وسى كۇندەرى وبلىستىق «ورال ءوڭىرى» گازەتىنىڭ ءفوتوتىلشىسى تەمىربولات توقمامبەتوۆ ءىسساپارمەن اۋدانىمىزعا كەلگەن بولاتىن. تەمىربولات ەكەۋمىز دە كيىكتەردىڭ ءتولدەۋ ناۋقانىنان قامسىز, حابارسىز قالمايىق دەپ جانۋارلار دۇنيەسىن قورعاپ جۇرگەن «وحوتزووپروم» مەكەمەسىنىڭ باتىس قازاقستان وبلىسى فيليالى باسشىسىنىڭ ۋاقىتشا مىندەتىن اتقارۋشى قۋانىش الىمقۇلوۆپەن حابارلاسىپ, كەزدەستىك. قۋانىش الپىسباي ۇلى قازتالوۆ اۋدانى اۋماعىندا جۇمىس ساپارىمەن ءجۇر ەكەن. ونىڭ ايتۋىنشا, اقبوكەندەر تولدەۋدى باستاپ جاتىر. جانۋارلاردىڭ تىنىشتىعىن قورعاۋ ءۇشىن 24 ينسپەكتوردان قۇرالعان 4 توپ جۇمىس اتقارىپ جاتقانىن جەتكىزدى. ول راتسيا ارقىلى ينسپەكتور سىرىم ورىنعاليەۆتىڭ توبىمەن بايلانىسقا شىعىپ, ءبىزدى كيىك ءتولدەپ جاتقان جەرگە اپارۋدى تاپسىردى. ايتقانداي, جول تالعامايتىن ارنايى كولىكتەرى بار جىگىتتەر ءبىزدى كيىكتەردىڭ جاپپاي تولدەپ جاتقان تۇسىنا ەش قيىندىقسىز جەتكىزدى. الدىمىزدان كوك بوياۋعا مالىنعان دالانىڭ ادەمى سۋرەتتەرى شىعا كەلمەسى بار ما. اتتەڭ, كوزىڭ تويمايدى عوي. سول كوك شالعىننىڭ ورتاسىندا اقبوكەندەر تەڭىزدىڭ تولقىنىندا جۇزگەندەي جايىلىپ ءجۇر...
فوتواپپاراتىمىزدى دالانىڭ ەركەسىنە باعىتتاپ, ءتۇسىرۋدى باستاپ تا كەتتىك. الدىمىزدا سانسىز كيىك جايىلىپ جۇرگەنىمەن كولىگىمىز جاقىنداعان سايىن ولار جەتكىزەر ەمەس.تەك ارنايى الىستى جاقىنداتاتىن فوتواپپارات وبەكتيۆى ارقىلى سۇلۋ ءمۇسىنىن تۇسىردىك. كولىكتىڭ رولىندە وتىرعان توپ جەتەكشىسى, جانۋارلار دۇنيەسىن قوعاۋ ينسپەكتورى سىرىم ورىنعاليەۆتى اڭگىمەگە تارتتىق.
– اقبوكەندەردىڭ تولدەۋ ناۋقانى باستالىپ جاتىر. بيىل كيىكتەر قازتالوۆ اۋدانىنا قاراستى مەشەركول مەن التايساي اۋماعىندا تولدەپ, قۇرالايلارىن ورگىزىپ جاتىر. بۇل اۋماقتا شامامەن 50 مىڭداي كيىك انالىعى تولدەۋدە. جاقىندا ءبىزدىڭ ورال پوپۋلياتسياسىنا جاتاتىن كيىكتەردىڭ ساناعى الىنعان بولاتىن. بىلتىر كيىك سانى 135 مىڭعا جەتسە, ساناق جۇمىستارى اياقتالعاننان كەيىن بيىلعى ءوسىمدى انىقتايتىن بولامىز. اقبوكەندەردىڭ ەرەكشەلىگى, تولدەرى اناسىن ەمىپ, ەكى ساعاتتان كەيىن شاۋىپ كەتە بەرەدى. تاعى ءبىر قىزىعى, انالارى ءبىر-ءبىرىنىڭ ءتولىن ەمىزە بەرەدى. بۇل كوپ جانۋارلاردا كەزدەسپەيتىن جاعداي. كيىكتەر تولدەيتىن ۋاقىتتا ءتۇز تاعىلارىنىڭ تىستەرى بوساپ, قاراقۇستار جۇمىرتقا باسادى. ياعني تولدەرىنە جىرتقىشتار تاراپىنان قاۋىپ بولمايدى. ازىرگە قاسكويلەردىڭ دە قيمىلدارى بايقالىپ جاتقان جوق. ناۋقان قالىپتى ءوتىپ جاتقانىنا تولىق نەگىز بار دەۋگە بولادى, – دەدى ينسپەكتور.
وسى كەزدە اڭگىمەمىزدى راتسيا ءۇنى ءبولىپ جىبەردى. توپ قۇرامىنداعى ينسپەكتورلار دالادا كيىكتىڭ ءبىر ساعات شاماسىندا تۋعان تولدەرىن تاپقانىن حابارلادى. كولىگىمىزدى سول باعىتقا بۇردىق. مەجەلى جەرىمىزگە جەتكەنىمىزدە كوك ءشوپتىڭ ۇستىندە جاتقان, كوزدەرى ءمولدىرەگەن, ءالسىز تالپىنعان قوس لاقتى كوردىك. قۇرالايدىڭ كوزىنە قاراساڭ ادام بالاسىن باۋراپ الار سۇلۋلىق بايقالاتىنداي... ءوز باسىم قۇرالايدى ءبىرىنشى رەت كورۋىم. مۇنداي ءسات بولا بەرمەيدى عوي. ال كەپ سۋرەتكە تۇستىك. وسى كەزدە كوز الدىما تابيعاتتى قورعاۋ ينسپەكتورى ەرلان نۇرعاليەۆتىڭ قۇرالايدى اسپانداتا ۇستاعان سۋرەتى كەلدى. امال قانشا, وسى ءبىر دالا ەركەسىن قورعايمىن دەپ ءجۇرىپ اتپالداي ازاماتتىڭ ءومىرى قيىلدى عوي. ءيا, وسىندا ازاماتتاردىڭ اقبوكەندەردى قورعاۋداعى ەڭبەگى ولشەۋسىز-اق.
