قوعام • 03 ماۋسىم، 2019

ونەگەلى اۋلەتتەرگە قۇرمەت كورسەتىلدى

740 رەت كورسەتىلدى

جاقىندا وسكەمەندە «مەرەيلى وتباسى» ۇلتتىق بايقاۋىنىڭ ايماقتىق كەزەڭى ءوتىپ، ونەرىمەن، تاربيەسىمەن، ۇلگى-ونەگەسىمەن دارالانعان وتباسىلارعا قۇرمەت كورسەتىلدى. وبلىستا وسىمەن التىنشى مارتە ۇيىمداستىرىلعان شاراعا بيىل ءوڭىردىڭ قالا-اۋداندارىنان 500 وتباسى قاتىسىپ، بايقاۋدىڭ وبلىستىق كەزەڭىنە توقساننان استامى جولداما الىپتى.

بايقاۋ قورىتىندىسىندا جارما اۋدانىنىڭ جارىق اۋى­لىنان كەلگەن مۇقاەۆتار وتباسى جەڭىمپاز اتاندى. «ءبىزدىڭ وتباسىمىزدىڭ ۇستانىمى – اسەمدىك الەمىندە ەڭبەك ەتىپ، ءومىر ءسۇرۋ. وسى قاعيدانى ءتا­ۋەل­­سىزدىك العان قيىنشىلىق جىلدارى دا ۇستاندىق. ءالى دە ۇستانىپ كەلەمىز»، دەيدى ونەگەلى، ونەرلى اۋلەتتىڭ ۇيىت­قىسى ناتاليا اۋباكىروۆا. بۇل كىسى قۇجاتتاعى اتى ناتاليا بولعانىمەن، اپاسى نۇرزەينەپ دەپ اتاعانىن ايتادى. بەس بالادان 14 نەمەرە ءسۇيىپ وتىرعان ەرلى-زايىپتىلاردىڭ شاڭىراق كوتەرگەندەرىنە 45 جىل تولىپتى. وتاعاسى مومىش مۇقاەۆ تۋعان اۋىلىندا ءومىر بويى مەحانيك، كينومەحانيك، اۆتوكلۋب مەڭگەرۋشىسى بولىپ ەڭ­بەك ەتسە، ناتاليا اۋباكىروۆا اۋىلدىق وكرۋگتەگى كوركەم­ونەر­پازداردىڭ مۋزىكالىق جە­تەك­شىسى. 

بايقاۋدا جۇلدەلى ەكىنشى ورىن وسكەمەندىك چەركاشيندەر وتباسىنا بۇيىردى. وتاسقان­دارىنا جيىرما جىل بولعان دميتري مەن ەۆگەنيا 12 بالا تاربيەلەپ وتىر. ون بالاسى ءالى كامەلەتتىك جاسقا تولماعان، ال ەكى بالاسى جوعارى وقۋ ورنىندا گرانتپەن وقيدى. وتاناسى ەۆگەنيا چەركاشينا – «التىن القا» يەگەرى. جاقىندا شىعىس قازاقستانعا جۇمىس ساپارىمەن كەلگەن ۇكىمەتتىك دەلەگاتسيا وسى شاڭىراققا ارنايى بارىپ، جاعدايلارىمەن تانىسقان-دى. «التاي اۋدانىندا تۇرعانبىز. وسكەمەنگە بىلتىر كوشىپ كەل­دىك. قالانىڭ شەت جاعىندا تۇرا­مىز. ءۇيىمىز تاۋدىڭ ەتەگىن­دە. اۋەلدە شاعىن بولاتىن، ءوز كۇشىمىزبەن اقىرىنداپ كە­ڭەي­تىپ جاتىرمىز. 0،2 گەكتار باق­شامىز بار. ماماندىعىم – گەولوگ. التايدا تۇرعاندا «قازتسينكتە» جۇمىس ىستەگەنمىن. ازداپ ەشكى ۇستايمىز. قىزدار سونى ساۋىپ، ءسۇتىن ساتادى. ۇل­­دار قورادان شىقپايدى. با­لانىڭ كوپ بولعانى قولىڭدى جۇمىستان بوساتادى. بۇعان دەيىن ەشكىمگە قول جايعان جوقپىز. ءوز وتباسىما ءوزىم جاۋاپتىمىن دەپ سانايمىن»، دەگەن ەدى سول كەزدە وتاعاسى.  

ۇلان اۋدانىندا تۇراتىن التى بالا تاربيەلەپ وتىرعان جۇماشەۆتار وتباسى جۇلدەلى ءۇشىنشى ورىندى يەلەندى.  شارۋا قوجالىعىمەن اينالىسا­تىن وتاعاسى ءدىلمۇرات جۇما­شەۆ اۋدانعا تۇراقتى دەمەۋشىلىك كورسەتىپ وتىرادى. بايقاۋ جەڭىمپازى اتانعان مۇقاەۆتار وتباسى ەندى نۇر-سۇلتان قالا­سىندا وتەتىن «مەرەيلى وتباسى-2019» ۇلتتىق بايقاۋىنا قاتى­سادى.

بايقاۋدىڭ ماراپاتتاۋ سالتاناتىنا كەلگەن وبلىس اكىمىنىڭ ورىنباسارى اسەم ءنۇسىپوۆا: «وتاندى ءسۇيۋ وتباسىنان باس­تالادى. وتباسى – بالا تاربيە­سىنىڭ ىرگەتاسى قالاناتىن ىس­­تىق ۇيا. وكىنىشكە قاراي قا­زىر­گى قوعامدا كەزدەسەتىن جاس وت­باسىلاردىڭ اجىراسۋى، تاس­­تاندى بالالار، قارتتار ءۇيى­نىڭ پايدا بولۋى، زورلىق-زوم­بىلىق سياقتى قاسىرەتتەردى بولدىرماۋ ءۇشىن وتباسى ينس­تيتۋتىن، ونىڭ قوعامداعى ءرو­لىن، قۇندىلىقتارىن نىعاي­تۋىمىز قاجەت» دەي كەلە اي­­ماق­تاعى انا مەن بالانى قور­عاۋ باعىتىنداعى شارالارعا توقتالىپ، التاي، اياگوز، سەمەي قالالارىنداعى پەريناتالدى ورتالىقتاردى زاماناۋي قوندىرعىلارمەن جابدىقتاۋعا قوماقتى قاراجات بولىنگەنىن، وبلىستاعى مەكتەپ جاسىنا دەيىنگى بالالار بالاباقشامەن تولىق قامتىلعانىن، «مەنىڭ مەكتەبىم» جوباسى اياسىندا       IT سى­نىپتار مەن روبوتتىق تەحنيكا كابينەتتەرى اشىلعانىن، كوپ بالالى انالار بالاباقشا تولەمىنەن بوساتىلعانىن اتاپ ءوتتى.


وسكەمەن
سوڭعى جاڭالىقتار

ۇقساس جاڭالىقتار