اۆستريانىڭ لەيبنيتس قالاسىندا وتكەن دزيۋدودان جاستار اراسىنداعى ەۋروپا كۋبوگى دوداسىندا قازاقستان كومانداسى ءساتتى ونەر كورسەتتى دەپ حابارلايدى Olympic.kz.
جاس دزيۋدوشىلارىمىز اۆستريا تورىنەن 1 التىن, 2 كۇمىس جانە 1 قولا مەدال جەڭىپ الدى.
قىزدار اراسىندا 48 كەلىدە بەلدەسكەن اقمارال ناۋاتبەك ەۋروپا كۋبوگىنىڭ التىن جۇلدەگەرى اتاندى. ول توپتىق اينالىمدا ءازىربايجان, برازيليا جانە گەرمانيا سپورتشىلارىن جەڭىپ, جارتىلاي فينالدا ءوز كوماندالاسى عاليا تىنىباەۆادان باسىم ءتۇستى. فينالدا اقمارال برازيليالىق لاۋرا فەرەيرادان مىقتىلىعىن دالەلدەپ, ءوز قاتارلاستارى اراسىندا كوش باستادى.
ال عاليا تىنىباەۆا قولا مەدال ءۇشىن وتكەن كەزدەسۋدە ۇلىبريتانيالىق سيان بوبروۆسكانى جەڭدى.
ەرلەر اراسىندا ەكى بالۋانىمىز فينالدا بەلدەسىپ, اقتىق سىندا قارسىلاستارىنا جول بەردى. 60 كەلىدەگى ءبىلال بولات ۆەنگريا, برازيليا جانە ءازىربايجان دزيۋدوشىلارىن جەڭىپ, جارتىلاي فينالدا ءابۋ-مۋسليم پارچيەۆتى جەڭگەن بولاتىن. وكىنىشكە قاراي, فينالدا برازيليالىق رەنان توررەسكە جول بەردى.
66 كەلىدە بەلدەسكەن ەرمەك امانگەلدى ىرىكتەۋ كەزەڭدەرىن بولگاريا, برازيليا جانە فرانتسيا بالۋاندارىن ۇتسا, جارتىلاي فينالدا لاتۆيالىق قارسىلاسىنان باسىم ءتۇستى. بىراق اقتىق سىندا ەرمەكتىڭ جاپونيالىق ايدا يۋدجيگە شاماسى جەتپەدى.
وسىلايشا, جاس دزيۋدوشىلارىمىز اۆستريادان ءتورت مەدالمەن ورالىپ وتىر.
