كۇشتىلەر كەرۋەن ءتۇزدى
سەنبى, 9 ماۋسىم 2012 8:13
كەشە پولشا مەن ۋكراينادا فۋتبولدان XIV ەۋروپا چەمپيوناتى باستالدى
ءتورت جىلدا ءبىر اينالىپ كەلەتىن بۇل ءدۇبىرلى دودا كەشە كەشكە پولشانىڭ ەكى قالاسىندا باستالدى. الدىمەن ەلدىڭ استاناسى ۆارشاۆادا پولشا مەن گرەكيا قۇرامالارى جاسىل الاڭعا شىعىپ, بىرىنشىلىكتىڭ شىمىلدىعىن اشىپ بەردى.
سەنبى, 9 ماۋسىم 2012 8:13
كەشە پولشا مەن ۋكراينادا فۋتبولدان XIV ەۋروپا چەمپيوناتى باستالدى
ءتورت جىلدا ءبىر اينالىپ كەلەتىن بۇل ءدۇبىرلى دودا كەشە كەشكە پولشانىڭ ەكى قالاسىندا باستالدى. الدىمەن ەلدىڭ استاناسى ۆارشاۆادا پولشا مەن گرەكيا قۇرامالارى جاسىل الاڭعا شىعىپ, بىرىنشىلىكتىڭ شىمىلدىعىن اشىپ بەردى.
ءيا, كارى قۇرلىقتىڭ وسى تسيكلداعى ەڭ الەۋەتتى دەگەن 16 كومانداسى تاعى دا ءوز ىشتەرىندەگى ناعىز كۇشتىنى انىقتاۋ جولىنداعى جان الىسىپ, جان بەرىسەتىن كەزەكتى شايقاستارىن باستاپ كەتتى. ۋەفا ەگيداسىندا ۇيىمداستىرىلىپ وتىرعان بۇل الامان رەسمي تۇردە «UEFA EURO 2012 tm Poland-Ukraine», ال اۋىز-ەكى تىلدە «ەۆرو-2012» دەپ اتالادى. رەسمي اتاۋدىڭ جوعارىداعىداي مازمۇنعا يە بولۋىنا ونىڭ وسى قوس مەملەكەتتە قاتار وتەتىنى سەبەپ بولدى. بۇل, البەتتە, العاشقى مارتە قولعا الىنىپ وتىرعان ءۇردىس ەمەس. قۇرلىق ءبىرىنشىلىگىنىڭ ەكى ەلدە ءوتۋ دەرەگى ءبىرىنشى رەت 2000 جىلى تىركەلدى. سول جىلعى قۇرلىق باسەكەسى بەلگيا مەن نيدەرلاندى (گوللانديا) ەلدەرىندە كەرۋەن ءتۇزىپ ەدى. كەلەسى جولعى مۇنداي ءداستۇر 2008 جىلى اۆستريا مەن شۆەيتساريادا ءوز جالعاسىن تاپتى. ەندى, مىنە, اراعا ءۇزىلىس سالىنباي, سول ساباقتى ينەنىڭ سۇڭگىسى پولشا مەن ۋكرايناعا جول تارتىپ وتىر.
چەمپيوناتتىڭ اشىلۋ سالتاناتى ۆارشاۆانىڭ ۇلتتىق ستاديونىندا پولشا – گرەكيا قۇراما كوماندالارى اراسىنداعى ماتچتىڭ الدىندا قانات جايدى. جالپى قۇنى 600 ملن. اقش دوللارىن قۇراعان اتالمىش ارەنا وسى بىرىنشىلىك ءۇشىن ارنايى سالىنعان بولاتىن. ول بيىلعى قاڭتاردا پايدالانۋعا بەرىلدى.
بۇل كۇنى اۋقىمىنا 58 مىڭ ادامدى سىيدىرعان ۆارشاۆا ۇلتتىق سپورت ارەناسىندا ينە شانشارلىق بوس ورىن بولعان جوق. سولاردىڭ اراسىندا باس مەيمان رەتىندە ۋكراينانىڭ پرەزيدەنتى ۆيكتور يانۋكوۆيچ پەن ۆەنگريانىڭ پرەمەر-ءمينيسترى ۆيكتور وربان وتىردى.
بۇل جولعى چەمپيوناتتى ۇيىمداستىرۋدىڭ تاعى مىناداي ەرەكشەلىكتەرى بار. بىرىنشىلىك ماۋسىمنىڭ 8-ءى كۇنى پولياك جەرىنەن قاناتتانىپ ۇشقانىمەن, تاپ سول كۇنى ونىڭ باستالۋىنا ارنالعان شارالار ۋكراين اۋماعىندا دا قولعا الىندى. اتاپ ايتقاندا, ول جۇما كۇننىڭ جۇلگەسىندە كيەۆتە پرەزيدەنت ۇلتتىق وركەسترىنىڭ قاتىسۋىمەن چەمپيوناتتىڭ رەسمي فان-ايماعىنىڭ سالتاناتتى جاعدايدا اشىلۋى تۇرىندە كورىنىس بەردى. وعان 16 ەلدەن كەلگەن 20 مىڭنان استام جانكۇيەر قاتىستى. بۇعان قوسا, چەمپيوناتتاعى ءاربىر ماتچتىڭ الدىندا ونىڭ شاعىن اشىلۋ سالتاناتى وتكىزىلىپ تۇرماقشى. ول بار-جوعى بەس-جەتى مينۋتتىڭ اينالاسىندا عانا ۋاقىت الادى. بۇل تۋرالى وسى الاماننىڭ قارساڭىندا پولشا ۇلتتىق وليمپيالىق كوميتەتىنىڭ جەتەكشىسى, ەۆرو-2012 ۇيىمداستىرۋ كوميتەتىنىڭ توراعاسى ماركيان لۋبكوۆسكي مالىمدەدى. ونىڭ ايتۋىنشا, مۇنداي شارالار تەك ۋكراينا مەملەكەتىنىڭ اۋماعىندا وينالاتىن ويىنداردا عانا ورىن الماقشى.
جالپى, بۇل وقيعاعا پولشا مەن ۋكراينا تابانى كۇرەكتەي بەس جىل بويى دايىندالدى.
چەمپيونات ەكى ەلدىڭ 8 شاھارىندا وينالادى. ولاردىڭ قاتارىندا پولشانىڭ ۆارشاۆا, پوزنان, گدانسك جانە ۆروتسلاۆ, ۋكراينانىڭ كيەۆ, حاركوۆ, لۆوۆ جانە دونەتسك قالالارى بار. ماتچتار سانى دا ولاردىڭ اربىرىنە تەڭدەي ءبولىنىپ بەرىلگەن. بىرىنشىلىكتىڭ اشىلۋى جانە جابىلۋ سالتاناتتارىن دا ەكى ەل ءوزارا ءبولىسىپ العان. ايتالىق, دودانىڭ باستالۋى مەن تۇساۋكەسەر ويىنى كەشە پولشانىڭ استاناسى – ۆارشاۆادا وتسە, جابىلۋى مەن فينالدىق كەزدەسۋى 1 شىلدە كۇنى ۋكراينانىڭ باس قالاسى – كيەۆتە ورىن الادى.
ازىرگە فۋتبول ماماندارى باس جۇلدەدەن نەگىزگى ۇمىتكەرلەر رەتىندە گەرمانيا جانە گوللانديا قۇرامالارىن, سونىمەن قاتار مۇنىڭ الدىنداعى بىرىنشىلىكتىڭ, سونداي-اق 2010 جىلعى الەمنىڭ چەمپيونى يسپانيا كومانداسىن اتاپ وتىر.
سوڭعى مالىمەت: گازەتىمىزدىڭ وسى ءنومىرىن جارىققا شىعارۋعا قول قويىلعالى جاتقاندا, يسپان اربيترى كارلوس ۆەلاسكو كاربالو قازىلىق ەتكەن پولشا جانە گرەكيا قۇرامالارى اراسىنداعى كەزدەسۋدىڭ سوڭعى ىسقىرىعى ەستىلدى. بۇل ماتچ 1:1 ەسەبىمەن اياقتالدى. ال رەسەي – چەحيا قۇرامالارى اراسىنداعى ويىن وتە كەش بىتكەندىكتەن, ونىڭ ءناتيجەسىن كەلەسى جولى حابارلايمىز.
سەرىك ءپىرنازار,
«ەگەمەن قازاقستان».
