ونى كەزىندە داۋلەتكەلديەۆ دەگەن تاتار كوپەسى ءوز قاراجاتىنا سالدىرىپتى. قازان توڭكەرىسىنە دەيىن مۇسىلمان جاماعاتىنىڭ اللا تاعالاعا قۇلشىلىق ەتەتىن ءدىني مەكەمە رەتىندە جۇمىس ىستەپ كەلگەن. كەيىن سىڭارجاق ساياساتتىڭ سالدارىنان قيراتىلىپ, قابىرعالارى مەن مينارەتى عانا ساقتالعان.
«جيىرماسىنشى عاسىردىڭ باسىندا پەتروپاۆل قالاسىندا 9 مەشىت بولعان. سولاردىڭ ءبىرى 1870 جىلى بوي كوتەرگەن داۋلەتكەليەۆ مەشىتى ەڭ كونەسى سانالادى. ءبىز ونى قالپىنا كەلتىرىپ, يسلام مادەني مۋزەيىنە اينالدىرۋعا شەشىم قابىلدادىق. نىسان قازاقستان مۇسىلماندار ءدىني باسقاماسىنىڭ مەنشىگىنە وتكىزىلەتىن بولادى», دەپ جازدى ايماق باسشىسى قۇمار اقساقالوۆ الەۋمەتتىك جەلى پاراقشاسىندا.
بۇگىندە وبلىس ورتالىعىندا بەس مەشىت جۇمىس ىستەسە, ەكەۋى مەملەكەت تاراپىنان قورعالاتىن ارحيتەكتۋرالىق ەسكەرتكىش مارتەبەسىنە يە.
وڭىردەگى تاعى ءبىر كونە ءدىني عيباداتقانالاردىڭ ءبىرى – كاسيموۆ مەشىتى. ول قالانىڭ شەتكەرى اۋدانى ويقالا جاقتا ورنالاسقان. وندا بۇگىندە تەحنيكالىق قىزمەت ورتالىعى مەن ساۋنا قىزمەت كورسەتەدى.
