاۋىمداستىقتارمەن، «اتامەكەن» ۇكپ-مەن كەڭەسە وتىرىپ، دارىلىك زاتتاردى مۇنداي تاڭبالاۋدىڭ قاجەتتىلىگىن ماقۇلداپ وتىرمىز. ءبىز قازىر پيلوتتىق جوبانى ىسكە اسىرا باستادىق. سول جوبانىڭ قورىتىندىسىنان كەيىن عانا ءبىز شەشىم قابىلدايتىن بولامىز»، — دەدى ن. اسىلبەكوۆ.

ءدارى-دارمەكتەردى QR-كودپەن تاڭبالاۋدى رەسەي 2020 جىلى ەنگىزۋدى جوسپارلاپ وتىر، وندا مۇنداي پيلوتتىق جوبا ءۇش جىل بويى جۇرگىزىلگەن. ال قازاقستاندا ازىرگە ونى ىسكە اسىرۋدا تۋىنداپ وتىرعان بىرقاتار ماسەلەلەر بار.

«ونداي ماسەلەلەردىڭ قاتارىنا ءدارى-دارمەكتەردىڭ قىمباتتاۋىن، وتاندىق ءدارى-دارمەك وندىرۋشىلەردىڭ تاڭبالايتىن جابدىقتاردى ساتىپ الۋ قاجەتتىگىن جاتقىزۋعا بولادى. سوندىقتان ءبىز الدىمەن پيلوتتىق جوبانى ىسكە قوستىق. سول جوبانىڭ قورىتىندىسى بويىنشا عانا ءبىز بۇل ماسەلەگە قاتىستى شەشىم قابىلدايتىن بولامىز. ءبىز قازىر مۇنىڭ ءبارى بىردەن ىسكە اسادى دەپ ايتا المايمىز»، — دەپ ناقتىلادى كوميتەت توراعاسىنىڭ ورىنباسارى.

دارىلىك زاتقا QR-كود تىركەلگەننەن كەيىن، ونىڭ وندىرۋشىدەن ديستريبيۋتورعا، ودان دارىحاناعا دەيىن جەتكىزىلۋىن قاداعالاپ وتىرۋعا مۇمكىندىك تۋادى.

«جالعان دارىلەر جاساۋ، كونترفاكتىلىك وقيعالار، ءدارى-دارمەكتەردى ەسەپكە الۋ – بۇل جۇمىستاردىڭ بارلىعىن وسى ارقىلى قامتيتىن بولامىز. قويماداعى كەپىلدىك كومەك ارقىلى بەرىلەتىن تەگىن دارىلەردىڭ قانشا كولەمى بار ەكەنىن، ونى ءبىر اۋماقتان ەكىنشى اۋماققا جىبەرىلۋىن دە دارىلەردى تاڭبالاۋدىڭ كومەگىمەن قاداعالايتىن بولامىز»، — دەدى نۇرلىبەك اسىلبەكوۆ.

ونىڭ ايتۋىنشا، دارىلەردى تاڭبالاۋ، ەڭ باستىسى، جالعان ءدارى جاساۋدى بولدىرمايدى جانە دارىلەردىڭ ساپاسى مەن تيىمدىلىگىن ارتتىرۋعا مۇمكىندىك بەرەدى.

سونىمەن قاتار سالا وكىلى ءدارى-دارمەكتەردىڭ رەتسەپتىسىز بوساتىلۋىنىڭ الدىن الۋعا قاتىستى قابىلدانىپ جاتقان شارالارعا دا توقتالدى. دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى تاراپىنان تەكسەرۋلەر پروفيلاكتيكالىق ماقساتتا جانە ازاماتتاردان شاعىم تۇسكەن جاعدايدا جۇرگىزىلەدى.

«وسىنداي جاعدايعا قاتىستى كوميتەت 2017 جىلى 50 فاكتىنى تىركەدى، وعان اكىمشىلىك-قۇقىقتىق كودەكس ارقىلى شارا قولدانىلدى. 2018 جىلى مۇنداي فاكتىلەر ەكى ەسەگە دەيىن ارتىپ، 90-عا جەتتى. ولارعا 20 ملن تەڭگەگە جۋىق كولەمدە ايىپپۇل سالىندى»، — دەدى سپيكەر.

ن. اسىلبەكوۆ بۇل رەتتە دارىلەردى ورىنسىز قولدانۋدىڭ زياندىعىن دا اتاپ ايتتى. قازىر انتيبيوتيكتەرگە قارسى توزىمدىلىك پايدا بولعاندىقتان، ەم قونباي، سىرقاتىنان ايىعا الماعان ناۋقاستار بار.

«ول تۋرالى دۇنيەجۇزىلىك دەنساۋلىق ساقتاۋ ۇيىمىنىڭ بىزگە بەرگەن ۇسىنىمدارى بار. سوندىقتان سوزىلمالى اۋرۋلارى بار ازاماتتار ەمدەۋ مەكەمەلەرىنە الدىن الا حابارلاسقانى دۇرىس»، — دەدى ول.

سوڭعى جاڭالىقتار

قازاقستاندا قانشا ادام ۆاكتسينا الدى

كوروناۆيرۋس • بۇگىن، 10:42

ۇقساس جاڭالىقتار