جولداما قاي بوكسشىعا بۇيىرادى؟
بەيسەنبى, 5 ءساۋىر 2012 7:36
وليمپياداعا 113 كۇن قالدى
بۇگىن استانا تورىندە ازيانىڭ 29 ەلىنىڭ بوكسشىلارى قاتىساتىن ەلباسى نۇرسۇلتان نازارباەۆتىڭ جۇلدەسى ءۇشىن حالىقارالىق تۋرنير باستالادى. وسى ءدۇبىرلى دودادا ازيا ايماعى بويىنشا 10 سالماقتا جازعى وليمپيا ويىندارىنىڭ 29 جولداماسى ساراپقا سالىنادى.
وليمپياداعا 113 كۇن قالدى
بۇگىن استانا تورىندە ازيانىڭ 29 ەلىنىڭ بوكسشىلارى قاتىساتىن ەلباسى نۇرسۇلتان نازارباەۆتىڭ جۇلدەسى ءۇشىن حالىقارالىق تۋرنير باستالادى. وسى ءدۇبىرلى دودادا ازيا ايماعى بويىنشا 10 سالماقتا جازعى وليمپيا ويىندارىنىڭ 29 جولداماسى ساراپقا سالىنادى.
بۇل باسەكەدە بىلىكتى باپكەر مىرزاعالي ايتجانوۆ جاتتىقتىراتىن قازاقستان ۇلتتىق قۇراماسى 4 سالماق دارەجەسى بويىنشا كۇش سىناسادى. وندا ەڭ جەڭىل, ياعني 49 كيلودا ءبىرجان جاقىپ, 52 كيلودا ءىلياس ءسۇلەيمەنوۆ, 64 كيلو سالماقتا دانيار ەلەۋسىنوۆ پەن 91 كيلودا ۆاسيلي لەۆيت قولعاپ ءتۇيىستىرەدى. وسى بوكسشىلار قازاقستان قۇراماسىنىڭ بىلتىر باكۋدە وتكەن الەم چەمپيوناتىندا جەڭىپ العان 5 ليتسەنزياسىنان باسقا تاعى 4 جولداما ءۇشىن تالاساتىن بولادى.
ال باكۋدە بولعان الەم چەمپيوناتىندا ءبىزدىڭ ەلىمىزدەن قولا جۇلدەگەر اتانعان عاني جايلاۋوۆ (60 كگ.), كۇمىس جۇلدەگەرلەر سەرىك ساپيەۆ (69 كگ.) پەن ادىلبەك نيازىمبەتوۆ (81 كگ.) جانە قولا جۇلدەگەر بولعان اسا اۋىر سالماقتاعى يۆان دىچكو وليمپيادا جولداماسىن يەلەنگەن بولاتىن. سونىمەن بىرگە, وسى سىندا 75 كيلوداعى دانابەك سۋجانوۆ تا لوندونعا جولدامانى جەڭىپ الدى. ول ءوز سالماعىندا شيرەك فينالعا شىعىپ, ليتسەنزياعا يە بولدى. وسىلاردىڭ ىشىندە سۋجانوۆ پەن نيازىمبەتوۆتىڭ العاش رەت الەم چەمپيوناتىنا قاتىسىپ, جولدامانى جەڭىپ العانىن ايتا كەتكەن ءجون.
49 كيلوداعى ءبىرجان جاقىپ – ۇلتتىق قۇراما باپكەرىنىڭ ءتول ءشاكىرتى. ول دا باكۋدە وتكەن الەم چەمپيوناتىنا قاتىسىپ, وليمپيادا جولداماسى ءۇشىن كۇش سىناسقان بولاتىن. الايدا, سول جولى مىقتى قارسىلاستارعا كەزىككەن ءبىرجاننىڭ جولى بولمادى. ول – وسىعان دەيىن دە ءبىراز الەم چەمپيوناتتارى مەن حالىقارالىق تۋرنيرلەردىڭ, ءتىپتى بەيجىڭ وليمپياداسىنىڭ دا جەيدەسىن توزدىرعان بوكسشى. ونىڭ ەڭ باستى جەتىستىگى – 2005 جىلعى الەم چەمپيوناتىنىڭ قولا جۇلدەگەرى اتانعانى. سودان كەيىن ول بىرنەشە حالىقارالىق تۋرنيرلەردىڭ جەڭىمپازى اتاندى. بۇل جەردە وعان وليمپيادا چەمپيونى, ءۇش دۇركىن الەم چەمپيونى قىتاي زوۋ شيميننىڭ كۇنى بۇگىنگە دەيىن باستى قارسىلاس بولىپ كەلە جاتقانىن ايتۋ كەرەك. زوۋ ءبىرجان ءۇشىن الىنبايتىن قامال سياقتى. بىلتىر باكۋدە وتكەن الەم چەمپيوناتىندا دا قىتاي بوكسشىسى ءۇشىنشى مارتە چەمپيون اتانعاندا, ءبىزدىڭ ءبىرجان بارماعىن تىستەپ قالعان. سول جولى ول وليمپيادا جولداماسىن الا الماي, جارىستى ەرتە اياقتادى. وسى جەڭىلىسىنەن كەيىن ءبىرجاننىڭ لوندون وليمپياداسىنا جولداما بەرەتىن جارىستارعا قاتىسۋى بەلگىسىز بولعان. بىراق, ونىڭ باعى بار ەكەن. ونىڭ سالماعىنداعى ليتسەنزيالىق جارىس وسى جىلدىڭ باسىندا استانادا وتەتىن بولىپ شەشىلدى. بۇعان دەيىن حالىقارالىق وليمپيادالىق كوميتەت 49 كيلودا وليمپيادا جولداماسى ساراپقا سالىنبايدى, ويتكەنى, باكۋدە وتكەن الەم چەمپيوناتىندا بۇل سالماقتاعى 6 بوكسشى وليمپيادا ليتسەنزياسىن الىپ قويعان دەپ مالىمدەمە جاساعانىن بىلەمىز. بىراق ايبا باسشىلارى وزدەرىنىڭ شەشىمدەرىنە شۇعىل وزگەرىس ەنگىزىپ, ازيا ايماعى بويىنشا 75 كيلو سالماقتاعى ءبىر ليتسەنزيانى ەۋروپاعا بەرىپ, وزدەرىنە ەۋروپادان 49 كيلوداعى ءبىر جولدامانى قوسىپ الدى. ءبىزدىڭ بوكسشى ءۇشىن وليمپيادا جولداماسىن جەڭىپ الۋعا بۇدان اسقان مۇمكىندىك بار ما؟ ەندى ءبىزدىڭ بوكسشىعا وسى مۇمكىندىكتى ءتيىمدى پايدالانۋعا ۇمتىلۋ كەرەك.
كەلەسى 52 سالماقتا ءبىزدىڭ قۇراماداعى تاجىريبەلى بوكسشىمىز ولجاس ساتتىباەۆتىڭ تۋرنيرگە قاتىسۋعا باستى ۇمىتكەردىڭ ءبىرى بولعانى بەلگىلى. الايدا, سوڭعى ساتتە ونىڭ ورنىنا ءىلياس سۇلەيمەنوۆ شىعاتىن بولىپ شەشىلدى. وسى تۋرنيردە سۇلەيمەنوۆكە مىقتى قارسىلاس بولاتىن بوكسشىلار كوپ. ونىڭ ەڭ باستى قارسىلاستارى رەتىندە قىتاي, موڭعوليا سياقتى ەلدەردىڭ وكىلدەرى سانالادى. دەگەنمەن, ءىلياستىڭ لوندون وليمپياداسى ساراپقا سالىناتىن ءتورت جولدامانىڭ بىرەۋىن جەڭىپ الۋعا مۇمكىندىگى بار. ول ءۇشىن جارتىلاي فينالعا شىقسا جەتەدى.
بۇدان كەيىنگى 64 كيلودا سارى قۇرلىقتىڭ ليتسەنزياسىن دانيار ەلەۋسىنوۆ جەڭىپ الۋعا ۇمتىلاتىن بولادى. بۇل بوكسشى دا باكۋدەگى الەم چەمپيوناتىندا ورتا جولدان ءسۇرىنىپ, جولداماعا قول جەتكىزە الماعان بولاتىن. سوندىقتان د.ەلەۋسىنوۆكە استاناداعى تۋرنيردە سوڭعى مۇمكىندىك.
وسى تۋرنيردە 91 كيلو سالماقتاعى ۆاسيلي لەۆيتكە دە وليمپيادا ليتسەنزياسىن يەلەنۋگە مۇمكىندىك بەرىلىپ وتىر. ونىڭ استانا تۋرنيرىنە قاتىساتىنى سوڭعى ساتتە شەشىلدى. باستاپقىدا لەۆيتتىڭ جاراقات الۋىنا بايلانىستى 91 كيلودا دانيار ءۇستەمباەۆتىڭ شىعاتىنى تۋرالى اڭگىمە بولعان. بىراق, لەۆيت جاراقاتىنان ايىعىپ, وزىنە تەز كەلدى. ءسويتىپ, باپكەرلەر وعان تاعى ءبىر مۇمكىندىك بەرۋگە شەشىم قابىلدادى. بۇل بوكسشىمىز دا باكۋدەگى الەمدىك باسەكەدە جولدامادان قاعىلعان بولاتىن. ەندى سول كەزدە كەتكەن ەسەسىن استانا تورىندە قايتارادى دەپ سەنەمىز. لەۆيتتىڭ سالماعىندا ازيا ايماعى بويىنشا 2 ليتسەنزيا بولىنگەن. ال وليمپيا ويىندارىندا بۇل سالماقتا 16 بوكسشى كۇش سىناسادى.
استاناداعى تۋرنيردەن كەيىن وليمپيادا جولداماسى ءۇشىن تاعى بىرنەشە جارىس وتەتىن بولادى. جىل باسىنان بەرگى العاشقى جارىس 20-26 ناۋرىز كۇندەرى اۆستراليانىڭ كانبەررا قالاسىندا ءوتتى. وندا مۇحيت ايماعى بويىنشا ليتسەنزيالار ساراپقا سالىندى. ەندى الداعى جارىستار ەۋروپا, امەريكا جانە افريكا قۇرلىقتارىندا وتەدى دەپ جوسپارلانۋدا. اتاپ ايتقاندا, 13-22 ءساۋىر ارالىعىندا تۇركيانىڭ ترابزون قالاسىندا ەۋروپا ەلدەرى وليمپيادانىڭ قالعان 26 جولداماسىن ساراپقا سالسا, 27 ءساۋىر مەن 6 مامىر كۇندەرى افريكا ەلدەرى ماروككونىڭ كاسابلانكا قالاسىندا قۇرلىقتىق ليتسەنزيالار ءۇشىن باق سىناسادى. ال امەريكا قۇرلىعىنداعى جارىستار 4-13 مامىر ارالىعىندا برازيليانىڭ ريو-دە جانەيرو قالاسىندا وتەدى. وسى ىرىكتەۋ تۋرنيرلەرى بىتكەن سوڭ, ايبا حالىقارالىق وليمپيادا كوميتەتىمەن بىرىگىپ, تاعى سەگىز جولدامانى ءبولەدى. ونىڭ بىرەۋى ازيا قۇرلىعىنا بەرىلەدى دەپ كۇتىلۋدە.
استانادا وتەتىن ليتسەنزيالىق تۋرنيردە ساراپقا سالىناتىن جولدامالاردىڭ سانى
سالماق دارەجەسى سانى
49 كيلو 1
52 كيلو 4
56 كيلو 3
60 كيلو 1
64 كيلو 4
69 كيلو 3
75 كيلو 4
81 كيلو 3
91 كيلو 1
+91 كيلو 1
بارلىعى 25
قۇرلىق بويىنشا قالعان جولدامالاردىڭ سانى
سالماق افريكا امەريكا ازيا ەۋروپا بارلىعى
49 كيلو 6 3 1 4 14
52 كيلو 6 2 4 3 15
56 كيلو 5 4 3 4 16
60 كيلو 6 4 1 4 15
64 كيلو 6 5 4 1 16
69 كيلو 6 5 3 2 16
75 كيلو 5 5 4 2 16
81 كيلو 4 5 3 3 14
91 كيلو 2 3 1 1 7
+91 كيلو 2 3 1 2 8
بارلىعى 48 38 25 26 137
داستان كەنجالين.
