قىران قازاسى قيادا
جۇما, 20 شىلدە 2012 8:05
جاقىندا حان ءتاڭىرى شىڭىنا شىعۋعا اتتانعان ەكسپەديتسيادان قارالى حابار كەلىپ جەتتى. وسى كەزگە دەيىن تالاي تاۋلارعا شىعىپ, شىڭداردى باعىندىرعان الپينيست ادىلەت يمامبەكوۆ قازا تاپقان.
قازىر ءالپينيستىڭ بۇل جاعدايعا قالاي دۋشار بولعانى ءجونىندە ەشتەڭە ايتا المايمىز. ءبىر عانا بەلگىلى نارسە, ول قايتىس بولعان كەزدە 5 000 مەتر بيىكتىكتەگى شاتىردا بولىپتى. ودان باسقا دەرەك جوق. ال ادىلەت يمامبەكوۆ كىم ەدى؟ ينتەرنەتتەن ول تۋرالى كوپ نارسەگە قانىعا الدىق. الپينيست جىگىت facebook پەن باسقا دا الەۋمەتتىك جەلىلەردە تىركەلىپ, ءوزىنىڭ عالامتورداعى دوستارىمەن جاقسى بايلانىس ۇستاپ تۇرعان ەكەن.
جۇما, 20 شىلدە 2012 8:05
جاقىندا حان ءتاڭىرى شىڭىنا شىعۋعا اتتانعان ەكسپەديتسيادان قارالى حابار كەلىپ جەتتى. وسى كەزگە دەيىن تالاي تاۋلارعا شىعىپ, شىڭداردى باعىندىرعان الپينيست ادىلەت يمامبەكوۆ قازا تاپقان.
قازىر ءالپينيستىڭ بۇل جاعدايعا قالاي دۋشار بولعانى ءجونىندە ەشتەڭە ايتا المايمىز. ءبىر عانا بەلگىلى نارسە, ول قايتىس بولعان كەزدە 5 000 مەتر بيىكتىكتەگى شاتىردا بولىپتى. ودان باسقا دەرەك جوق. ال ادىلەت يمامبەكوۆ كىم ەدى؟ ينتەرنەتتەن ول تۋرالى كوپ نارسەگە قانىعا الدىق. الپينيست جىگىت facebook پەن باسقا دا الەۋمەتتىك جەلىلەردە تىركەلىپ, ءوزىنىڭ عالامتورداعى دوستارىمەن جاقسى بايلانىس ۇستاپ تۇرعان ەكەن. ماسەلەن, facebook الەۋمەتتىك جەلىسىنىڭ وزىندە ونىڭ 379 دوسى بولىپتى. سولارمەن كەزەكتى شىڭدى باعىندىرۋعا شىققاندا حات جازىسىپ, حابار الىسىپ تۇرعانىن بايقاۋ قيىن ەمەس. ءبىز ءوزىمىز ادىلەتپەن جاقىن تانىسىپ-بىلىسپەسەك تە ونىڭ الەۋمەتتىك جەلىلەردەگى دوستارىن الپينيست جىگىتتىڭ قانداي ادام بولعانىن, ونىڭ قاي كەزدە سوڭعى رەت حات جازىسقانىن بىلۋگە تىرىسىپ, اڭگىمەگە تارتقانىمىزدا ولاردىڭ ءبارى ادىلەتتىڭ اتىنا زاتى ساي اقكوڭىل, اقجارقىن جىگىت بولعانىن ايتتى. ادىلەتتىڭ ينتەرنەتتەگى قاي سۋرەتىن الساڭىز دا سونىڭ بارىندە شات جۇزىمەن ادامدى باۋراپ وزىنە تارتىپ تۇر. ونىڭ, ءبىزدىڭ الپينيزمدەگى جارىق جۇلدىزىمىزدىڭ قانداي ادام بولعانىن كورۋگە بولادى. قانداسىمىزدىڭ ءومىربايانىنا قىسقاشا توقتالار بولساق, ول ارۋ الماتىدا تۋىپ, 1998 جىلى وسىنداعى فيزيكا-ماتەماتيكا مەكتەبىن بىتىرگەن ەكەن. سودان كەيىن اقش-تىڭ گارۆارد ۋنيۆەرسيتەتىنىڭ (ماسساچۋسسەتس شتاتى, كەمبريدج قالاسى) اسپيرانتۋراسىنا ءتۇسىپ, سوندا قازاقستانداعى جوعارى وقۋ ورىندارىندا العان ءبىلىمىن جەتىلدىرۋگە كۇش سالىپتى. وسى ءبىلىم ورداسىندا ونىڭ الپينيزمگە دەگەن قىزىعۋشىلىعى ويانىپ, ۋنيۆەرسيتەتتەگى الپينيزم كلۋبىنىڭ مۇشەسى بولادى. سول كەزدەن باستاپ ادىلەت ونداعى اسپيرانتتار جانە ستۋدەنتتەرمەن بىرگە جەر ءجۇزىنىڭ كوپتەگەن تاۋلارىنا شىعۋدى ماقسات ەتىپ, ساپارعا شىعادى. ينتەرنەتتە گارۆارد ۋنيۆەرسيتەتىنىڭ الپكلۋبى مۇشەلەرىنىڭ ءوز كەزىندە گرەنلانديا, پەرۋ, الياسكا, ەكۆادور, مەكسيكا, كانادا, اقش, ەۋروپا ەلدەرىنە ساياحات جاساپ, سونداعى تاۋلارعا شىققانى تۋرالى كوپتەگەن دەرەكتەردى كەزدەستىرۋگە بولادى. ءبىزدىڭ ادىلەت سول كلۋبتىڭ مۇشەلەرى سالعان جولمەن ءجۇرىپ ءوتۋدى الدىنا ماقسات ەتىپ قويادى. دەگەنمەن, ونىڭ بارىنە جەتۋ قيىننىڭ-قيىنى ەكەنى بەلگىلى. ءسويتىپ, جەرلەسىمىز سولاردىڭ بارىنە بارماسا دا ازيانىڭ, قۇس قاناتى تالاتىن تاۋلارىنا شىعىپ, شىڭدارىن باعىندىرادى. سونداي ساپارلارىنىڭ ءبىرىن 2005 جىلى جاساپ, ول ءوزى وقيتىن وقۋ ورنىنىڭ وقىتۋشىلارى, اسپيرانتتارى جانە ستۋدەنتتەرىمەن بىرگە قىرعىزستان مەن قىتاي شەكاراسىنداعى بوربولدا شىڭىنا شىققان بولاتىن. ودان كەيىن دە ءادىلەت يمامبەكوۆ وتانداستارىمەن جانە شەتەلدىك ءارىپتەستەرىمەن بىرگە كوپتەگەن بيىكتىكتەردى باعىندىرىپ, تاجىريبە جينادى.
الەۋمەتتىك جەلىدەگى ادىلەتتىڭ دوستارىنان وسى ساپارلارى تۋرالى سۇراساڭىز: «ول الدىنا قويعان ماقساتىنان تايمايتىن, سوعان جەتۋ ءۇشىن قولدا بار مۇمكىندىكتىڭ ءبارىن جاسايتىن جىگىت ەدى», دەگەندى ايتادى. تاعى بىرەۋى: «ول بىزگە تاۋعا شىعىپ, شىڭداردى باعىندىرۋ ءۇشىن جارالعانمىن دەيتىن. ءتاجىريبە جيناي ءجۇرىپ, مىقتى الپينيست بولدى», دەيدى. ءۇشىنشى ءبىر دوسى وسى ماعىنادا ايتىپ كەلىپ, ادىلەتتىڭ تاۋعا شىقپاسا ۇيدە وتىرا المايتىن ادەتى بولعانىن, وعان تاعدىر تاعى دا شىڭدارعا اتتانۋعا مۇمكىندىك بەرسە ول ءمىندەتتى تۇردە جەر ءجۇزىنىڭ ەڭ بيىك نۇكتەسى سانالاتىن ەۆەرەستى دە باعىندىرار ەدى دەگەن پىكىرىن ءبىلدىردى.
ادىلەت دوستارى ءسوزىنىڭ جانى بار. ويتكەنى, قازىردىڭ وزىندە ينتەرنەت پاراقتارىن اقتارىپ كورسەڭىز, ونى كوپشىلىك تاعى ءبىر قازاقستاندىق الپينيست دەنيس ۋرۋبكونىڭ بولاشاقتاعى ءىزباسارى سانايتىنىن ايتقان. دەگەنمەن, كەزىندە اتاقتى الپينيست بولعان قازبەك ۋاليەۆتىڭ, بەرتىندەگى ماقسۇت جۇماەۆتىڭ جولىن جالعاستىرعان ءبىزدىڭ قۇيرىقتى جۇلدىزداي جارق ەتكەن باۋىرىمىزدىڭ ارامىزدان ەرتە كەتكەنى وكىنىشتى. ادىلەتتىڭ تۋعان-تۋىستارىنىڭ ايتۋىنشا, ونىمەن قوشتاسۋ ءراسىمى بۇگىن نەمەسە ەرتەڭ الماتىدا ءوزى تۇرعان «تاۋگۇل» شاعىن اۋدانىنداعى ۇيدە وتەدى.
سۋرەتتە: ءا.يمامبەكوۆ.
داستان كەنجالين,
«ەگەمەن قازاقستان».
