سانالى عۇمىرىنىڭ جارتى عاسىرعا جۋىق بولىگىن جۋرناليستيكا سالاسىنا ارناپ كەلە جاتقان جاكەڭدى رەسپۋبليكا جۇرتشىلىعى «ماعجانتانۋشى» رەتىندە دە جاقسى بىلەدى. قازاقستان جازۋشىلار وداعىنىڭ وبلىستىق فيليالىنىڭ توراعاسى, «ماعجان» ادەبي-كوركەم كوپشىلىك جۋرنالىنىڭ باس رەداكتورى, «قىزىلجار-اقپارات» جشس-ءنىڭ ديرەكتورى رەتىندە التى الاشتىڭ اقيىق اقىنىنىڭ ءومىرى مەن شىعارماشىلىعى تۋرالى قازاق, ورىس تىلدەرىندە بىرنەشە جيناق, ەنتسيكلوپەديا شىعاردى. «قوجابەرگەن», «ماڭگىلىك ەلدىڭ ماڭگىلىك ماقتانىشى», «داۋىلپاز بابا قوجابەرگەن» كىتاپتارىن باسپاعا ازىرلەدى. ونداعان اڭگىمە مەن پوۆەستەر, ەسسەلەر جيناقتارىنىڭ اۆتورى. رەسپۋبليكا جۋرناليستەر وداعى سىيلىعىنىڭ لاۋرەاتى. ەكىنشى دارەجەلى «دوستىق», «قۇرمەت» وردەندەرىمەن ماراپاتتالعان.
القالى باسقوسۋدى عىلىم جانە يننوۆاتسيالار جونىندەگى پرورەكتور, تاريح عىلىمدارىنىڭ دوكتورى اقمارال ىبىراەۆا جۇرگىزىپ, ءبىرىنشى ءسوزدى ل. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ پروفەسسورى سەرىك نەگيموۆقا بەردى. تانىمال عالىم جاراسباي قابدوللا ۇلىنىڭ ءبىر بويىنا توعىستىرعان ازاماتتىق قاسيەتتەرى ىشىنەن پارلامەنت ءماجىلىسىنىڭ دەپۋتاتى بولعان كەزەڭدە ءتىل, ءدىل ءۇشىن بولعان كۇرەستە ار-نامىستان تايماعان ماقساتكەرلىك, رۋحاني بيىك, ويى تەرەڭ بولمىسىن دارالاپ ايتتى. فيلولوگيا عىلىمدارىنىڭ دوكتورى زينايدا تاباكوۆا, قازاق فيلولوگياسى كافەدراسىنىڭ مەڭگەرۋشىسى جانباي قادىروۆ, بالا كەزدەن بەرگى دوسى, اقىن توقتار زىكىرين, اۋىلداسى بالدىرعان ءىلياسوۆ, شاكىرتى, «سولتۇستىك قازاقستان» گازەتىنىڭ باس رەداكتورى ەرباقىت امانتاي, تاعى باسقالارى ەل سەنىمىنە لايىق تۇلعانىڭ شىعارماشىلىعى, جاس جۋرناليستەرگە بەرگەن ونەگەسى مەن تالىمگەرلىك قامقورلىعى جايلى كەڭىنەن تولعانا سىر شەرتتى. جۋرناليستيكا ءبولىمىنىڭ تۇلەكتەرى جاكەڭنىڭ اڭگىمەلەرىن مانەرلەپ وقىپ, قۇلاق قۇرىشىن قاندىردى.
اقمارال عوسمانقىزى عىلىم كەڭەس شەشىمىمەن جاراسباي قابدوللا ۇلىنا قۇرمەتتى پروفەسسور اتاعى بەرىلگەنىن جاريالاپ, سالتاناتتى تۇردە تابىس ەتتى.
«دوڭگەلەك ۇستەل ج. سۇلەيمەنوۆتىڭ شىعارماشىلىعىنا ارنالعان ستۋدەنت-جاستار سايىسىن قورىتىندىلاپ, سەرتيفيكاتتار تاپسىرۋمەن اياقتالدى.
