جولداماعا تارتىس
سەنبى, 7 ءساۋىر 2012 7:53
بەيسەنبى كۇنى استانادا بوكستان ازيا ايماعى بويىنشا جازعى وليمپيا ويىندارىنا جولداما بەرەتىن حالىقارالىق ليتسەنزيالىق تۋرنير باستالدى. وعان سارى قۇرلىقتىڭ 28 ەلىنەن كەلگەن 131 بىلعارى قولعاپ شەبەرى قاتىسىپ, 10 سالماق دارەجەسىندە جولدامالاردى ساراپقا سالىپ جاتىر.
سەنبى, 7 ءساۋىر 2012 7:53
بەيسەنبى كۇنى استانادا بوكستان ازيا ايماعى بويىنشا جازعى وليمپيا ويىندارىنا جولداما بەرەتىن حالىقارالىق ليتسەنزيالىق تۋرنير باستالدى. وعان سارى قۇرلىقتىڭ 28 ەلىنەن كەلگەن 131 بىلعارى قولعاپ شەبەرى قاتىسىپ, 10 سالماق دارەجەسىندە جولدامالاردى ساراپقا سالىپ جاتىر.
ءبىزدىڭ ەلدەن بۇل تۋرنيرگە ءالى ليتسەنزيا الماعان ءتورت بوكسشىنىڭ قاتىساتىنى بەلگىلى. سونىڭ ىشىندە ءبىرجان جاقىپ (49 كگ.) پەن ۆاسيلي لەۆيتتىڭ (91 كگ.) سالماعىنداعى بوكسشىلارعا ءبىر ليتسەنزيا بەرىلسە, ءىلياس سۇلەيمەنوۆ (52 كگ.) پەن دانيار ەلەۋسىنوۆتىڭ (64 كگ.) سالماعىنداعى بوكسشىلار فينالعا شىقسا, جولداماعا يە بولادى. سوندىقتان 52 مەن 64 كيلوعا قاراعاندا ەڭ جەڭىل جانە اۋىر سالماقتاعى ءبىزدىڭ جىگىتتەرگە ءبىراز تەر توگىپ, جولداما الۋ ءۇشىن ءتۋرنيردىڭ جەڭىمپازى اتانۋ كەرەك.
تۋرنير باستالعان كۇنى ءبىزدىڭ بوكسشىلاردىڭ ەشقايسىسى شارشى الاڭعا شىققان جوق. بۇل كۇنى 52, 56, 60, 64, 69 جانە 81 كيلوداعى وزگە ەلدەردىڭ وكىلدەرى جەكپە-جەكتەرىن وتكىزدى. ال كەشە 64, 75, 91 كيلو سالماقتاعى بوكسشىلار رينگكە شىقتى. سونىڭ ىشىندە ءبىزدىڭ دانيار ەلەۋسىنوۆ يوردانيالىق يبراھيم سالەحپەن كەزدەسىپ, ونى ايقىن باسىمدىقپەن ۇتتى. وسى ايقاسىندا ول باپكەرلەردىڭ جۇكتەگەن مىندەتتەرىن ارتىعىمەن ورىندادى دەسە بولادى. دەگەنمەن, دانيارعا ءالى بوساڭسۋعا بولمايدى. ويتكەنى, ونىڭ سالماعىندا جاپون ماتاتسۋگي كاۆانيشي سياقتى ءبىرتالاي تاجىريبەلى بوكسشىلار بار. ولار ەلەۋسىنوۆكە مىقتى قارسىلاس بولا الادى.
باسقا سالماقتارعا كەلسەك, 49 كيلودا ءبىرجان جاقىپقا تۋرنيردىڭ وڭاي بولمايتىن ءتۇرى بار. مۇنى جەرەبە تاستالماي تۇرىپ ءىشىمىز سەزگەن. سولاي بولسا دا ءتىل-كوزىمىز تاسقا دەپ ءبىزدىڭ بوكسشىلار اراسىندا ەڭ سوڭعى بولىپ شارشى الاڭعا ەلىمىزدىڭ ءۇمىتىن ارقالاپ شىعاتىن جاقىپقا تەك جەڭىس قانا تىلەيىك! ءبىر جاقسىسى, ونىڭ سالماعىنداعى قازىرگى ەڭ مىقتى بوكسشىلار سانالاتىن وليمپيادا جانە الەمنىڭ ءۇش دۇركىن چەمپيونى قىتاي زوۋ شيميڭ مەن موڭعول پۋرەۆدورج سەردامبا باكۋدە وتكەن الەم چەمپيوناتىندا تۇماندى البيونعا جولداما الىپ قويدى. وسىنى ەسكەرىپ, بىرجانعا تەك قامشىنى باسۋ عانا قالىپ وتىر.
كەلەسى 52 كيلو سالماقتا ءىلياس سۇلەيمەنوۆكە دە بوساڭسۋعا بولمايدى. سۇلەيمەنوۆ ەلىمىزدىڭ سەنىمىن اقتاعىسى كەلسە, تۋرنيردىڭ جەڭىمپازى اتانۋعا كۇش سالۋى كەرەك. قازىر باپكەرلەر وعان زور ءۇمىت ارتىپ وتىر. ونىڭ تۋرنيردەگى باستى قارسىلاسى موڭعول تۋگستوگت نايانبايار بولىپ سانالادى. وسى باسەكەدەگى العاشقى جەكپە-جەگىندە موڭعول بوكسشىسى فيليپپيندىك رەي سوليۋداردى نوكداۋنعا جىبەرىپ, جەڭىسكە جەتتى. بۇل سالماقتا تاعى تاجىك جاھون كۋربانوۆ تا بار.
جالپى, بيىلعى تۋرنيرگە ەڭ كوپ بوكسشىلاردى اكەلگەن وسى تاجىكستان قۇراماسى بولىپ وتىر. ولاردىڭ قاتارىنداعى اۋىر سالماقتاعى ديلوۆارشو ابدۋراحمانوۆ دەگەن تاعى ءبىر بوكسشى ءبىزدىڭ ۆاسيلي لەۆيتپەن العاشقى كەزدەسۋىن وتكىزەدى. ءبىر قۋانىشتىسى, لەۆيتكە جەرەبە جولداس بولدى. ول تۋرنيردەگى ايقاسىن 8 ءساۋىر كۇنى جارتىلاي فينالدان باستايدى.
وسى سالماقتا موڭعوليا قۇراماسىنداعى ەربولات تولەك دەگەن قازاق بوكسشىسى كەشە ءۇندى مانپريت سينگحپەن قولعاپ ءتۇيىستىرىپ, جەڭىلىپ قالدى. 9 ساۋىردە 49 كيلودا ءبىرجان جاقىپ تاعى ءبىر تاجىك ميروجيدين كاريموۆپەن ايقاسادى. ەگەر ءبىرجان قارسىلاسىن جەڭسە, جارتىلاي فينالدا 11 ءساۋىر كۇنى وزبەك شاحوبيدين زويروۆپەن شارشى الاڭعا شىعادى. بۇل بوكسشى جەرەبە بويىنشا شيرەك فينالىن وتكىزبەيدى دەپ شەشىلگەن.
جالپى, استانا ءتۋرنيرى قىزىقتى ءوتىپ جاتىر. ويتكەنى, ءار سالماقتا 6 بوكسشىدان 20 بوكسشىعا دەيىن ونەر كورسەتۋدە. وسى جىگىتتەردىڭ اراسىندا باكۋدە وتكەن الەم چەمپيوناتىندا ءبىزدىڭ يۆان دىچكو مەن ادىلبەك نيازىمبەتوۆتەن جەڭىلىپ, ليتسەنزيا الا الماي قالعان قىتاي الىبى جان جيلەي مەن وزبەك اببوس اتوەۆتار دا بار.
داستان كەنجالين.
