سەنات باسشىسى قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا بايقاۋشى رەتىندە قاتىسقانى ءۇشىن العىس ءبىلدىردى. ول سايلاۋ ناۋقانى اشىق وتكەنىن جانە سايلاۋعا مونيتورينگ ءجۇرگىزۋ ءۇشىن بارلىق جاعداي جاسالعانىن اتاپ ءوتتى.
كەزدەسۋدە تاراپتار ءتۇرلى باعىت بويىنشا ەكىجاقتى ىنتىماقتاستىقتى نىعايتۋدى كوزدەيتىنىنە توقتالدى. ءوتكەن جىلدىڭ مامىر ايىندا «قازاتومونەركاسىپ» ۇاك پەن شۆەدتىك «ۆاتتەنفولل» ەنەرگەتيكالىق كومپانياسى اراسىنداعى كەلىسىمشارت بويىنشا قازاقستاندىق ۋران جەتكىزىلگەن بولاتىن. قازاقستاندىق ءونىم ءۇشىن شۆەد نارىعى وسىلاي اشىلعان ەدى. سەنات باسشىسىنىڭ پىكىرىنشە, يندۋستريا, IT جانە جاسىل تەحنولوگيالار, ەكوتۋريزم ءوزارا ءىس-قيمىلدىڭ كەلەشەگى زور باعىتتارى بولۋى ىقتيمال.
كەزدەسۋ بارىسىندا حالىقارالىق كۇن تارتىبىندەگى جاھاندىق ماسەلەلەر تالقىلاندى. سەنات باسشىسى ك.حارستەدتىڭ شۆەتسيا ۇكىمەتىنىڭ سولتۇستىك كورەيا جانە ميانما ءماسەلەلەرى جونىندەگى ارناۋلى ءۋاكىلى رەتىندەگى بەلسەندى قىزمەتىن اتاپ ءوتتى. «كحدر-دى ءۇنقاتىسۋعا تارتۋ جونىندەگى ءسىزدىڭ كۇش-جىگەرىڭىزگە قولداۋ ءبىلدىرەمىز, بىرلەسىپ جۇمىس ءىستەيتىن ىقتيمال الاڭ رەتىندە نۇر-سۇلتان قالاسىن, اتاپ ايتقاندا قازاقستاننىڭ تۇڭعىش پرەزيدەنتى قورىن ۇسىنامىز, وندا ءبىتىمگەرشىلىك جونىندەگى قىزمەتتە مول تاجىريبەسى بار ماماندار جۇمىس ىستەيدى», دەدى د.نازارباەۆا.
