اۋىل شارۋاشىلىعى ءمينيسترى ارال اۋدانىندا بالىق وڭدەۋ زاۋىتىنىڭ جۇمىسىمەن تانىستى. بۇل كاسىپورىندا جىلىنا 6 مىڭ توننا ءونىم وندىرىلەدى. زاۋىتتا 60 ادام, ال ماۋسىمىندا 100-گە جۋىق ادام جۇمىس ىستەيدى. زاۋىتتىڭ ونىمدەرى رەسەي, قىتاي, وزبەكستان, پولشا, گرۋزيا, ءازىربايجان, گوللانديا, گەرمانيا جانە دانياعا ەكسپورتتالادى.
سونىمەن قاتار, مينيستر قازالى اۋدانىنداعى تاۋلىگىنە 30 مىڭ توننا ءسۇت وندىرەتىن «رزا» اق ءسۇت-تاۋار كەشەنى مەن ءسۇت زاۋىتىنىڭ جۇمىسىن كوردى. زاۋىت ونىمدەرى قىزىلوردا, ماڭعىستاۋ, اتىراۋ, اقتوبە جانە باتىس قازاقستان وبلىستارىندا ساتىلادى.
سودان سوڭ مينيستر قارماقشى اۋدانىندا قورقىت اتا مەموريالدىق كەشەنىنە بارىپ, مۋزەيدىڭ جاڭارتىلعان ەكسپوناتتارىمەن تانىستى. ساپار بارىسىندا قر اۋىل شارۋاشىلىعى ءمينيسترى 1956 جىلى سالىنعان قىزىلوردا سۋ تورابىنا باردى.
شيەلى اۋدانىندا ساپارحان وماروۆ جاڭاقورعان جانە شيەلى اۋداندارىن سۋارمالى سۋمەن قامتاماسىز ەتۋ ماقساتىندا 2015 جىلى سالىنعان ۇرلەمەلى بوگەتتى ارالاپ كوردى. ەستەرىڭىزگە سالا كەتەيىك, جاڭاقورعان جانە شيەلى اۋداندارىنداعى ۇرلەمەلى بوگەتتەر قۇرىلىسىنىڭ ارقاسىندا ءوڭىر وڭتۇستىك اۋدانداردا پايدالانىلمايتىن 60 مىڭ گەكتار ەگىستىك جانە جايىلىمدىق جەرلەردى يگەرۋگە مۇمكىندىك الدى.
قر اۋىل شارۋاشىلىعى ءمينيسترىنىڭ جۇمىس ساپارى قارجى ينستيتۋتتارى باسشىلارىنىڭ, مال شارۋاشىلىعى بويىنشا عىلىمي-زەرتتەۋ ينستيتۋتتارىنىڭ جەتەكشى عالىمدارىنىڭ جانە قازاقستاننىڭ التى وبلىسىنان كەلگەن دەلەگاتتار قاتىسقان ءداستۇرلى مالشىلار سلەتىمەن قورىتىندىلاندى.
قىزىلوردا وبلىسى
