دزيۋدو: اسحات جيتكەەۆ
سارسەنبى, 27 ماۋسىم 2012 6:50
ۇلتتىق قۇرامانىڭ ۇستازدارى
قازاقستان دزيۋدوشىلارىنىڭ باس جاتتىقتىرۋشىسى اسحات جيتكەەۆ وتكەن بەيجىڭ وليمپياداسىندا عانا كۇمىس مەدال الىپ, ەلىمىز قورجىنىنا سپورتتىڭ بۇل ءتۇرى بويىنشا ءبىرىنشى ءىرى جۇلدەنى الىپ بەرىپ ەدى. ءبىر قىزىعى, سول جولى وليمپيادا تۇعىرىنا اسحاتپەن بىرگە كوتەرىلگەن ءۇش ساڭلاقتىڭ ەكەۋى – التىن مەدال العان موڭعول نايدان تۋۆشينبايار مەن قولا مەدال يەگەرى نيدەرلاندىلىق حەنك گرول وسى جولى دا تۇماندى البيون تورىندە ونەر كورسەتپەك. ال ا.جيتكەەۆ انگلياعا باپكەر رەتىندە بارادى.
سارسەنبى, 27 ماۋسىم 2012 6:50
ۇلتتىق قۇرامانىڭ ۇستازدارى
قازاقستان دزيۋدوشىلارىنىڭ باس جاتتىقتىرۋشىسى اسحات جيتكەەۆ وتكەن بەيجىڭ وليمپياداسىندا عانا كۇمىس مەدال الىپ, ەلىمىز قورجىنىنا سپورتتىڭ بۇل ءتۇرى بويىنشا ءبىرىنشى ءىرى جۇلدەنى الىپ بەرىپ ەدى. ءبىر قىزىعى, سول جولى وليمپيادا تۇعىرىنا اسحاتپەن بىرگە كوتەرىلگەن ءۇش ساڭلاقتىڭ ەكەۋى – التىن مەدال العان موڭعول نايدان تۋۆشينبايار مەن قولا مەدال يەگەرى نيدەرلاندىلىق حەنك گرول وسى جولى دا تۇماندى البيون تورىندە ونەر كورسەتپەك. ال ا.جيتكەەۆ انگلياعا باپكەر رەتىندە بارادى.
اسحات راسۋل ۇلى جيتكەەۆ 1981 جىلى 13 ساۋىردە تالدىقورعان قالاسىندا تۋعان. دزيۋدودان قازاقستاننىڭ حالىقارالىق دارەجەدەگى سپورت شەبەرى. 2008 جىلعى بەيجىڭ وليمپياداسىنىڭ كۇمىس جۇلدەگەرى. الەمنىڭ 2001 جىلعى قولا ءجۇلدەگەرى. ازيا ويىندارىنىڭ 2002, 2006 جىلدارعى جەڭىمپازى. ازيانىڭ 2003, 2004 جىلدارعى چەمپيونى, 2005 جىلعى كۇمىس جۇلدەگەرى. قازاقستاننىڭ بىرنەشە دۇركىن چەمپيونى.
اسحات دزيۋدو سەكتسياسىنىڭ ەسىگىن ساياحات قۇدايبەرگەنوۆتىڭ قاراۋىندا جاتتىعۋدان اتتادى. كەيىنىرەك جەكسەنباي سالاماتوۆ پەن سايان حاميتجانوۆتىڭ قاراۋلارىنا كوشتى. سپورتشىلىق جولىنداعى ەڭ ءىرى تابىسىنا جەتكەن بەيجىڭ وليمپياداسىندا 100 كيلوعا دەيىنگى سالماقتا كۇش سىناسقان دزيۋدوشى جىگىت الدىمەن كۋۆەيتتىك, سوسىن بوسنيالىق, ءۇشىنشى جەكپە-جەگىندە ۆەنگەر قارسىلاسىن تۇگەلدەي تازا («يپپون») جەڭدى. جارتىلاي فينالدا گوللانديالىق ارىپتەسىن ۇپاي سانىمەن ۇتقان ول فينالدا موڭعول جىگىتىنە ەسە جىبەرىپ قويدى. بۇل ونى كۇمىس مەدالدى مىسە تۇتۋعا ءماجبۇر ەتتى.
اسحات راسۋل ۇلى ەلىمىزدىڭ دزيۋدو قۇراماسى تىزگىنىن 2010 جىلعى جەلتوقسان ايىندا الدى. بۇعان دزيۋدوشىلارىمىزدىڭ قىتايدىڭ گۋانچجوۋ قالاسىندا وتكەن XVI جازعى ازيا ويىندارىندا ءساتسىز ونەر كورسەتۋى نەگىز بولدى. جاڭا باپكەردىڭ جاساعى كۇنى كەشە تاشكەنتتە وتكەن ىرىكتەۋ تۋرنيرىن كەيىن الەمدىك رەيتينگ بويىنشا الدىڭعى قاتاردان كورىنىپ, 8 ليتسەنزياعا قول ارتتى. كوماندا جاقىن ارادا تاعى ءبىر قوسىمشا جولداماعا يە بولىپ, ولاردىڭ سانىن 9-عا جەتكىزگەلى وتىر. ال اسحات الەمدىك رەيتينگتە ءبىرىنشى بولىپ اتالعان الەمنىڭ چەمپيونى جانە الەم چەمپيوناتىنىڭ كۇمىس جۇلدەگەرى ماكسيم راكوۆتان كوپ ءۇمىت كۇتەدى.
تاعى ءبىر ايتا كەتەتىن ءجايت, 2008 جىلى بەيجىڭ وليمپياداسى اياقتالعاننان التى كۇن كەيىن اسحات قازاقستاننىڭ مىقتى ۆولەيبولشى قىزدارىنىڭ ءبىرى ەلەنا پاۆلوۆامەن ۇيلەنۋ تويىن وتكىزدى. وسى ويىنداردا لەنا دا قازاقستان قۇراماسى ساپىندا ونەر كورسەتكەن ەدى. ولار بۇدان تۋرا 11 جىل بۇرىن الماتى سپورت مەكتەپ-ينتەرناتىندا تانىسقان بولاتىن. سودان بەرى ەكى جاس ءبىر-بىرىنە قارايلاپ, ءوز سەزىمدەرىن سىناقتان وتكىزىپ كەلدى. قازىر بۇل وتباسىندا توميريس ەسىمدى ءبۇلدىرشىن ءوسىپ كەلەدى.
رۋسلان يگىلىك.
