وڭتۇستىكتىڭ فۋتبولدان ءوز بىرىنشىلىگى باستالدى
سەيسەنبى, 8 مامىر 2012 7:12
ەلباسىمىز ەلىمىزدە بۇقارالىق سپورتتى ورىستەتۋ جايلى ءجيى ايتىپ ءجۇر. “شىنىقساڭ شىمىر بولاسىڭ” دەگەن قاناتتى ءسوز بار. كەڭەس وداعى كەزىندە گتو-عا نورماتيۆ تاپسىرۋ سەكىلدى مەكتەپ وقۋشىلارىنان باستاپ, ەرەسەكتەرگە دەيىن قامتيتىن سپورتتىق شارالار “سەن سالار دا مەن سالار, اتقا جەمدى كىم سالارمەن” ۇمىتىلىڭقىراپ كەتتى. سونىڭ كەسىرىنەن موينى ىرعايداي, دەنەسىندە قىرىم ارتىق ەتى جوق, سۇيەگى سۇيەگىنە ارەڭ ءىلىنىپ تۇرعان جاستار كوبەيدى. سالماق جەتىسپەۋشىلىك اسكەر قاتارىنا الۋ ماسەلەسىندە دە قيىندىق تۋعىزادى.
سەيسەنبى, 8 مامىر 2012 7:12
ەلباسىمىز ەلىمىزدە بۇقارالىق سپورتتى ورىستەتۋ جايلى ءجيى ايتىپ ءجۇر. “شىنىقساڭ شىمىر بولاسىڭ” دەگەن قاناتتى ءسوز بار. كەڭەس وداعى كەزىندە گتو-عا نورماتيۆ تاپسىرۋ سەكىلدى مەكتەپ وقۋشىلارىنان باستاپ, ەرەسەكتەرگە دەيىن قامتيتىن سپورتتىق شارالار “سەن سالار دا مەن سالار, اتقا جەمدى كىم سالارمەن” ۇمىتىلىڭقىراپ كەتتى. سونىڭ كەسىرىنەن موينى ىرعايداي, دەنەسىندە قىرىم ارتىق ەتى جوق, سۇيەگى سۇيەگىنە ارەڭ ءىلىنىپ تۇرعان جاستار كوبەيدى. سالماق جەتىسپەۋشىلىك اسكەر قاتارىنا الۋ ماسەلەسىندە دە قيىندىق تۋعىزادى.
وسىنداي جاعدايدا نە ىستەۋ كەرەك؟ ەلباسىمىز بەن سپورت اگەنتتىگى باستاما كوتەرمەسە, وڭىرلەر “سەن تيمەسەڭ مەن تيمەن” دەپ قارەكەتسىز وتىرا بەرمەك پە؟ وڭتۇستىك وسى سەڭدى بۇزدى. جۇرتتى بۇقارالىق سپورتقا تارتۋدىڭ ەڭ ۇلكەن كوزى – فۋتبول. دۇنيە جۇزىندە كورەرمەندەرى دە باسقا سپورت تۇرلەرىنەن كوپ فۋتبول وسكەلەڭ ۇرپاقتىڭ دەنە ءبىتىمىن جەتىلدىرىپ, كۇشىن مولايتۋعا, دەنساۋلىعىن نىعايتۋعا كومەكتەسەدى.
وبلىس اكىمىنىڭ ۇيىتقى بولۋىمەن ەكى-ءۇش جىلدان بەرى اۋداندار مەن قالالاردا مىڭعا تارتا سپورت الاڭشالارى جوندەۋدەن ءوتىپ, سپورت ورتالىقتارى جوق اۋىلداردا جاڭالارى پايدالانۋعا بەرىلگەن بولاتىن.
جاقىندا شىمكەنتتەگى, قاجىمۇقان اتىنداعى ورتالىق ستاديوندا فۋتبولدان اۋەسقويلار اراسىندا اشىق ءبىرىنشىلىك جالاۋىن كوتەردى. ۇيىمداستىرۋشىسى – وبلىس اكىمدىگى مەن وبلىستىق سپورت, دەنەشىنىقتىرۋ جانە تۋريزم باسقارماسى. ەرەجە بويىنشا وبلىستاعى 14 اۋدان مەن قالالاردى قامتىعان بىرىنشىلىككە جاسى 21-گە دەيىنگى جاستار تارتىلادى.چەمپيونات ەكى اينالىمنان تۇرادى. 14 كوماندا ءوزارا ەكىدەن كەزدەسۋ وتكىزەدى. جۇمىس ىرعاعىنا كولەڭكە تۇسىرمەس ءۇشىن ويىنداردى تەك جەكسەنبى كۇندەرى عانا وتكىزۋگە شەشىم قابىلدانعان. ۇپاي سانىمەن دارالانعان قوس كوماندا قاراشا ايىندا شىمكەنتتەگى ستاديوندا كەزدەسىپ, جەڭىمپازدى انىقتايدى.
جارىستىڭ اشىلۋ سالتاناتىندا وبلىس اكىمى اسقار مىرزاحمەتوۆ ءسوز ءسويلەدى. وڭتۇستىك فۋتبولىنداعى اۋىز تولتىرىپ ايتارلىقتاي جەڭىستەردى ايتتى. “ورداباسى” فۋتبول كلۋبى سۋپەر كۋبوكتى جەڭىپ الدى. قىزدار اراسىنداعى ەل چەمپيوناتىندا وبلىس نامىسىن قورعاعان “بيك-قازىعۇرت” كلۋبى مارەگە شاشاسىنا شاڭ جۇقپاي كەلدى. ياعني, جاستار الار جاقسى ۇلگى بار. بۇگىن تۇساۋى كەسىلىپ وتىرعان وبلىس بىرىنشىلىگى ەلباسىمىزدىڭ بۇقارالىق سپورتتى ورىستەتۋگە بەرگەن تاپسىرماسىن جۇزەگە اسىرۋ, دەدى وبلىس باسشىسى. قازاقستان فۋتبول فەدەراتسياسىنىڭ ۆيتسە-پرەزيدەنتى ميحايل گۋرمان وسىنداي تاماشا باستاماعا ۇيىتقى بولعان وبلىس اكىمدىگىنە العىسىن ايتىپ, فەدەراتسيا اتىنان ەستەلىك رەتىندە “التىن دوپ” تارتۋ ەتتى.
ءتۋرنيردىڭ العاشقى ويىنىن سوزاق جانە سايرام اۋداندارىنىڭ فۋتبولشىلارى اشتى. شىنتۋايتىنا كەلسەك, سايرام اۋدانى سوزاقتىڭ حالقىن سانى جاعىنان ءۇش-ءتورت ەسە ورايدى. سوعان قاراپ, سايرام اۋدانىنىڭ فۋتبولشىلارى جەڭىسكە جەتەدى-اۋ دەپ توپشىلاعاندار كوپ بولىپ ەدى. بىراق, ەن دالاسى ارقامەن شەكتەسەتىن, وبلىس ورتالىعىنان قيىس جاتقان تەرىسكەيدىڭ جىگىتتەرى جەڭىستى قولدان بەرە سالاتىن بوزىمبايلار ساناتىنان بولماي شىقتى.
جاقىندا اۋدانعا اكىم بولىپ بۇعان دەيىن اۋدان اكىمىنىڭ ورىنباسارى, اۋداندىق ءماسليحاتتىڭ حاتشىسى بولعان امانعالي ايمۇرزاەۆ تاعايىندالعان بولاتىن. وسى امانعاليىڭىز كەشەگى وداق جاستارى اراسىندا وتكەن جارىستاردا حالىقارالىق ارەنادا دوپ تەپكەن جىگىت. سوزاقتى ون جىلدان استام باسقارىپ, وبلىستاعى كوشباسشى اۋدانداردىڭ قاتارىنا قوسىپ كەتكەن سوزاقباي ابدىقۇلوۆ تا كوكورىم شاعىندا سول كوماندادا ويناپ, وداق جارىستارىنا قاتىسقان. الدىندا وسىنداي باي تاريحى بار, بۇگىنگى فۋتبولعا تاڭات نوسەرباەۆتاي جايساڭ جىگىتتى بەرگەن سوزاق ءوڭىرىنىڭ جاستارى ىلكىمدى شىقتى. العاشقى گولدى سايرام قاقپاسىنا ۇلان ايمۋرزاەۆ سوقتى.
– بۇل بىرىنشىلىك جاستاردى سپورتقا تارتۋ, سالاماتتى ءومىر سالتىن ناسيحاتتاۋدا ايرىقشا مانگە يە, – دەدى وبلىستىق سپورت, دەنەشىنىقتىرۋ جانە تۋريزم باسقارماسىنىڭ باستىعى بولات قىرىقباەۆ. – بۇگىندە جاستار اراسىندا ماسكۇنەمدىك, ناشاقورلىق ماسەلەسى ءجيى كوتەرىلىپ ءجۇر. اعا بۋىن ولاردىڭ ىستەرگە ءىس جوق, بوس جۇرگەندىكتەن وسىنداي جولعا باراتىنىن ايتادى. ال, فۋتبول – ناعىز بۇقارالىق سپورت. ءار اۋدان ءوز ىشىندە ىرىكتەۋ ءوتكىزىپ, مىقتىلارىن دارالايدى. تىنىمسىز جاتتىعۋلار وتەدى. ەل ىشىندە بايقالماي جۇرگەن تالانتتاردىڭ ءوزىن كورسەتۋىنە مۇمكىندىك بەرىلەدى. مۇنىڭ تاعى ءبىر جاقسى جاعى, سول دارالانعان جاستاردى وبلىس نامىسىن قورعاپ جۇرگەن “ورداباسى” جانە “قىران” فۋتبول كلۋبتارىنا الۋعا مۇمكىندىك بار.
بولات ناۋرىزباي ۇلى وسىلاي دەيدى. وسىندايدا ويعا كەلەدى. قازاقستان فۋتبولى شەتەلدىڭ ويدان-قىردان قاشقان, فۋتبولشى رەتىندە ءوز ەلىنىڭ كەرەگىنە جارامايتىن, ەكىنشى, ءۇشىنشى ديۆيزيونىندا وينايتىن فۋتبولشىلارىنا تولىپ كەتتى. ترانسفەرلەر ارقىلى كۇرەپ اقشا تاۋىپ وتىرعاندار بار. سول ورتاشا ويىنى بار فۋتبولشىلار قاي كلۋب كوپ اقشا بەرسە, ءوز كلۋبىن وڭاي تاستاپ كەتە بەرەدى. مۇنىڭ ەكىنشى اتى – ساتقىندىق. ساتقىندىعىڭىز نامىسسىزدىققا اكەلەدى. قازاق فۋتبولىندا وسىنداي الماسۋلار نەمقۇرايلىلىققا, داعدىعا, ادەتكە اينالىپ بارا جاتقاندىعى قورقىتادى. مەسسي, رونالدۋ سەكىلدى الەمدىك اۋقىمداعى دارابوزداردى قازاقستانعا ويناۋعا شاقىرتۋ قۇر قيال بولىپ كورىنگەنىمەن, قازاقستان فۋتبولىنا ۇيرەتەرى بار ورتاڭقول ويىنشىلاردى ساۋدالاۋعا ابدەن بولادى عوي.
قازاقستان فۋتبولىن كوتەرۋ ءۇشىن ۇلكەن جۇمىستار ءجۇرىپ جاتىر. برازيلياعا دا جاستار جىبەرىپ جاتىرمىز. قىرۋار اقشانى شىعىنداپ, جاستاردى جىبەرگەنشە, سول جاقتان بىلىكتى باپكەرلەر شاقىرتقان ەل ءۇشىن ارزان ءارى ءتيىمدى بولار ەدى. قالاي دەگەندە دە, سىرتتىڭ ويىنشىسى اقشاسى كوپ ەلدەرگە ەلەڭدەپ تۇرادى. شاقىرتۋ السا الدى-ارتىنا قارامايدى. ءوز ۇلىڭ وزەگىنەن تەپسەڭ دە كەتپەيدى. قازاقستان باسقا وليمپيالىق سپورت تۇرلەرىنە قاراعاندا, فۋتبولعا ۇلكەن قارجى ءبولىپ وتىر. ونىڭ سىرتىندا ءار وبلىس باسشىلارى وبلىستىڭ ماڭدايعا باسقان كومانداسى ارقىلى ءوزارا باسەكەگە تۇسەتىندەي كورىنەدى. سولاي بولعان ەكەن, ەندەشە, وزگە ەلدە تامىر تارتقان داراقتى جەرسىندىرەم دەمەي, ءوز كوشەتتەرىن وتىرعىزسىن.
ول – باياعى “بىلعارى دوپ” سياقتى اۋلا كلۋبتارىن قۇرۋ, ول – قازاق جاستارىن بۇقارالىق سپورتقا تارتۋ, تۇلا بويى نامىسقا سۋىرىلعان دارابوزداردى تاربيەلەۋ. بۇل ىسكە مەملەكەت ۇلكەن جاردەم بەرىپ وتىر. قارجى دا, مۇمكىندىك تە بار. وڭتۇستىك ۇلگى الاتىن وسى جاقسى ءىستى باستاپ كەتتى.
باقتيار تايجان.
وڭتۇستىك قازاقستان وبلىسى.
