تالدىقورعان قالاسىنىڭ تۇرعىندارى ءۇشىن قولايلى جاعداي جاساۋ ماقساتىندا Open space قاعيداسى بويىنشا جۇمىس ىستەيتىن تالدىقورعان قالاسى اكىمدىگىنىڭ «فرونت-ءوفيسىن» اشۋ جوباسى قولعا الىندى. جوبانى «جەتىسۋ – ادالدىق الاڭى» كەڭسەسىندە وتكەن ءباسپاسوز ءماسليحاتىندا قالا اكىمى عالىمجان ءابدىرايىموۆ تانىستىردى. قالا اكىمىنىڭ ايتۋىنشا, بۇل كەڭسەدە تۇرعىن ءۇي-كوممۋنالدىق شارۋاشىلىق ءبولىمى, جەر قاتىناستارى ءبولىمى, ساۋلەت جانە قالا قۇرىلىسى ءبولىمى جانە جولاۋشىلار كولىگى جانە اۆتوموبيل جولدارى ءبولىمى سياقتى قالاداعى ەڭ سۇرانىسقا يە ورگاندارىنىڭ وكىلدەرىن ورنالاستىرۋ جوسپارلانۋدا. سونىمەن قاتار, كەڭسەدە ەلەكتروندى كەزەك, ىڭعايلى ورىندارمەن كۇتۋ زالى, كونديتسيونەر, سۋعا ارنالعان ديسپەنسەر جانە اقپاراتتىق تەلەديدار سياقتى قولايلى جاعدايلار جاسالادى. مۇمكىندىگى شەكتەۋلى تۇلعالارعا قوڭىراۋ شالۋ, پاندۋس, گيگيەنالىق بولمەلەر ورناتىلعان, برايل شريفتىندە جازىلعان تاقتايشالار دا جوبا بويىنشا كوزدەلگەن.
ءوز كەزەگىندە مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ الماتى وبلىسى بويىنشا دەپارتامەنتىنىڭ باسشىسى سەرىكباي نۇرعيساەۆ: «فرونت-وفيس» اشۋ ماقساتى - مەملەكەتتىك قىزمەت كورسەتەتىن مەملەكەتتىك ورگانداردى ءبىر جەرگە شوعىرلاندىرۋ جانە قىزمەت الۋ كەزىندە ازاماتتار ءۇشىن قولايلى جاعداي جاساۋ بولىپ تابىلادى», - دەدى.
جالپى, بۇل «فرونت وفيس» جوباسى تۇرعىندارعا قالانىڭ ءار تۇكپىرىندە ورنالاسقان بولىمدەردى ىزدەستىرمەي, ءبىر عيماراتتا مەملەكەتتىك قىزمەتتەر مەن قاجەتتى كەڭەستەر الۋعا مۇمكىندىك بەرەدى.
