اۋماقتا 663 سايلاۋ ۋچاسكەسى قۇرىلسا, 93-ءى وبلىس ورتالىعىندا ورنالاسقان. تاڭعى ساعات جەتىدە نۇرسۇلتان نازارباەۆ كوشەسى بويىندا قاتار ورنالاسقان ءۇش سايلاۋ ۋچاسكەسى ءوز ەسىكتەرىن ايقارا اشىپ, جاس سايلاۋشىلارعا, تۋعان كۇن يەلەرىنە سىي-سياپاتتارىن ۇسىندى. ولاردىڭ اراسىندا ەڭبەك ارداگەرلەرى دە, جاستار دا بولدى.
"بىردە-ءبىر سايلاۋدان قالىپ كورگەن ەمەسپىن. قازاقستاننىڭ كەلەشەگى, نەمەرەلەرىمنىڭ بولاشاعى وزگەلەر سەكىلدى مەنى دە بەيجاي قالدىرمايدى. ءبىر شاڭىراق استىندا تاتۋ-ءتاتتى ءومىر ءسۇرىپ جاتقان ۇلتتار مەن ۇلىستاردىڭ دوستىعى, بىرلىگى ءۇشىن داۋىس بەردىم" دەيدى سەكسەننەن اسسا دا ساياسي ەرىك-جىگەرى مۇقالماعان ماريا ۆاسيلەۆا. № 23 مەكتەپتە قۇرىلعان № 637 جانە №638 سايلاۋ ۋچاسكەلەرى بويىنشا ءۇش مىڭعا جۋىق سايلاۋشى تىركەلىپ, ءوز قۇقىقتارىن پايدالانىپ قالۋعا اسىققانى ولاردىڭ قالىڭ قاراسىنان بىردەن اڭعارىلادى. ءبىز وسى جەردە «امانات» ازاماتتىق پلاتفورماسىنىڭ وكىلى رۇستەم ارمانوۆتى, جالپىحالىقتىق سوتسيال-دەموكراتيالىق پارتيا اتىنان بايقاۋشى رەتىندە كەلگەن ليۋدميلا ريزوۆانى جولىقتىردى. ولار بەلسەندىلىكتىڭ جوعارى ەكەنىن, سايلاۋ زاڭ تالاپتارى شەڭبەرىندە ءوتىپ جاتقانىن جەتكىزدى. ءبىز ۇلتتىق ۇلان اسكەري ينستيتۋتىنا كەلگەندە № 946 سايلاۋ ۋچاسكەسىندە تىركەلگەن 946 سايلاۋشىنىڭ ۇشتەن ءبىرى ءوز تاڭداۋلارىن جاساعان ەكەن. ءوزىن باۋىرجان راشەۆ دەگەن تانىستىرعان جاس جىگىت اكەسى ەكەۋى «ۇلت تاعدىرى» قوزعالىسى اتىنان وكىلدىك العاندارىن, ۇيىمداستىرۋ شارالارى قاناعاتتاندىراتىنىن, ازىرگە زاڭ بۇزۋشىلىق ورىن الماعانىن جەتكىزدى.
بالالار شىعارماشىلىعى ورتالىعىندا ورنالاسقان № 595 سايلاۋ ۋچاسكەسىندە ايماق باسشىسى قۇمار اقساقالوۆ پەن 73-ءشى كانن كينوفەستيۆالىندە «ۇزدىك ايەل ءرولى» اتالىمىنىڭ جەڭىمپازى, بەلگىلى اكتريسا سامال ەسلياموۆا داۋىس بەردى. بۇل سايلاۋ ۋچاسكەسىندە 1416 ادام تىركەلسە, بىرەۋى سوعىس ارداگەرى, 20-ى – تىل ەڭبەككەرى. 56 ادام ءبىرىنشى رەت داۋىس بەرمەك. مۇمكىندىگى شەكتەۋلى 4 ادامعا ارنايى كابينا جابدىقتالعان. قۇمار ىرگەباي ۇلى جۋرناليستەرگە بەرگەن سۇحباتىندا پرەزيدەنت سايلاۋى ازاماتتىق ۇستانىمدى بiلدiرۋدiڭ, بولاشاققا تاڭداۋ جاساۋدىڭ ايقىن جولى ەكەنىن اتاپ كورسەتتى. "ەلىمىز دامۋدىڭ جاڭا كەزەڭىنە ءوتتى. بiز تاڭداعان كونستيتۋتسيالىق رەفورما, ەكونوميكالىق جانە قوعامدىق سانانى جاڭعىرتۋ باعدارلامالارى ايقىن. مەملەكەتتىڭ, اتقارۋشى بيلىكتiڭ حالىق الدىنداعى ەسەپتiلiگi, اشىقتىعى سەكىلدى ۇدەرىستەرگە تۇرعىندار بەلسەندىلىلىكپەن اتسالىسىپ, شەت قالماۋى ءتيىس. ەل بولىپ بiرىككەندە عانا ۇلكەن جەتىستىكتەرگە جەتە الامىز", - دەدى ءوز سوزىندە.
وبلىستىق سايلاۋ كوميسسياسىنىڭ توراعاسى ەربولات بەكشەنوۆ رەسپۋبليكالىق, ايماقتىق باق وكىلدەرىمەن وتكىزگەن بريفينگتە سايلاۋشىلارعا بارلىق جاعداي جاسالعانىن, سايلاۋ بارىسىن قاداعالاۋعا رەسەيدەن - 48, تمد-دان - 25, وبسە تاراپىنان 16 بايقاۋشىنىڭ كەلگەنىن, ءۇش ساعات ىشىندە 402 مىڭ سايلاۋشىنىڭ 14,2 پروتسەنتى ءوز تاڭداۋلارىن جاساعانىن مالىمدەدى. سايلاۋ وتەتىن ورىندار مۇمكىندىگى شەكتەۋلى جاندارعا ىڭعايلى بولۋ ءۇشىن پاندۋستارمەن جانە ارنايى داۋىس بەرەتىن كابينالارمەن جابدىقتالعان. الدىن الا تاپسىرىستارمەن ينۆاتاكسي جۇمىس ىستەيدى. اسكەري جانە مەديتسينالىق مەكەمەلەردە 12 جابىق سايلاۋ ۋچاسكەسى قۇرىلعان. ول «ءبىز بىرگەمىز» قوعامدىق بىرلەستىگىنىڭ جەتەكشىسى, ءبىرىنشى توپتاعى مۇگەدەك سەرگەي ساپكونىڭ بۇعان دەيىن ۇيىندە داۋىس بەرىپ كەلسە, بۇل جولى سايلاۋ ۋچاسكەسىنە ءوزى كەلىپ, تاڭداۋىن ايقىنداعانىن مىسالعا كەلتىردى.
شال اقىن اۋداندىق سايلاۋ كوميسسياسىنىڭ توراعاسى جانات امىرجانوۆپەن حابارلاسقانىمىزدا, تۇمەن وبلىسى قازاقتارى مادەني اۆتونومياسىنىڭ جەتەكشىسى ەسەنعالي يبراەۆ باستاعان بايقاۋشىلار توبى ەلدى مەكەندەردى ارالاپ جۇرگەنىن ايتتى.
ءبىز رەسەيدەن كەلگەن تاجىريبەلى حالىقارالىق بايقاۋشى يگور حالينمەن تەلەفون ارقىلى تىلدەسكەنىمىزدە سايلاۋ پروتسەسىنە كوزقاراسىن بىلاي ءبىلدىردى.
– قازاقستان حالقى پرەزيدەنت, پارلامەنت سايلاۋلارىندا ءاردايىم جوعارى ۇيىمشىلدىق پەن بىرلىكتىڭ ۇلگىسىن كورسەتىپ ءجۇر. بۇگىن دە رەسپۋبليكا جۇرتشىلىعىنىنىڭ جوعارى دەڭگەيدە قاتىساتىنىنا, ساياسي ناۋقاننىڭ ءادىل وتەتىنىنە سەنىمدىمىن.
وبلىستىق سايلاۋ كوميسسياسى بەرگەن اقپارات بويىنشا ساعات 12-دە بارلىق سايلاۋشىلاردىڭ ۇشتەن ءبىرى ءوز تاڭداۋلارىن جاسادى.
