بۇل كورسەتكىش وتكەن جىلعا قاراعاندا 12 ەسە كوپ. قازىر ءبىلىم وشاقتارىنا كۇردەلى جوندەۋ باستالىپ كەتكەن. ايماق باسشىسى قۇمار اقساقالوۆ جوندەۋدى قاجەت ەتەتىن مەكتەپتەردە بولىپ, اتقارىلىپ جاتقان جۇمىستاردىڭ بارىسىمەن تانىستى. باق وكىلدەرىنە بەرگەن سۇحباتىندا كەي عيماراتتاردا اۋقىمدى جوندەۋ جۇمىستارى مۇلدەم اتقارىلماعانىن اتاپ كورسەتتى.
«ءبىرىنشى كەزەكتە نىساننىڭ شاتىرى, تەرەزەلەرى مەن جىلىتۋ جۇيەسى اۋىستىرىلۋى قاجەت. جارىقتاندىرۋعا دا اسا ءمان بەرەتىن بولامىز. «بالالارعا جىلى, جارىق ءارى ىڭعايلى بولۋى كەرەك. باستى ۇستانىم وسى. وقۋشىلار سىنىپتاردا توڭىپ وتىراتىن جايتتار از ۇشىراسپايدى. بۇدان كەيىن قانداي وقۋ ساپاسى جايلى ايتۋعا بولادى؟», دەدى قۇمار ىرگەباي ۇلى.
ءوڭىر باسشىسى قالا اكىمدىگىنە, ءبىلىم باسقارماسى مەن مەردىگەرلەرگە قاراجاتتى ماقساتتى جۇمساۋدى تاپسىردى. ءبىر-ەكى جىلدان كەيىن سىر بەرىپ جاتسا قاتاڭ شارالار قولدانىلاتىن ەسكەرتتى.
اسىعىستىققا سالىنعان قۇرىلىسشىلار تاراپىنان ولقىلىقتار ءجيى جىبەرىلەدى. وعان جول بەرمەۋگە مىندەتتىمىز. ماسەلەن, تەرەزە دۇرىس سالىنباسا مەردىگەر ايىپپۇل تولەۋى ءتيىس, دەگەن وبلىس اكىمى تىكەلەي ءوزى قاداعالاۋعا الاتىنىن قاداپ ايتتى.
قالپىنا كەلتىرىلەتىن 120 مەكتەپتە 35 مىڭ بالا وقيدى ەكەن. بۇل وڭىردەگى بارلىق وقۋشىلاردىڭ تەڭ جارتىسىنا جۋىعى.
