جەكە كاسىپكەر الەكساندر ۆورونوۆتىڭ قارجىلىق دەمەۋىمەن زاماناۋي «يزۋمرۋدنوە» دەمالىس بازاسى ءبىر جىلدا سالىندى.
«تۋريستىك نىساندا دەمالۋشىلارعا بار جاعدايدىڭ جاسالعانى قۇپتارلىق. ىستىق جانە ساپالى اۋىز سۋ, اباتتاندىرىلعان جاعاجاي, بالالار الاڭقايى بار. بارلىق دەمالىس بازالارى وسىنداي دەڭگەيدە بولۋى ءتيىس», دەدى قۇمار ىرگەباي ۇلى.
سونداي-اق ءوڭىر باسشىسى «شالقار سۋ» ءساناتوريىنىڭ جايىمەن دە تانىستى. جاڭا ينۆەستور قالپىنا كەلتىرۋ شارالارىنا 1 ميلليارد تەڭگە بولگەن. مۇنداعى ەمدەۋ ورنى 200 دەيىن ادامدى قابىلداي الادى. 50 ادام ەڭبەك ەتەدى. ساناتوريدە رادون جانە سازبەن ەمدەيدى, جانىندا تۇزدى كول ورنالاسقان. كاسىپوداق جولدامالارى بويىنشا مۇعالىمدەر, دارىگەرلەر, ارداگەرلەر وسىندا دەمالاتىن بولادى.
بۇگىندە يمانتاۋ-شالقار كۋرورتتى ايماعىندا 38 تۋريستىك نىسان بار. بىلتىردان بەرى 411 ميلليون تەڭگەنىڭ 10 جوباسى جۇزەگە اسىپ كەلەدى. جىل اياعىنا دەيىن تاعى 7 دەمالىس بازاسى اشىلماق.
ينفراقۇرىلىمدى دامىتۋعا دا ۇلكەن كوڭىل بولىنگەن. جولداردى جوندەۋگە 3 ميلليارد تەڭگە قاراستىرىلعان. «ۆيزيت ورتالىعى» سالىنىپ, يمانتاۋ كولىنىڭ جاعالاۋى قالىپقا كەلتىرىلەدى. بوتاي مادەنيەتىنىڭ مۇراجايى دا قۇرىلادى.
