ەل تاعدىرىن ەڭكەيمەي كوتەرگەن
سارسەنبى, 9 مامىر 2012 7:22
103 جاستاعى تىل ەڭبەككەرى قاديشا تولەگەنوۆا اجە تۋرالى
بىردە اۋداندىق ارداگەرلەر كەڭەسىنىڭ توراعاسى سادىق اليەۆ مىرزا: «شاكە, «مىرزاباي احۋن» اۋىلىندا جاسى جۇزدەن اسقان قاديشا اتتى اجە بار. سول جايلى گازەتكە جازساڭىز», – دەگەن وي ءبىلدىردى.
كەلىسىمىمدى بەرسەم دە ءبىر عاسىر جاساعان انا تۋرالى جازۋ مەنى قاتتى ويلاندىردى. اقىرى تاۋەكەلگە بەل بايلاپ, 103 جاسقا كەلىپ وتىرعان انامەن كەزدەسۋ ءۇشىن جولعا شىقتىق. جولسەرىگىم كۇنشىعار نۇردىلداەۆ اتتى زەينەتكەر ازامات. ول ءوزىنىڭ سول اۋىلدا تۋىپ-وسكەنىن, قاديشا اجەيدى جاستايىنان جاقسى بىلەتىنىن تىلگە تيەك ەتتى.
سارسەنبى, 9 مامىر 2012 7:22
103 جاستاعى تىل ەڭبەككەرى قاديشا تولەگەنوۆا اجە تۋرالى
بىردە اۋداندىق ارداگەرلەر كەڭەسىنىڭ توراعاسى سادىق اليەۆ مىرزا: «شاكە, «مىرزاباي احۋن» اۋىلىندا جاسى جۇزدەن اسقان قاديشا اتتى اجە بار. سول جايلى گازەتكە جازساڭىز», – دەگەن وي ءبىلدىردى.
كەلىسىمىمدى بەرسەم دە ءبىر عاسىر جاساعان انا تۋرالى جازۋ مەنى قاتتى ويلاندىردى. اقىرى تاۋەكەلگە بەل بايلاپ, 103 جاسقا كەلىپ وتىرعان انامەن كەزدەسۋ ءۇشىن جولعا شىقتىق. جولسەرىگىم كۇنشىعار نۇردىلداەۆ اتتى زەينەتكەر ازامات. ول ءوزىنىڭ سول اۋىلدا تۋىپ-وسكەنىن, قاديشا اجەيدى جاستايىنان جاقسى بىلەتىنىن تىلگە تيەك ەتتى.
وسىلايشا ەكەۋارا اڭگىمەلەسىپ وتىرىپ, «مىرزاباي احۋن» اۋىلىنا كەلىپ تە قالىپپىز. ماشينەمىز قام كەسەكتەن سالىنعان شاعىن ءۇيدىڭ الدىنا كەپ توقتادى.
– مىنە, قاديشا اجە وسى ۇيدە تۇرادى – دەدى جولسەرىگىم.
اۋلادا جۇرگەن جاس جىگىت ءبىزدى جىلى شىرايمەن قارسى الىپ, سالەمدەسكەننەن كەيىن:
– ۇيگە كىرىڭىزدەر, – دەدى.
ايتقان سوزىنە قاراعاندا اجەسىنە سالەم بەرۋشىلەر ءجيى كەلەتىن بولعاندىقتان بولۋ كەرەك دەگەن وي كەلدى. اڭگىمەنى تاعى دا كۇنشىعار باستادى.
– شاكە, بۇل قاديشا اجەنىڭ نەمەرەسى ەرتاي دەگەن جىگىت.
سودان سوڭ ءۇي يەسىنىڭ باستاۋىمەن ۇيگە كىرىپ, قاريانىڭ بولمەسىنە بارىپ سالەمدەسىپ بولعاننان كەيىن اتى-ءجونىمىزدى ايتىپ, كەلگەن شارۋامىزدىڭ ءمانىسىن باياندادىق. سابىرلىق ساقتاعان اجەمىز اڭگىمەمىزدى بۇزباي تىڭدادى. ءبىر مەزەتتە:
– بالالارىم, سەندەردىڭ مەنى سىيلاپ, ماعان كەلىپ سالەم بەرىپ وتىرعاندارىڭا مىڭ دا ءبىر راحمەت. اللا تاعالا ۇزاق ءومىر, مىقتى دەنساۋلىق بەرسىن. ال ەندى مەنى گازەتكە جازايىق دەگەن نيەتتەرىڭىزگە ايتارىم, مەن وسى جاسقا كەلگەنشە قالىڭ كوپشىلىك تاڭ قالارلىقتاي ەشتەڭە جاساعانىم جوق. وسى جۇرتپەن قاتار ءومىر كەشىپ كەلە جاتقان جايىم بار, – دەدى.
قاريانىڭ ايتقان ءسوزى سالماقتى, ءۇنى جۇمساق, قيمىلى شيراق كورىندى. «سىرلى اياقتىڭ سىرى كەتسە دە, سىنى كەتپەيدى» دەمەكشى كەسكىن-كەلبەتىنەن, ءجۇزىنەن ءالى دە ايەلگە ءتان سۇلۋلىقتىڭ بەلگىلەرى بايقالىپ-اق تۇردى. كيگەن كيىمى, ورامال تارتىسى, ءتىپ-تىك وتىرىسىنىڭ وزىنە قاراپ ءجۇز جاستان اسقان ادامنىڭ وسىنداي اجارىنىڭ ساقتالعانىنا, قيمىلىنىڭ تىڭ, ايتقان اڭگىمەسىنىڭ ساۋاتتىلىعىنا قايران قالاسىڭ.
سودان سوڭ كەيۋاناعا: «ءومىرىڭىزدىڭ قىزىقتى ءساتتەرىنەن اڭگىمە ايتىپ بەرسەڭىز. سونى قاز-قالپىندا وقىرمان قاۋىمعا جەتكىزسەك», دەگەن تىلەگىمىزدى بىلدىردىك.
– ولاي بولسا, – دەدى ول نەمەرەسى ەرتايعا قاراپ, – كەلىنگە تاپسىرما بەر. مىنا بالالارعا جاقسىلاپ تۇرىپ ساماۋرىن دايىنداسىن. سوسىن اڭگىمەمىزدى شاي ۇستىندە جالعاستىرامىز.
اڭگىمەنى قاديشا اجەمىزدىڭ ءوزى باستادى.
– جاستىق شاعىڭنان ارتىق باقىت بار دەيسىڭ بە؟ بىراق, ءبىز سول جاستىق شاقتىڭ قىزىعىن قىزىقتاي المادىق. ويتكەنى, جاستىق داۋرەنىمىز الاساپىران ۋاقىتقا تاپ كەلدى. ەندەشە مەنىڭ ءومىرىمدى ءۇش كەزەڭگە بولۋگە بولادى.
ءبىرىنشى كەزەڭىم – ول جاق, مەن جاق بولىپ اكە-شەشەمنىڭ كەلىسىمى بويىنشا شومەكەي رۋىنىڭ سارعاسقا اتتى اتالىعىمەن قۇداندالى بولىپ, مەنى ون بەس جاسىمدا تولەگەن بالاسى الىشەرگە قوستى. الىشەرمەن جيىرما ءۇش جىل تاتۋ-ءتاتتى, ەرلى-زايىپتىلارعا ءتان ءومىر كەشتىك. وتباسىمىزدا 1935 جىلى تاربيە, 1938 جىلى قازىنا, 1940 جىلى پاتىما اتتى قىز بالالار ومىرگە كەلدى.
ول كەزدەرى كەلىندەر قازاقى ءداستۇر بويىنشا وتباسىنىڭ تىرشىلىگىمەن, بالا تاربيەسىمەن اينالىسقان. ەرتە تۇرىپ ءۇيدىڭ تازالىعىن ساقتاۋ, ساۋىن مالدارىنا قاراۋ جانە دە كەمپىر-شالدىڭ قۇماندارىنا جىلى سۋ قۇيىپ دايىن ەتۋ, ەرتەڭگىلىك شايىن قويىپ بەرۋ, وسىلايشا باسقا دا تىرشىلىك كوزى جالعاسا بەرەتىن. بۇل كەلىندىك پارىزدى وتەۋدىڭ باستامالارى عانا بولاتىن.
مارقۇم ەنەم: «ۇيگە ۇلكەن ادام كەلسە, سالەم ەت. ۇيدە دە, تۇزدە دە ەر ادامنىڭ الدىن كەسىپ وتپە, ەر ادامنىڭ بەتىنە بادىرايىپ قاراما, قاينىلارىڭنىڭ اتىن اتاما, وزدەرىنە لايىقتى ات قويا ءبىل. كۇيەۋىڭە ورىنسىز داۋىس كوتەرىپ سويلەۋشى بولما. كورپە-توسەك جيناۋدىڭ ءتارتىبىن ساقتا, شاي قۇيعاندا كەسە-اياقتىڭ دىبىسى شىقپاسىن, ىدىس-اياقتاردى جۋعاندا سالدىرلاتپا», دەپ ايتىپ وتىراتىن. بىزدەر ودان جامان بولعانىمىز جوق. قايتا اۋىلدىڭ ابىسىن-اجىندارى زامانداستارىنا: «تولەگەننىڭ كەلىنىنەن ۇلگى الىڭدار», دەپ مەنى ونەگە تۇتاتىن. ءار زاماننىڭ ءوز تالابى, ءوز ءتارتىبى, ءوز قىزىعى بولادى دەگەن وسى شىعار. ءبىز سول تالاپتى بۇلجىتپاي ورىنداعان كەلىندەردىڭ سوڭىمىز-اۋ.
مەنىڭ ءومىرىمنىڭ ەكىنشى كەزەڭىن بىلايشا بايانداۋعا بولادى.
سۇتتەي ۇيىپ وتىرعان شاڭىراعىمىزدىڭ تىنىشىن 1941 جىلعى باستالعان ۇلى وتان سوعىسى بۇزدى دا جىبەردى. بۇل جاعداي تەك جالعىز ءبىزدىڭ وتباسىمىزدا عانا ەمەس, بۇكىل اۋىلدى كۇڭىرەنتكەن. اۋىلداعى ەركەك بىتكەننىڭ ءبارى سوعىسقا اتتاندى. سولاردىڭ قاتارىندا مەنىڭ كۇيەۋىم الىشەر دە 1941 جىلدىڭ قىركۇيەك ايىندا سوعىسقا الىندى. سول كەتكەننەن ول ەلگە ورالمادى. ونىڭ قاي جىلى, قاي جەردە وققا ۇشقاندىعى ءالى كۇنگە دەيىن بەلگىسىز.
كۇيەۋىم سوعىسقا اتتانعاننان كەيىن مەنىڭ قاراۋىمدا قارت اتام مەن ەنەم جانە ءۇش قىز بالام قالدى. بۇلاردى اسىراۋ ءوز بورىشىما اينالدى. كولحوزعا مۇشە بولىپ كىرىپ, سول كەزدىڭ ءتارتىبى بويىنشا تاپسىرعان قول جۇمىسىنىڭ قاندايىنا بولسا دا بەلدى بۋىپ كىرىسىپ كەتتىم. جۇمىستىڭ تۇرلەرى كوپ بولاتىن. ول كەزدە قازىرگىدەي تەحنيكا دەگەن اتىمەن بولمايتىن. تەحنيكامىزدىڭ ۇلكەنى كەتپەن ەدى. سول كەتپەنمەن ەگىس ەگەتىن القاپتارعا ارىق قازۋ, اتىز-جابىقتى سوعۋ جۇمىستارىن جۇرگىزەتىنبىز. كۇرىش وتاۋ, ورۋ جانە ورىلعان كۇرىشتى ارقالاپ مولوتيلكاعا جەتكىزۋ ءبىزدىڭ موينىمىزدا. سول كەزدەرى ەڭ اۋىر جۇمىس «مادەنيەت» كانالى مەن ءبىزدىڭ اۋىلدىڭ ۇستىنەن وتەتىن «كوكقاسقا» كانالدارىن قازۋ بولدى. شامامەن «مادەنيەت» كانالىنىڭ ۇزىندىعى 12 شاقىرىم, «كوكقاسقانىڭ» ۇزىندىعى 6 شاقىرىم. وسى كانالداردى قازۋدىڭ باس-اياعىنا دەيىن قاتىستىم. كانال قازۋ جاپپاي جۇرگىزىلمەيتىن, ءار ادامعا ءبىر كۇندە قازاتىن جەردىڭ ولشەمىن بەرەتىن, ونى بىتىرمەي ۇيىڭە قايتپايسىڭ. تاپسىرمانى ورىنداپ ۇيگە كەش قايتاتىنبىز. وتباسىنا ورالعان سوڭ دا ءۇيدىڭ تىرشىلىگى جەتىپ-ارتىلىپ جاتاتىن. كەش جاتىپ, ەرتە تۇراتىنبىز.
سوعىستان كەيىنگى جىلدارداعى جۇمىستاردا وڭاي بولعان جوق. مايدا شارۋاشىلىقتاردى ىرىلەندىرۋ شارالارى ىسكە اسىرىلا باستادى. ماسەلەن, 1950-1951 جىلدارى «ادەبيەت», «مادەنيەت», «شاعان», «قىزىل ديحان» اۋىلدارى قوسىلىپ «قازاقستاننىڭ حح جىلدىعى» كولحوزى بولىپ اتاندى. ونىڭ ورتالىعى وسى كۇنگى «قالجان احۋن» اۋىلى بولدى.
قاديشا اجە ءوز ءومىرىنىڭ ءۇشىنشى كەزەڭى دەپ ەلىمىزدىڭ تاۋەلسىزدىك العان جىلىنان باستاپ, وسى كەزگە دەيىنگى مەرزىمدى ايتتى.
ول حالىقتىڭ كوپ تىلەگەن, كوپ ارمانداعان ماقساتىنا جەتىپ, ەگەمەندى ەل بولعانىنا ءوزىنىڭ دە كۋا بولىپ وتىرعاندىعىن عاسىرلىق عۇمىرىنداعى ەشتەڭەمەن تەڭەستىرۋگە بولمايتىن ەڭ باقىتتى كەزەڭىم دەيدى. بۇل انا جۇرەگىنەن اتقىلاپ شىققان, جامانشىلىقتى ارتقا سىلكىپ تاستاعان تۋعان حالقىن اينالىپ-تولعانعان ناعىز قۋانىشتىڭ ءوزى ەدى.
ەڭ الدىمەن ءار ادام ءوز تۋعان حالقىنىڭ پەرزەنتى. سول پەرزەنتتىك پارىزدى ورىنداۋ جولىندا قاديشا اجە دە تالاي قيىندىقتاردى باستان كەشىرىپتى. بىراق ول كەزدەسكەن قيىندىققا مويىمادى, ونى جەڭە دە ءبىلدى, ال جەڭىلگەن كەزىندە ساعىن سىندىرمادى. ءسويتىپ, ءومىردىڭ تالاي-تالاي قيلى كەزەڭى مەن تار جول تايعاق كەشۋ وتكەلىن باستان كەشىردى.
قىزدارىنىڭ بارلىعى دا ءوز تەڭدەرىن تاۋىپ, ءومىر كەشۋدە. ۇلكەنى تاربيە مەن ناۋقانباي التى بالالى بولىپ, جاڭاتالاپ اۋىلىندا, ەكىنشى قىزى قازىنا مەن نۇرعازى بەس بالانى ومىرگە اكەلسە, ءۇشىنشى قىزى پاتىما مەن ءساتتاي التى بالالى بولدى. بۇلاردىڭ سوڭعى ەكەۋى «مىرزاباي احۋن» اۋىلىندا تۇرادى. بۇل ءۇش شاڭىراقتىڭ ۇشەۋى دە ۇلدارىن ۇياعا, قىزدارىن قياعا قوندىرعان. ءوز زامانىنىڭ باقىتتى وتباسىلارى. ولاردىڭ باقىتىن: «بۇل مەنىڭ دە باقىتىم عوي», دەيدى قاديشا اجە.
قاديشا اجەنىڭ ەلىمىز ەگەمەندىك العاننان كەيىنگى جىلدارداعى تىنىس-تىرشىلىگى جونىندە ايتپاي كەتكەنىمىز ءجون بولماس. ارقاشاندا باقىتىن ەڭبەكتەن تاپقان ونىڭ زەينەتكەرلىككە شىققاننان كەيىنگى جاساعان جۇمىسىنىڭ ءوزى اۋىز تولتىرىپ ايتۋعا تۇرارلىق, كوپكە ۇلگى بولارلىقتاي. مىسالى, اۋلاسىنداعى ءبىر جارىم گەكتارداي جەردى كۇتىپ, باپتاۋ ءوزىنىڭ موينىندا. بالالارىنىڭ: «دەمالساڭىزشى, ءوزىمىز-اق اتقارامىز عوي», دەگەنىنە: «مەنىڭ ۇزاق جاساۋىما تىلەكتەس بولساڭدار, جەرمەن ەڭبەك ەتۋىمە كەدەرگى جاساماڭدار», دەيتىن كورىنەدى. ەندى بۇعان نە دەرسىز. وسى جەرگە جاز باستالۋىمەن قاۋىن, قاربىز, ءسابىز, جۋا, كارتوپ ەگەدى. جەمىس اعاشتارى ءوز الدىنا. جاز بويى ەرتە تۇرىپ وسى داقىلداردىڭ دۇرىس سۋارىلۋىن, دۇرىس قورەكتەنۋىن قاداعالاپ جۇرگەنى. ەتكەن ەڭبەك زايا كەتپەيتىنى انىق. سونىڭ ارقاسىندا جىل سايىن داقىلداردىڭ بۇل تۇرىنەن قىسقا جەتەرلىكتەي ءونىم الىپ كەلەدى.
– كۇزدە بۇل جەردى كەتپەنمەن شاۋىپ, سۇدىگەر كوتەرەدى. ءوزىنىڭ ايتۋىنشا سوڭعى 5-6 جىلدىڭ ءتوڭىرەگىندە جەر شابۋ جۇمىسىن بالالارىما جاساتىپ ءجۇرمىن. كەلەر جىلعا جەردى وسىلاي دايىنداماساڭ, ويداعىداي ءونىم الا المايسىڭ. سوندىقتان دا بۇل جۇمىستىڭ باسى-قاسىندا ءوزىم ءجۇرىپ باقىلاۋ جاسايمىن, – دەيدى قاديشا اجە.
سوڭعى كەزدەرى قاديشا اجە وقۋشى-جاستار ءتاربيەسىنە ءجيى ارالاسىپ كەلەدى. ونى اۋىلداعى №122 ورتا مەكتەپكە كىرەبەرىستەگى كەڭ اۋلانىڭ قابىرعاسىنا ىلىنگەن ۇلكەن ستەندتەن كورۋگە بولادى. بۇل بيلبورد تۇگەلدەي قاديشا اجەگە ارنالىپتى. ودان ونىڭ مەكتەپتەگى اتا-انالار كوميتەتىنىڭ قۇرمەتتى ءتورايىمى ەكەندىگىنەن, وقۋشىلارمەن كەزدەسۋ ساتتەرىنەن, تاقىرىپتى وزىنە ارناپ وتكىزىلگەن ءتاربيە ساعاتتارىنا قاتىسۋىنان, وقۋشىلاردىڭ اتا-انالار جينالىسىندا ءسويلەپ تۇرعان كەزدەرىنەن, جاستاردىڭ ۇيلەنۋ تويىنا باتا بەرىپ تۇرعان ءساتتەرىنەن حاباردار بولاسىز.
مەكتەپ ديرەكتورى ءساليما وسپانوۆانىڭ ايتۋىنشا, قاديشا اجە قاي كەز بولاسا دا مەكتەپتە وتەتىن شارالارعا شاقىرعان كەزدە كەشىكپەي ۋاقتىلى كەلەدى, وقۋشىلارعا ەڭبەكتىڭ قۇدىرەتتى كۇشى جونىندە ءاڭگىمە ايتۋدان استە جالىقپايدى.
ەشتەڭەگە قايمىقپايتىن, قوڭىر كۇيدى قاناعات تۇتقان قاديشا اجەنىڭ زەينەتاقىسى 25 مىڭ تەڭگە ەكەن. سولاي دەگەندە ەرىكسىز: «ياپىر-اي», دەيسىڭ. قانشاما جىل اۋىر ەڭبەكتىڭ ازابىن تارتىپ, وتان وزىمدىكى دەگەن نيەتپەن ءومىر كەشىپ, ءجۇز جىلدى ارتتا قالدىرعان ابزال انانىڭ زەينەتاقىسىنىڭ ءمولشەرىن زاڭ شىعارۋشى ازاماتتار بىلسە عوي. بىراق ومىردە وسىنداي ادامداردىڭ بار ەكەندىگىن ولاردىڭ بىلە بەرمەۋى دە عاجاپ ەمەس. بىراق بار.
بۇعان قوسارىمىز ونىڭ وتىرعان ءۇيى دە ەسكى. بۇدان الپىس بەس جىل بۇرىن سالىنىپتى. الايدا, بىزدە اناۋ جەتىسپەيدى, مىناۋ جەتىسپەيدى دەپ الاقان جايىپ, كومەك سۇراپ وتىرعان ول جوق. بارىن بازار تۇتقان مۇنداي اسا پاراساتتى جاندى ومىرىمىزدە ءبىرىنشى رەت كورگەنىمىزگە ءبىز دە قايرانبىز.
كەلگەن شارۋامىزدىڭ بەتىن قايىرىپ كەتۋگە ىنعايلانا باستاعانىمىزدى سەزگەن قاديشا اجە:
– بۇل ۇيدەن قۇر الاقان شىقپاڭدار. كانەكەي قولدارىڭدى جايىڭدار, باتامدى بەرەيىن:
يا, قۇدايىم قولداسىن,
ەش جاماندىق بولماسىن.
جورىتقاندا جولىڭ بولسىن,
قىدىر اتا جولداسىڭ بولسىن.
بالا-شاعاڭ امان بولسىن,
ەلىمىز تىنىش جاقسى زامان بولسىن.
ءمادينادا مۇحاممەد,
تۇركىستاندا قوجا احمەت,
جارىلقا دا, جارىق ەت,
نە تىلەسەڭ ءازىر ەت.
اللا تاعالا سەندەرگە مەنىڭ جاسىمدى بەرسىن.
اۋمين!
سونىمەن, 17 نەمەرە, 61 شوبەرە, 18 ءشوپشەك ءسۇيىپ وتىرعان 103 جاستاعى قاديشا ءتولەگەنوۆا اجەمىزدىڭ شىن ىقىلاسى مەن بەرگەن باتاسىن الىپ, ويلاپ كەلگەندەگى ماقساتىمىزدى ىسكە اسىراتىنداي بەرىك سەنىمدە بولدىق.
قايتارىمىزدا اۋىل اكىمى مىرزامۇرات ىبىراەۆقا جولىعىپ, قاديشا اجەنىڭ زەينەتاقىسى مەن ءۇي جاعدايى جايلى كورگەنىمىزدى ايتىپ بەردىك. ارينە, اۋىل اكىمىنىڭ قولىندا ونى بىردەن شەشەتىندەي مۇمكىندىك جوق ەكەندىگى بارشامىزعا ايان. ايتسە دە اۋدان بار, وبلىس بار – ءتيىستى ورىندار ارقىلى ماسەلە كوتەرىپ, مۇمكىن ءبىزدىڭ باستاۋ ايتىپ, قوزعاۋىمىزدىڭ وڭ شەشىمىن تابۋعا سەپتىگى تيەر مە دەگەندىك ەدى.
وسى كەڭسەدە اۋىلدىڭ ارداگەرلەر كەڭەسىنىڭ توراعاسى سۇلتان ءىزتاەۆپەن دە كەزدەستىك. ول دا قاديشا اجەگە قانداي قۇرمەت كورسەتسە دە ارتىق بولمايتىندىعىن تىلگە تيەك ەتتى. ونى ۋاقىتىندا زامانداستارى مەن تۇستاستارى اق كەتپەندى قاديشا دەپ اتاعاندارى جايلى دا ءسوز قوزعادى. ونىڭ ءمانىسى باسقالاردىڭ كەتپەنى توت باسقان قارا بولسا, مۇنىڭ كەتپەنى اپپاق بولىپ, يىعىنا سالىپ بارا جاتقاندا كۇن ساۋلەسىمەن شاعىلىسادى ەكەن. ارينە, اق كەتپەن جاسالمايتىنى ءدۇيىم جۇرتقا ءمالىم. ونىڭ كەتپەنىنىڭ اپپاق بولۋ سەبەبى كەزىندە جاس قاديشا جەردى شاپقاندا كەتپەننىڭ باسى تۇگەلدەي جەرگە ەنىپ كەتەدى ەكەن. ۇدايى وسىنداي قارۋلى كۇشتىڭ قولىنا تۇسكەن قارا كەتپەن كوپ ۇزاماي اپپاق كۇيگە تۇسەتىن بولىپتى. وسىنداي قارۋلى قولدىڭ يەگەرى قاديشا اجە جايلى ەل اراسىندا ايتىلار اڭگىمەلەر كوپ-اق.
اجە دەسەڭ, اۋىلدىڭ كەڭ پەيىلدىلىگىمەن اۋىزبىرشىلىگى ەسكە تۇسەدى. وسىنداي اجەلەردىڭ اجەسى – قاديشا تولەگەنوۆا. ەندەشە ءومىر جولىندا ءبىر عاسىرلىق اسۋدان اسقان, 103 جاسقا قادام باسقان قاديشا اجە ءالى دە جاساي بەرسىن…
شىڭعىس ايبوسىنوۆ, قازاقستان جۋرناليستەر وداعىنىڭ مۇشەسى.
قىزىلوردا وبلىسى, جالاعاش اۋدانى.
