...العىس ايتادى
اۋىل بالالارىنا جاسالعان تارتۋ
«تۋعان جەر» دەگەن كەزدە ءاربىر پەرزەنتتىڭ جۇرەگىندە تۋلاعان شابىت پەن سەزىم ۇيالايتىنى انىق. سەبەبى ادام ءوز تۋعان جەرىنىڭ جاراتقان سىيى, سول دارحان دالانىڭ تۋماسى. تۋعان جەرگە دەگەن سەزىم مەن ماحابباتتىڭ ولشەمى شەكسىز. وسى ءبىر ەرەكشە پاتريوتتىق سەزىمدى ءاربىر ازامات پەن جاستاردىڭ بويىنا ەتەنە ءسىڭىرۋ ءۇشىن, ەلباسى «بولاشاققا باعدار: رۋحاني جاڭعىرۋ» ماقالاسىندا ورىندالۋ كەرەك مىندەتتەردىڭ ىشىندە «تۋعان جەر» باعدارلاماسىن ۇسىندى. وسى باعدارلامانى جۇزەگە اسىرۋ ماقساتىندا اقمولا وبلىسى, قورعالجىن اۋدانى, جانتەكە اۋىلىنىڭ ازاماتتارى ءوز تۋعان جەرىنە تاماشا تارتۋ جاسادى. اۋىل بالالارىنىڭ سپورتقا ۇلەسىن قوسۋعا ۇلكەن مۇمكىندىك جاساپ, كۇرەس زالىن اشتى. العاشقى باستامانى تۇرعىلىقتى اتا-انالار مەن اۋىل جاستارى جانە قاراشالعىن اۋىلدىق وكرۋگىنىڭ اكىمدىگى باستاسا, ونى ءارى قاراي جانتەكە اۋىلىنىڭ تۇلەكتەرى قولدادى.
يگى باستامالار بۇگىنگى جانە ەرتەڭگى ۇرپاققا ۇلگى بولارى انىق. ونەگەسى مەن تاربيەسى مول اۋىل مەكتەبى قانشاما ەلىم, وتانىم دەپ جۇرەكتەرى سوعاتىن تۇلعالاردى قاناتتاندىردى. «جاقسىنىڭ جاقسىلىعىن ايت, نۇرى تاسىسىن» دەگەندەي, اۋىل بالالارىنا جاسالعان تارتۋعا ءوز ۇلەستەرىن قوسقان بارشا ازاماتتارعا شەكسىز العىسىمدى ايتامىن. بولاشاقتا سپورت سالاسىندا وزىندىك قولتاڭباسىن قالدىراتىن, تورتكۇل الەمدە ەلىمىزدىڭ تۋىن جەلبىرەتەتىن ناعىز چەمپيون اۋىلدان شىعاتىنىنا كامىل سەنەمىن.
قارلىعاش اسانوۆا,
«قىزىلتۋ» ورتا مەكتەبىنىڭ ديرەكتورى
اقمولا وبلىسى
...اسەرىمەن بولىسەدى
«ارتىق ءبىلىم – كىتاپتا»
حالقىمىز ونەر مەن ءبىلىمدى ەرەكشە قادىرلەگەن. بۇگىنگى تاڭدا بارلىق قوعامنىڭ الدىندا تۇرعان باستى ماقسات – ءبىلىمدى ۇرپاق تاربيەلەۋ. ال ۇرپاق ءبىلىمدى قايدان الادى؟ كىتاپتان. «كىتاپپەن دوستاسساڭ كوپ بىلەسىڭ» دەمەكشى, اتا-بابالارىمىز كىتاپتى ەرەكشە اقىلشى ۇستاز ساناعان. كىتاپ – ءتىلسىز تاربيەشى, رۋحاني ازىق قۇرالى دەسەك, كىتاپحانا – ءتىلسىزدى سويلەتە الاتىن, رۋحقا كۇش بەرەتىن كيەلى مەكەن.
قازىردە كىتاپحانا تىنىسى كۇن سايىن كەڭەيۋدە. كىتاپ ۇسىنىپ قانا قويماي, ۇلى تۇلعالاردى ناسيحاتتاپ, ەڭبەكتەرىن ەلەپ, شىعارمالارىن تانىستىرىپ, كىشكەنە بولسا دا جاستار ساناسىنا ءسىڭىرتىپ, ۇلگى ەتۋدە. ءار مەرەكەنى, اتاۋلى كۇندەردى ۇلكەن شاراعا اينالدىرىپ تاربيەلىك ءمانى بار اڭگىمەلەر قوزعالادى. وسىنداي يگى شارانى س.جيەنباەۆ اتىنداعى وبلىستىق جاسوسپىرىمدەر كىتاپحاناسى بالالار كىتابى كۇنىنە وراي بەلسەندى كىتاپحانا وقىرماندارىمەن اتاپ ءوتتى. شاراعا بەلسەندى جاستار, ياعني تۇراقتى كىتاپحانا وقىرماندارى قاتىسىپ, ءوز ونەرلەرىن ورتاعا سالدى.
«كىتاپ – تاريح, شەجىرە» اتتى دەفيلە اياسىندا, وزدەرى وقىعان جاڭا كىتاپتارىن سانىمەن كورسەتىپ, ساحنا تورىندە كىتاپتىڭ كەيىپكەرلەرىن تانىستىرىپ, تاقىرىپ توڭىرەگىندە مازمۇنداپ بەردى.
جىلىنا 40-50 دانا كىتاپ وقىپ, تىلدىك قورىن كوبەيتىپ, كۇشپەن ەمەس, بىلىمدەرىمەن توپتى جارىپ جۇرگەن جاستار ەكى توپقا ءبولىنىپ, «حح عاسىر كىتاپتارىمەن ءححى عاسىر زاماناۋي كىتاپتاردىڭ ايىرماشىلىعى» تۋرالى دەبات وتكىزدى. دەباتتا حح عاسىرداعى «الدار كوسە» كىتابىمەن زاماناۋي «گارري پوتتەر» كىتابىنىڭ قايسىسى جاستاردى قىزىقتىراتىنى تۋرالى پىكىرتالاسقا ءتۇستى
بيبىگۇل شامەدەنوۆا
اقتوبە
...ءۋاج كەلتىرەدى
كوڭىلدە قالدى سانسىز سۇراق...
«جۇرە بەرسەڭ, كورە بەرەسىڭ» دەپ دانا حالقىمىز تەككە ايتپاسا كەرەك. دەنساۋلىق جاعدايىنا بايلانىستى ەم-دوم الۋ ماقساتىمەن جولداماعا قول جەتكىزىپ, كوكتەرەك كەنتىندەگى «اسىل بۇلاق» شيپاجايىنا دا جەتتىك. كەلگەنىمىزدى قايتەيىك, مۇندا ءبىزدى «الىس جولدان شارشاپ كەلدى-اۋ» دەپ جىلى قارسى الا قويعان ەشكىم بولعان جوق. ۇزاق جولدان شارشاپ ءارى اۋىرىپ كەلگەنىمىزدى ايتقانداي بولىپ ەدىك, وعان دا سەلت ەتە قويعان ەشكىمدى كورمەدىك. نە كەرەك, تاڭەرتەڭ كەلگەن ءبىز تۇسكە دەيىن كۇتىپ, ارەڭ دەگەندە ورىن الدىق. «باقساق باقا ەكەن» دەمەكشى, باسشىلىقتىڭ بەيقامدىعى سالدارىنان مۇندا كەلىپ ەمدەلۋشىلەردىڭ جاتاتىن ورنى الدىن الا دايىندالماعان كورىنەدى. ءدال سول ءبىز بارعان كۇنى كەيبىر ەمدەلۋشىلەر تاراپىنان اسحانانىڭ تاعام مازىرىنە سىن ايتىلىپ جاتقانىن دا ءوز قۇلاعىمىزبەن ەستىدىك. بار-جوعى الپىس شاقتى ادامعا ارنالعان شيپاجايدا ەم الۋ ءۇشىن اياداي عانا دالىزدە كەزەك كۇتۋشىلەردىڭ قاتارى كوزگە ءجيى شالىنىپ ءجۇردى.
ايتۋشىلاردىڭ سوزىنە قاراعاندا, وسى ءبىر عانا سارىاعاش اۋدانىنا قاراستى كوكتەرەك كەنتىنىڭ وزىندە قىرىققا جۋىق ەمدەۋ ورىنى بار ەكەن. ەشقانداي قارسىلىعىمىز جوق, ولاردىڭ كوبى جاقسى, ارينە. الايدا, سول شيپاجايلاردىڭ كەيبىرىنىڭ ساپاسىز قىزمەتىنە قارنىمىزدىڭ اشاتىنى بولماسا.
شيپاجاي اتى «اسىل بۇلاق», كوڭىلدە قالدى سانسىز سۇراق...
كارىباي امزە ۇلى,
زەينەتكەر
تۇركىستان وبلىسى,
سوزاق اۋدانى
...ۇلگى تۇتادى
شەبەرلىك ساعاتىن وتكىزدى
«رۋحاني جاڭعىرۋ» اياسىندا جاستار جىلىنا وراي «اۋىلدار – جاستار استاناسى» جوباسى نەگىزىندە تۇششىبەكتە ماڭعىستاۋلىق اتاقتى قۇسبەگى, جاس ونەرپاز ايشۋاق تايمانوۆ ءوزىنىڭ شەبەرلىك سىنىبىن وتكىزدى.
شەبەرلىك ساعاتىندا قۇسبەگى ءوزىنىڭ بۇركىتىن, قارشىعاسىن, يتەلگىسىن جاستارعا تانىستىرىپ, قۇسبەگىلىكتىڭ قىر-سىرىن جان-جاقتى ايتىپ بەردى.
«مەن ەڭ العاش رەت ەكى قارشىعانى باعىپ ۇستادىم. سودان سوڭ بۇركىت ۇستاپ, قۇس باپتاۋدى ماقسات ەتتىم. كەرەمەت كاسىپتە ءوزىمنىڭ اتا-بابام سالعان سارا جولىمەن ءجۇرۋدى مۇرات تۇتىپ, بۇگىندە بالام مەرەيدى دايىنداپ كەلەمىن. بۇركىت پەن قارشىعا, يتەلگى دەگەن قۇستاردىڭ ارقايسىسى سۇڭقار تەكتەس بولىپ كەلەدى. مۇنىڭ ءوزى قازاق حالقىنىڭ اناۋ-مىناۋ قۇستى تاڭداماي ناعىز ۇشقىر مەن مىقتى قۇستاردى قولىنا ۇيرەتۋ ارقىلى دارحان دالانى ايالاپ, اڭشىلىقتى سەرىك ەتكەندىگىن كورسەتەدى», دەيدى قۇسبەگى ايشۋاق تايمان ۇلى.
«نەگىزى, بۇگىنگى شارانىڭ ماڭىزدىلىعى تەرەڭدە جاتىر. ەلباسىنىڭ «رۋحاني جاڭعىرۋ» باعدارلاماسى وسىنداي ۇمىتىلىپ بارا جاتقان اتا كاسىپتىڭ قايتا جاڭعىرۋىنا زور سەپتىگىن تيگىزەتىن بولادى. جاستار جىلىنا وراي باستالعان جوبانى قوس قولداپ قولدايمىن. وسىنداي ۇلتتىق ونەردى ۇلىقتاپ جۇرگەن, اۋىل جىگىتتەرىن ناسيحاتتاپ جۇرگەن جاستار ورتالىعىنىڭ ۇجىمىنا ۇلكەن العىس ايتقىم كەلەدى», دەيدى تۇششىبەك اۋىلىنىڭ تۇرعىنى ازامات قاپاروۆ.
اللابەرگەن قونارباەۆ
ماڭعىستاۋ وبلىسى
