ءتىپتى مۇندا 30 وتباسىنا ارنالعان جاتاقحانا دا سالىندى. بۇگىندە فەرمادا قۇرتتاردىڭ كومەگىمەن مالدىڭ قيىن تولىقتاي قايتا وڭدەۋ جۇمىستارى جۇرگىزىلۋدە. وسى ارقىلى تەزەكتى تاپ-تازا گۋمۋسقا, ياعني پايداسى وتە كوپ قاراشىرىككە اينالدىرۋ تەحنولوگياسى قولعا الىندى. سيرەك كەزدەسەتىن كاسىپ يەسىنىڭ ايتۋىنشا, مۇنداي تاسىلمەن ەكى اپتا ۋاقىت ىشىندە 300-350 كيلوداي قالدىقتى گۋمۋسقا, ياعني تاپتىرماس تىڭايتقىشقا اينالدىرۋعا بولاتىن كورىنەدى.
بۇدان ءارى قۇرتتاردى كەپتىرىپ ۇنتاقتاسا, ودان تابيعي پروتەين الۋعا بولادى. وسى ارادا كاسىپكەر كۇنىنە ءبىر تونناداي پروتەين ءوندىرۋدى ماقسات تۇتىپ وتىرعانىن جەتكىزدى. كەيىنگى جىلدارى الەمنىڭ كوپتەگەن ەلىندە جاۋىن قۇرتتارىن وندىرۋگە كوڭىل ءبولىنىپ كەلەدى. ينتەرنەت كوزدەرىنەن الىنعان دەرەكتەر بۇل كاسىپ باتىس پەن شىعىس ەۋروپادا, اقش پەن جاپونيادا جانە وڭتۇستىك شىعىس پەن ازيا ەلدەرىندە كەڭىنەن تارالعانىن كورسەتەدى. بۇل ونىمدەر اتالعان ەلدەردە وسىمدىك پەن باۋ-باقشا شارۋاشىلىعىندا قولدانىلادى ەكەن.
ال تمد ەلدەرى اراسىندا قۇرت ءوسىرۋ ورگانيكالىق قالدىقتاردى پايداعا اسىرۋدىڭ تاپتىرماس ءتاسىلى ەكەنىن دالەلدەپ جۇرگەن اقتوبەلىك كاسىپكەر گايك تەرتەريان مەن وسى سيرەك كاسىپ سالاسىنداعى تەحنولوگ-مامان ميحايل كراسوۆسكي دەسەك قاتەلەسە قويماسپىز.
قازىرگى كەزدە گايك تەرتەرياننىڭ شارۋاشىلىعىندا 3 ملن-نان استام قۇرت بار ەكەن. ءبىر قاراعاندا قوماقتى سەكىلدى بولىپ كورىنگەنىمەن, ونىڭ ايتۋىنشا بۇل وندىرىستىك پوپۋلياتسيا دەڭگەيىنە جەتۋ ءۇشىن تىم ازدىق ەتەتىن كورىنەدى. سوندىقتان دا سيرەك كاسىپ يەلەرى الداعى جىلى قۇرت سانىن ءجۇز ميلليونعا جەتكىزۋدى جوسپارلاپ وتىر. بۇگىندە ولار وسى ءىستى كاسىبي جولعا قويا بىلگەن ەلدەردىڭ تاجىريبەسىمەن تانىسىپ, بىلىكتىلىگىن جەتىلدىرمەك.
ادەتتە ورگانيكالىق زاتتاردىڭ ءشىرۋ ۇدەرىسى ۇزاق جىلدارعا سوزىلاتىنى بەلگىلى. جاۋىن قۇرتتارى وسى ۋاقىتتى بىرنەشە ەسە جىلدامداتا الادى. ءسويتىپ از ۋاقىتتىڭ ىشىندە كادىمگى قارا قي مەن تەزەكتى تازا دا قاراپايىم ادىسپەن اسا باعالى قارا ءشىرىندى تىڭايتقىشقا اينالدىرۋدى ماقسات ەتكەن اقتوبەلىك كاسىپكەر گايك تەرتەرياننىڭ كاسىبى قولداۋعا ابدەن لايىقتى.
اقتوبە وبلىسى,
العا اۋدانى,
بەستاماق اۋىلى
