قازاقستان ليگاسى – ەۋروپادا
سەنبى, 21 ءساۋىر 2012 7:42
جاقىندا ەلىمىزگە چەحيانىڭ پراگا قالاسىنان قۋانىشتى حابار كەلىپ جەتتى. بۇل جەرگە ەلىمىزدىڭ اتىنان ەۋروپا فەدەراتسياسىنىڭ قۇرىلتاي كونفەرەنتسياسىنا قاتىسۋعا بارعان «قازاقستان رەسپۋبليكاسى اۋەسقوي فۋتبولشىلار ليگاسى» قوعامدىق بىرلەستىگىنىڭ توراعاسى ەرلان جارىلقاسىنوۆ ەلىمىزدىڭ اتالعان ۇيىمعا مۇشە بولعانىن حابارلادى.
سەنبى, 21 ءساۋىر 2012 7:42
جاقىندا ەلىمىزگە چەحيانىڭ پراگا قالاسىنان قۋانىشتى حابار كەلىپ جەتتى. بۇل جەرگە ەلىمىزدىڭ اتىنان ەۋروپا فەدەراتسياسىنىڭ قۇرىلتاي كونفەرەنتسياسىنا قاتىسۋعا بارعان «قازاقستان رەسپۋبليكاسى اۋەسقوي فۋتبولشىلار ليگاسى» قوعامدىق بىرلەستىگىنىڭ توراعاسى ەرلان جارىلقاسىنوۆ ەلىمىزدىڭ اتالعان ۇيىمعا مۇشە بولعانىن حابارلادى.
قوعامدىق بىرلەستىك توراعاسىنىڭ ايتۋىنشا, چەحيانىڭ پراگا قالاسىندا وتكەن شاعىن فۋتبولدان ەۋروپا فەدەراتسياسىنىڭ جيىنىنا ءبىزدىڭ ەلىمىزدەن باسقا تاعى 14 ەلدىڭ وكىلدەرى قاتىسىپ, ۇيىمنىڭ قىزمەتى مەن الداعى جوسپارلارى تۋرالى ماسەلە قاراعان. وسى جيىندا ە.جارىلقاسىنوۆ قازاقستان اۋەسقوي فۋتبول ليگاسىنىڭ اتىنان ءسوز سويلەپ, ەلىمىزدە شاعىن فۋتبولدىڭ دامۋ بارىسى تۋرالى بايانداما جاساپ, تۇساۋكەسەر ءراسىمىن دە وتكىزگەن ەكەن. سول جەردە ول سپورتتىڭ بۇل ءتۇرىنىڭ قازاقستاندا جىلدان-جىلعا دامىپ, كوپشىلىكتىڭ سۇيىكتى ويىنىنا اينالعانى تۋرالى ويلارىمەن ءبولىسكەن. جاقىندا ءبىز «قازاقستان رەسپۋبليكاسى اۋەسقوي فۋتبولشىلار ليگاسى» قوعامدىق بىرلەستىگىنىڭ ءتوراعاسى ەرلان جارىلقاسىنوۆپەن كەزدەسىپ, وسى كونفەرەنتسيادا قارالعان ماسەلەلەر تۋرالى ايتىپ بەرۋىن وتىنگەن ەدىك.
– قازاقستان اۋەسقوي فۋتبولشىلار ليگاسىنىڭ ەۋروپا فۋتبول ليگاسىنا قابىلدانعانىن ۇلكەن وقيعا دەۋگە بولادى. بۇعان قالاي قول جەتكىزدىڭىزدەر؟ جالپى, سىزدەر قاتىسقان جيىندا قانداي ءماسەلەلەر قارالدى؟
– بۇل ۇيىمعا مۇشە بولۋ ءۇشىن كوپ جۇمىستار اتقارىلدى. وزدەرىڭىز ءبىزدىڭ ەلدە اۋەسقوي فۋتبولشىلار ليگاسى ويىندارىنىڭ كوكتەم, كۇز جانە قىس مەزگىلدەرىندە وتكىزىلىپ كەلە جاتقانىن بىلەسىزدەر. بۇل ويىندارعا كوپتەگەن كوماندالار قاتىسىپ, ولاردىڭ سانى جىلدان جىلعا ارتىپ كەلەدى. بيىلعى كوكتەمگى ماۋسىمعا مىسالى, استاناداعى «ا» جانە «ۆ» ليگاسىنا قاتىسۋعا ءبىراز كوماندالار وتىنىشتەرىن بەردى. ەكى ليگا 18 كوماندادان قۇرالىپ وتىر. سونداي-اق, الماتىداعى ليگالار دا جىلدان-جىلعا دامىپ كەلەدى. ەۋروپاداعى ارىپتەستەرىمىز وسى جاعىن ەسكەرىپ, بىزگە قارت قۇرلىقتىڭ اۋەسقوي فۋتبولشىلار فەدەراتسياسىنا ءمۇشە بولۋدى ۇسىندى. ءبىز ول ۇسىنىستى قۋانا قابىلدادىق. بۇل ەلىمىزدىڭ سپورت تاريحىنا تاسقا قاشالىپ جازىلاتىن وقيعا بولادى دەپ ويلايمىن.
ال جيىنعا بىزدەن باسقا تاعى 14 ەلدىڭ وكىلدەرى قاتىستى. ونىڭ ىشىندە حورۆاتيا, يتاليا, يزرايل, ۇلىبريتانيا, مولدوۆا, گرەكيا, رۋمىنيا, چەحيا, سلوۆاكيا, بولگاريا, سلوۆەنيا, پولشا, ليۋكسەمبۋرگ پەن كيپر ەلدەرى بولدى. بولاشاقتا ونىڭ قاتارىنا گەرمانيا, فرانتسيا, بوسنيا جانە گەرتسوگوۆينا, قىتاي, وزبەكستان مەن قىرعىزستان دا قابىلداناتىن بولادى. جيىندا قازاقستان فۋتبولى تۋرالى تۇساۋكەسەر ءراسىمىن وتكىزىپ, بايانداما جاسادىم. ءبارى تۇساۋكەسەر مەن بايانداماعا ريزا بولدى. تۇساۋكەسەر جوعارى دەڭگەيدە ءوتتى. وسى جيىندا رۋمىنيا فەدەراتسياسىنىڭ پرەزيدەنتى بۋرلەانۋ رازۆان ەۋروپا فەدەراتسياسىنىڭ پرەزيدەنتى, چەحيا فەدەراتسياسىنىڭ پرەزيدەنتى فيليپ يۋدى ەف-ءتىڭ ۆيتسە-پرەزيدەنتى, حورۆاتيا فەدەراتسياسىنىڭ پرەزيدەنتى الپەزا برۋنو بەس جىلعا باس حاتشى بولىپ سايلاندى. كونفەرەنتسيادا ەۋروپا فەدەراتسياسىنىڭ جارعىسى مەن ەرەجەلەرى قابىلداندى.
– كەزدەسۋدە ءسىز فەدەراتسيانىڭ ۇيىمداستىرۋ كەڭەسىنىڭ مۇشەلىگىنە سايلانىپسىز. ءسىزدەن باسقا تاعى كىمدەر كەڭەستىڭ مۇشەلىگىنە سايلاندى؟
– بۇل كەڭەسكە تاعى ۇلىبريتانيادان دەۆيد ۆيندزور-حارريس, يزرايلدەن ياير شاەر, مولدوۆادان ەۋحەنيو چوبۋ, گرەكيادان افانوسيس پاپادوپۋلوس سايلاندى. جيىندا ءبىز شاعىن فۋتبولدان ەۋروپا ليگاسىن دامىتۋ تۋرالى ماسەلەنى قاراپ, بولاشاقتا 500 000-نان استام ادامدى اۋەسقوي فۋتبولعا تارتۋدى ايتتىق. وسى جەردە مەن قازاقستان اۋەسقوي فۋتبول ليگاسىنىڭ ەۋروپا ليگاسىنا مۇشە بولۋىنا مىنا ازاماتتاردىڭ كوپ ەڭبەك سىڭىرگەنىن اتاپ وتكىم كەلەدى. ولار – «قازاقستان رەسپۋبليكاسى اۋەسقوي فۋتبولشىلار ليگاسى» قوعامدىق ءبىرلەستىگىنىڭ توراعاسىنىڭ ورىنباسارى عاني جۇرتانوۆ, باس حاتشى عالىمجان تىلەنشيەۆ پەن اتقارۋشى كوميتەتتىڭ مۇشەسى ۆالەري ساليموۆ دەگەن ازاماتتار. وسى ازاماتتار ءبىزدىڭ ەۋروپا فەدەراتسياسىنىڭ مۇشەلىگىنە قابىلدانۋىمىزعا كوپ ەڭبەك ەتتى.
ەندى ءبىز كەلەسى جىلدىڭ مامىر ايىندا بولگاريادا وسى ەلدىڭ فۋتبولشىلارىمەن دوستىق كەزدەسۋ وتكىزەتىن بولامىز. ءبىزدىڭ الداعى جوسپارىمىز ليگاعا قاتىساتىن ويىنشىلار سانىن 1123-كە جەتكىزىپ, ەلىمىزدىڭ بارلىق قالالارىندا اۋەسقوي فۋتبولشىلار ليگاسىن اشۋ.
قازىرگى كەزدە قازاقستان ليگالارى استانا جانە الماتىدا وتكىزىلىپ كەلەدى. وعان استانادان «سايران», «قۋات», «امانات» پەن ەلىمىزدىڭ باس گازەتى «ەگەمەن قازاقستاننىڭ» – «ەگەمەن» كوماندالارى سياقتى ۇجىمدار قاتىسۋدا.
اڭگىمەلەسكەن داستان كەنجالين.
