ءپىر بەكەت
سارسەنبى, 12 جەلتوقسان 2012 7:13
حالقىمىزدا: «اي ورتاق, كۇن ورتاق, جاقسى ورتاق» دەلىنەدى دەسەك, بولەك بولمىستى بەكەت اتا – بەرىسى ءيىسى قازاققا, ءارىسى ءدۇيىم مۇسىلمان الەمىنە ورتاق تۇلعا. جۋىردا «اتامەكەن» باسپاسىنان جارىق كورگەن «بەكەت اتا – 260» كىتابى ءپىر اتانىڭ ۇلان-عايىر قازاق دالاسىنا ورتاق جان ەكەندىگىن دالەلدەي ءتۇستى.
سارسەنبى, 12 جەلتوقسان 2012 7:13
حالقىمىزدا: «اي ورتاق, كۇن ورتاق, جاقسى ورتاق» دەلىنەدى دەسەك, بولەك بولمىستى بەكەت اتا – بەرىسى ءيىسى قازاققا, ءارىسى ءدۇيىم مۇسىلمان الەمىنە ورتاق تۇلعا. جۋىردا «اتامەكەن» باسپاسىنان جارىق كورگەن «بەكەت اتا – 260» كىتابى ءپىر اتانىڭ ۇلان-عايىر قازاق دالاسىنا ورتاق جان ەكەندىگىن دالەلدەي ءتۇستى.
ءوزىمىز كەشە عانا قۇرساۋىنان شىققان بوداندىق بۇعاۋى ءبىراز جىل ۇلتتىق قۇندىلىقتارىمىزدان الشاقتاتىپ جىبەردى. بۇل سالقىندىقتىڭ لەبى بەكەت اتا ەسىمىن دە شالماي قالعان جوق. ءبۇگىندە ءپىر اتانى باسقا تۇگىل, قازاقتىڭ ءتورت اتىرابى تولىق ءبىلمەي جاتسا, مۇنىڭ سەبەبىن وسىدان ىزدەۋىمىز كەرەك. بىراق بىزگە قازىر سەبەبىن ىزدەۋ ەمەس, ولقىلىقتىڭ ورنىن تولتىرۋ, ءجىبەرگەن ەسەمىزدى ەسەلەي تۇگەندەۋ ماڭىزدى. وسى تۇرعىدا تاۋەلسىزدىك الىپ, ەسىن جيىپ, ەڭسەسىن تىكتەي باستاعان حالقىمىزدىڭ ءار كەزەڭدە ءومىر سۇرگەن, ەل ءۇشىن ەڭبەك ەتكەن ەرەندەردى تۇگەندەپ, جاق پەن جىككە بولمەي ورتاق ۇلىقتاي باستاعانى كوڭىل قۋانتادى. جۋرناليست كەنجەبەك تۇمانباي ۇلىنىڭ قۇراستىرۋىمەن, مىڭ دانا تارالىممەن جارىق كورگەن «بەكەت اتا – 260» اتتى جاڭا كىتاپتىڭ نەگىزگى ءتىنى – 2010 جىلى بەكەت اتانىڭ 260 جىلدىق مەرەيتويىنا وراي قازاقستاننىڭ ءار ءوڭىرىندە بەرىلگەن اس, عىلىمي-تەوريالىق كونفەرەنتسيا, ءوزگە دە تاعىلىمدى شارالاردىڭ باسىن بىرىكتىرۋ, حاتتاۋ. ءايتسە دە, كىتاپ تەك شارالار شەڭبەرىندە شەكتەلىپ قالمايدى.
ەلباسى ن.نازارباەۆتىڭ اتا مەرەيتويى قارساڭىندا جولداعان قۇتتىقتاۋىمەن, ماڭعىستاۋ وبلىسىنىڭ اكىمى ب.مۇحامەتجانوۆتىڭ العىسوزىمەن باستالعان كىتاپ اتا تاعىلىمى, وڭىرلەردە وتكەن شارالار, عالىمداردىڭ, جازۋشىلاردىڭ قالامىنان شىققان بەكەت اتا تۋرالى ايتىلىپ جۇرگەن ءاڭگىمە, دەرەك, اڭىز, زەرتتەۋ-زەردەلەۋ ماقالالارىن, جۋرناليستەردىڭ بىرقاتار رەپورتاجدارىن, اقىنداردىڭ ارناۋ ولەڭدەرى مەن سازگەرلەر اندەرىن, ۇرپاقتارى مەن ولارعا بەرىلگەن ەنشىلەر جايلى, ماڭعىستاۋ جەرى, ونداعى كيەلى ورىندار, بەكەت اتا ءىلىمىن جالعاستىرعان ءدىندار ەرجان حازىرەت تۋرالى ماتەريالداردى توپتاستىرادى. كىتاپتان ماڭعىستاۋ وبلىسىنىڭ بۇرىنعى اكىمى, بەكەت اتا ۇلاعاتىن دارىپتەۋگە كوپ قولداۋ كورسەتكەن, قازىرگى قازاقستان رەسپۋبليكاسى پرەمەر-مينيسترىنىڭ ورىنباسارى ق.كوشەرباەۆتىڭ, بەلگىلى جازۋشى-تاريحشىلار ءا.كەكىلباەۆ پەن ق.سالعاراۇلىنىڭ, باس ءمۇفتي ءا.دەربىسالىنىڭ, عالىم ق.ءجۇسىپتىڭ, جازۋشى س.ەلۋبايدىڭ, تانىمال ءارتىس ا.ءاشىموۆتىڭ, وزگە دە ەل تانىعان ازاماتتاردىڭ اتا تۋرالى جازعان دۇنيەلەرىن تابۋعا بولادى.
ۇرپاقتارىنىڭ جانە ەلجاندى ازاماتتاردىڭ ۇيىمداستىرۋىمەن جەتىسايدا باستالىپ, ماڭعىستاۋدا جاڭاوزەننەن وعىلاندىعا دەيىن تاقتايداي «اتا جولى» سالىنىپ, ەلىمىزدىڭ تۇكپىر-تۇكپىرىنەن مىڭداعان قوناقتار اعىلعان ۇلى تويعا ۇلاسقان بەكەت اتانىڭ 260 جىلدىق مەرەيتويى الماتى وبلىسىنىڭ ۇشقوڭىر اۋىلىندا, اتىراۋ وبلىسىنىڭ جىلوي اۋدانىنا قاراستى اقمەشىت ءوڭىرىندە, استانا قالاسىندا, سونداي-اق وڭتۇستىك جانە سولتۇستىك قازاقستان وبلىستارىنىڭ بىرىگىپ ۇيىمداستىرۋىمەن شىمكەنت قالاسىندا جالعاستى. وقىرمان كىتاپتان قازاق بالالارى باس قوسىپ, ۇرپاققا بەرەرى مول تاعىلىمدى رۋحانيات شاراسىنا اينالدىرعان اتانىڭ مەرەيتويى تۋرالى جان-جاقتى ماعلۇمات الا الادى.
اتانىڭ قۇپيا الەمىن اشۋ مۇمكىن ەمەس تە بولار, ايتسە دە جاڭا كىتاپتى بەكەتتانۋ عىلىمىنا قوسىلعان ۇلەس دەپ بىلەمىز. اتا تۋرالى جازىلعان ءاربىر كىتاپ, وتكىزىلگەن عىلىمي-تەوريالىق كونفەرەنتسيا, جاسالعان شارا, اتقارىلعان ءىس ۇلكەن ارناعا توعىسىپ, بەكەتتانۋ عىلىمىنىڭ دامۋىنا ەكپىن بەرەدى دەپ ويلايمىز.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.
